Ásirese biz Qamshybek Qońqabaevtyń jeńilgenine qynjyldyq. Asa aýyr salmaqta kúsh synasqan qandasymyz tusaýkeser kezdesýinde esimi kópshilikke beımálim Ramazan Karnýkaevqa jol berdi. Ingýshetııanyń týmasy 2021 jyly jastar arasynda Reseı chempıony atanyp, 2022 jyly Búkilreseılik spartakıadada qola medaldy ıelendi. Bar belesi – sol ǵana. Mine, qazaqtyń betkeustar boksshysy soǵan ese jiberdi. Osy jekpe-jekke baılanysty jankúıerler túrli pikir aıtyp jatyr. Keıbireýler «Olımpııa oıyndarynyń joldamasyn kúni buryn oljalaǵan Qońqabaev qazir babynda emes, ol múldem bosańsyp ketken» dese, bázbireýler «kelesi kezeńde óziniń syralǵy qarsylasy Bahodır Jalolovpen jolyqpaý úshin Qamshybek osyndaı qadamǵa bardy» dep topshylady. Bul rette qos tarappen de kelisýge bolady. Bizdiń oıymyzsha, Qamshybek ózbektiń oǵlanynan qaımyqqan sekildi. Basqa aıtar ýájimiz joq.
Ázerbaıjannyń astanasyndaǵy jarys álem jáne Azııa chempıonattarynyń kúmis júldegeri Serik Temirjanov úshin de sátsiz aıaqtaldy. 63,5 kg salmaqta synǵa túsken ol rıng qojaıyny Rýslan Rýstamovtan utyldy. Sol sekildi Damır Ábdiqadyr (51 kg) ırandyq Mehdı Parvızıge, Tımýr Nurseıitov (75 kg) ózbekstandyq Álisher Aıýpovtan aılasyn asyra almady.
Fınalda bes jerlesimiz judyryqtasty. Sheshýshi tusta Talǵat Syrymbetov (60 kg) ázerbaıjandyq Azrak Babyrovty, Darhan Dúısebaı (71 kg) ózbekstandyq Bekzod Hamıdovty, al Saǵyndyq Toǵambaı (92 kg) Alfonso Domıngesti utty. Bul rette Toǵambaıǵa erekshe toqtala ketken jón. Aqtyq synda ol tym azýly qarsylasqa tap boldy. Ázerbaıjannyń týy astynda óner kórsetip júrgen kýbalyq qabylannyń Tokıo Olımpıadasynyń qola júldegeri, Eýropa oıyndarynyń jeńimpazy, 2021 jylǵy álem chempıony jáne 2022 jylǵy sol jarystyń fınalısi degen ataǵy bar. Biraq qazaqtyń uly odan qaımyqqan joq. Básekeniń basynan aıaǵyna deıin qarqynyn esh báseńdetpegen Saǵyndyqtyń jeńisine eshkimniń kúmáni bolǵan joq.
Aqtyq saıysta ázerbaıjandyq Hasan Málikovten utylǵan Temirtas Júsipov (48 kg) kúmis medaldy enshiledi. Jartylaı fınalda Eýropa chempıony, reseılik Maksım Kýznesovty qapy qaldyrǵan Tımýr Qabdeshov (54 kg) fınalda ózbekstandyq Hýjanazar Nortojıevpen kúsh synasty. Ekinshi raýndta ol qarsylasyn nokdaýnǵa jiberdi. Biraq keıingi kezeńde qandasymyzdyń qabaǵy jaryldy. Sonyń saldarynan jekpe-jek merziminen buryn toqtatylyp, Tımýr kúmis medaldy qanaǵat tutty. Al jartylaı fınalda súringen Bekzat Tańatar (86 keli) qolaǵa qol sozdy.
Nátıjesinde, 3 altyn, 2 kúmis jáne 1 qola júldeni oljalaǵan Qazaqstannyń boksshylary jalpy esepte úshinshi oryndy ıelendi. Aldymyzda – О́zbekstan (5+6+5) men Ázerbaıjan (3+3+0) quramalary.
