Atyraýda ótken Ulttyq quryltaıda da Memleket basshysy «Adal adam – Adal eńbek – Adal tabys» ushtuǵyrynyń bir negizi retinde osy indetpen kúres jolyn atap ótti. «Qaǵıdamyz – ádildik, tiregimiz – jaýapkershilik, maqsatymyz – órleý. Elimiz osy qundylyqtardy berik ustana otyryp, damý kókjıegin sózsiz keńeıte túspek. Al árbir adal adam adal eńbegimen adal tabysqa jetedi» degen Prezıdent búkil qoǵam bolyp jemqorlyqqa qarsy kúresti jalǵastyra beretinimizdi de atap ótti. Al ótkende Almatyda sybaılas jemqorlyqqa qarsy is-qımyl máseleleri jónindegi komıssııanyń otyrysy ótken edi.
Jemqorlyqqa qarsy kúres máselesin júıeli jolǵa qoıý mańyzdy. Almaty qalasynyń ákimi Erbolat Dosaevtyń tóraǵalyǵymen ótken keńeste megapolıstiń Sybaılas jemqorlyqqa qarsy qyzmetiniń basshysy Arman Rahımov densaýlyq saqtaý jáne qurylys salasyndaǵy jemqorlyq indetin boldyrmaýdyń keshendi sharalaryna toqtaldy.
Qurylys jáne turǵyn úı, ekologııa, jer qatynastary, kásipkerlik, ekonomıka jáne qarjy, áleýmettik sala, ınfraqurylym men jol – synǵa ilikken salalar sanatynda. О́tken jyly kásipkerlik qyzmetke zańsyz aralasqany úshin 3 laýazymdy tulǵa ákimshilik jaýapkershilikke tartylǵan. Sondaı-aq ruqsat berý tártibi men merzimin buzǵan taǵy 4 tulǵanyń áreketi áshkerelengen. Osylaısha, jemqorlar qoldy qylǵan 9,2 mlrd teńge qaıtarylyp, taǵy 5,4 mlrd teńge kólemindegi qarjy buǵattalǵan.
Keńesti ashqan Erbolat Dosaev Memleket basshysynyń tapsyrmasyna sáıkes sybaılas jemqorlyqtyń aldyn alý jáne oǵan qarsy is-qımyl sharalaryna erekshe kóńil bólinetinin atady. Arman Rahımovtyń málimetinshe, qabyldanyp jatqan sharalar megapolıste sybaılas jemqorlyq qylmysyn tómendetýge múmkindik berdi. Máselen, 2019-2021 jyldar aralyǵynda qalanyń densaýlyq saqtaý salasyndaǵy sybaılas jemqorlyqqa qarsy qyzmeti 36 qylmystyq isti tirkese, keıingi eki jylda barlyǵy 3 qylmystyq is tirkelgen.
Almatynyń Sybaılas jemqorlyqqa qarsy qyzmetiniń basshysy 2023 jyly qalanyń qoǵamdyq densaýlyq saqtaý basqarmasynyń qyzmetin syrtqy taldaý nátıjesinde 18 sybaılas jemqorlyq táýekeli anyqtalǵanyn, 20 usynys engizilgenin habarlady. Buǵan qosa, jeke medısınalyq uıymdarǵa medısınalyq qyzmetke lısenzııa alý kezindegi yqtımal buzýshylyqtar týraly shaǵymdarǵa baılanysty olardyń qyzmetiniń zańdylyǵyna monıtorıng júrgizý usynylǵan.
Almaty qalasy Qoǵamdyq densaýlyq saqtaý basqarmasynyń basshysy Iran Shametekov baıandaǵandaı, medısınalyq qyzmet kórsetý sapasyn arttyrý úshin MÁMS júıesinde jumys isteıtin 147 medısınalyq uıym, onyń ishinde 123 jeke uıym proaktıvti monıtorıngpen qamtylǵan.
Qala ákimi qoǵamdyq densaýlyq saqtaý basqarmasyna Medısınalyq jáne farmasevtıkalyq baqylaý komıtetiniń Almaty boıynsha departamentimen birlesip, Densaýlyq saqtaý mınıstrligine jeke medısınalyq uıymdar boıynsha usynystar engizýdi tapsyrdy. Erbolat Dosaev atap ótkendeı, bul jumystyń basty maqsaty – medısınalyq qyzmettiń sapasyn arttyrý jáne qala turǵyndarynyń ótinishine ýaqtyly den qoıý.
Qurylys salasyndaǵy sybaılas jemqorlyq táýekelderin joıý jónindegi sharalar týraly Almaty ákimdigi apparatynyń basshysy Beıbit Shahanov málimdedi. Onyń aıtýynsha, sáýlet organdary jumysynyń ashyqtyǵyn qamtamasyz etý jáne qazirgi zamanǵy IT sheshimderdi paıdalaný men laýazymdy tulǵalardyń jumysyn reglamentteý arqyly osy saladaǵy baqylaýdy kúsheıtýge mańyz berilgen. Sondaı-aq Aýyl sharýashylyǵy mınıstrligine jer qatynastaryn jetildirý jáne teris maqsatta paıdalaný múmkindikterin joıý boıynsha birqatar usynys joldanypty.
«Ákimdiktiń jaýapty bólimshelerine ár saladaǵy syrtqy taldaý nátıjesi boıynsha anyqtalǵan sybaılas jemqorlyq jasaýǵa yqpal etetin sebepter men jaǵdaılardy joıý boıynsha usynymdardyń sapaly oryndalýyn qamtamasyz etýdi tapsyramyn. Sybaılas jemqorlyq táýekelderin anyqtaý jáne joıý, sybaılas jemqorlyqqa qarsy mádenıetti nyǵaıtý jáne sybaılas jemqorlyqtyń aldyn alý árbir basshynyń kúndelikti jumysy bolýǵa tıis. Resmı jumys ádisterinen bas tartyp, halyqtyń narazylyǵyn týdyratyn júıeli problemalyq máselelerdi sheshý jóninde sharalar qabyldaý qajet», dedi Erbolat Dosaev.
ALMATY
