Avtor atalǵan eńbeginde: «Adam mineziniń, aqyl-qaıratynyń ártúrli bolýy – tárbıeniń túrli-túrli bolýynan… Adam balasynyń urlyq isteýi, ótirik aıtýy, kisi tonaýy, óltirýi sııaqty buzaqylyqtardy jasaýy – tárbıeniń jetispegendiginen», deı kele, bala tárbıesinde týǵan eldiń ádet-ǵurpy men salt-dástúriniń belgili mólsherde qalaı áser etetinin ǵylymı turǵydan dáleldeı túskeni ańǵarylady.
Shyǵarma tórt bólimnen, 29 tarmaqshadan turady. Kitaptyń «Dıdaktıka» atty bóliminde, tárbıeniń psıhologııalyq negizderi (yntaly oqytý, úıretý ádisteri, mashyqtaný joldary, oqytýdaǵy kórnekilik, oqytý túrleri, t.b.) ótken ǵasyrdyń 20-jyldaryndaǵy qazaq mektepteriniń ómirinen alynǵan naqtyly mysaldarmen tereń taldanady. Eńbektiń tórtinshi bóliminde, pedagogıkalyq, psıhologııalyq keıbir máseleler sóz bolady. Ustaz ben shákirt yntymaqtastyǵynyń basty belgileri qazaq mektebinde sabaq ótkizýdiń ózindik erekshelikteri aıtylady. Kitap sońynda termınder berilgen. Mysaly, mýzykany – áýez óneri, etıkany – ádemilik páni degen eken...
Kitap týraly kezinde bizdiń gazetimizdiń bastaýy «Eńbekshi qazaqta» (1925 jyly) bylaı dep baǵa berilgen: «Júsipbektiń «Tárbıe jetekshisi» kitaby – jyl qusy. Bul kitaptyń tili óte jeńil, jańa sarynmen jazylǵan. Kitap ár oqýshynyń ústeliniń ústinde jatýy kerek».
Sondaı-aq bul týyndy týraly akademık Serik Qırabaev: «Júsipbektiń artynda birtalaı ǵylymı mura qaldy. Ol halyq aǵartý komıssarıatynda pedagogıkalyq oqý oryndarynda qyzmet isteı júrip, jas urpaqty jańa rýhta tárbıeleýge, ǵylymnyń ár salasynda jan-jaqty bilim alýyn kózdegen eńbekter, oqý quraldaryn jazdy. Olardyń ishinde «Tárbıege jetekshi» (Bala oqytýshylarǵa) kitaby eleýli ról atqarady. Bul týyndy árıne, búgingi pedagogıka men psıhologııanyń metodologııasy turǵysynan álsiz kórinse de, óz dáýiri úshin asa paıdaly qyzmet atqardy. Qazaq jastaryna osy ǵylymdar negizinde alǵashqy málimet berdi, ǵylymı termınderdiń týýyna negiz boldy» («Qaıta oralǵan qalamger»: Qurast. V.Kúzembaev. Almaty – 2003. 24-b) dep jazsa, fılologııa ǵylymdarynyń doktory Turysbek Raqymjan: «Bul kitapta dıdaktıka men pedagogıkalyq psıhologııalyq ǵylymı astarly, ult tilindegi tálim-tárbıelik termınder júıesi sóz bolady. Sonymen qatar balany oqytýdyń erejelerin, zańdaryn baıandaıtyn durys júıesin kórsetýge talpynǵan», dep oı túıipti.
