Almaty oblystyq tótenshe jaǵdaılar departamenti, polısııa departamenti jáne jergilikti atqarýshy organ qyzmetkerleri jaqyn mańdaǵy aýyldardy aralap, halyqty habardar etken. Aýlany aralaý nátıjesinde úılerdi sý basý jaǵdaılary tirkelmegen. Qurbandar men zardap shekkender joq. Degenmen, tún ortasynda 28 adam evakýasııalanǵan. Zardap shekkender men evakýasııalanǵan adamdardy ornalastyrý úshin Qaraoı aýylyndaǵy № 49 orta mektep jáne № 18 orta mektepterde 250 oryn ázirlenip, turǵyndardy tasymaldaý úshin 2 birlik avtobýspen 7 kezekshilik uıymdastyryldy.
Jaınaq aýyly men Baıseıit aýyly, Qaraoı aýyly men N.Tilendıev avtojolynda oblystyq mańyzy bar kópir ótkelderinde sý deńgeıin monıtorıngileý jáne avtokólik quraldaryn ótkizý úshin JPQ beketteri qoıyldy.
Osy kúni oryn alǵan aımaqta kúshtik qurylymdar jumys isteýde. Onda jaǵany nyǵaıtý jáne tóseý jumystaryna 250 tonna ınertti materıal jáne 3000 qapshyq paıdalanylýda. Injenerlik tehnıkanyń kómegimen bóget sańylaýyn beton konstrýksııalarmen jáne topyraqpen jabý jumystary júrgizilýde.
«TJ joıýǵa Almaty oblysy TJD, JAO, PD, 28237 sh/b, shekara. Akademııa 2466 Qaraoı, ROSO, REQ jáne Gaz qyzmetinen barlyǵy 300-ge jýyq qyzmetker jáne 70-ke jýyq tehnıka jumyldyryldy», – dep habarlaıdy Almaty oblystyq tótenshe jaǵdaılar departamentiniń baspasaóz qyzmeti.
Derek kózderine súıensek, 1910 jyly salynǵan (114 jyl) Voroshılov sý qoımasynyń bógeti 2017 jyly 49 jylǵa senimgerlik basqarýǵa berilgen.
