Kól jaǵdaıyn retke keltirý úshin oblystyq tótenshe jaǵdaılar departamentiniń jeke quramy, áskerıler men eriktiler, aýyl turǵyndary judyryqtaı jumyla jumys istedi. Oqıǵa ornyna Almaty oblystyq tótenshe jaǵdaılar departamentiniń bastyǵy men óńir basshysy baryp, jaǵdaıdy jiti baqylaýda ustady.
Qoımadan aqqan sý Qaraoı aýyldyq okrýgindegi Amankeldi 1, Amankeldi 2 toǵandaryna quıylǵan. Sondyqtan qaýipsizdikti saqtaý maqsatynda aryqtar qazylyp, qoldan bógetter turǵyzyldy. Jaǵalaýyn nyǵaıtýǵa 300-den asa volonter atsalysty. Olardy jergilikti kásipkerler ystyq tamaqpen qamtamasyz etti.
«Qaýipke qarsy turǵan azamattardy ystyq tamaqpen qamtamasyz etý maqsatynda túnimen meshitte qazan kóterip, palaý pisirip, ystyq shaı tarattyq. Turǵyndar men tótenshelikter qoldan kelgen kómekterin aıamady», deıdi aýyl turǵyny Juldyzhan Jumahanqyzy.
«Jumyla kótergen júk jeńil» degendeı, aýyl halqy qıyn-qystaý shaqta ózderiniń birligin kórsete bildi. Eriktiler men uıymdar, sonyń ishinde «Jaqsylyq sáýlesi» jáne «Amelı qory», «Dám fabrıkasy» ystyq tamaq, azyq-túlikpen qamtamasyz etip, olardy taratýǵa kómektesti. Ásirese jastar belsendilik tanytty. Jedel qımyl men shtab jumysyn utymdy uıymdastyrý arqyly apatty jaǵdaıdyń beti tez qaıtaryldy. Almaty oblysynyń basshylyǵy sharanyń barlyq qatysýshysyna janashyrlyǵy men úılesimdi jumysy úshin alǵysyn bildirdi.
«Sý qoımasyndaǵy 700 myń tekshe metr sý kólemin eskere otyryp, turǵyn úı sektoryn sý basýǵa jol bermeý boıynsha jumystar júrgizildi. Jarmuhamet ózeniniń negizgi arnasy boıynsha sý aǵynyn «Amangeldi 1» jáne «Amangeldi 2» toǵandaryna, sodan keıin Qaskeleń ózeni arqyly Qapshaǵaı sý qoımasyna baǵyttaý úshin barlyq qajetti shara qabyldandy. Saldaryn jeńildetý úshin Qaraoı aýylyndaǵy Ýtıankı kólinen sý aǵyzyldy. Qazir sý qoımalary qalpyna keltirildi. Almaty oblysynyń sý aıdyndaryndaǵy jaǵdaı baqylaýda», deıdi oblys ákimi Marat Sultanǵazıev.
Tótenshe jaǵdaı barysynda barlyǵy 17 adam evakýasııalandy. Jumyldyrylǵan kúsh ózen aǵysyn kedergilerden tazartyp, Amangeldi toǵanynyń jaǵalaýyn nyǵaıtý jumystaryn júrgizdi. Bul sharalar turǵyndardy qorǵaýǵa jáne sý tasqynyna yqtımal apattardyń aldyn alýǵa baǵyttalǵan. Qorǵanys qurylystaryn nyǵaıtý jáne jaǵalaý boıynyń qaýipsizdigin qamtamasyz etý úshin tótenshelikterdiń 500-den asa qyzmetkeri tartylyp, 100 shaqty tehnıkasy iske qosylǵan. Shamamen 1 200 tonna ınertti materıal jetkizilgen, sondaı-aq sýdyń jaıylýyn aldyn alyp, tıimdi nyǵaıtý jáne qorǵaý úshin ınertti materıaly bar 4 myń qapshyq tóseldi. Bul týraly Almaty oblystyq TJD tótenshe jaǵdaılardy joıý basqarmasynyń bastyǵy Ersin Jaǵyparov málimdedi.
«Voroshılov» sý qoımasy 1910 jyly salynǵan. Syıymdylyǵy 1 mln tekshe metrden asady, tereńdigi – 10 metr. Bul nysan 2017 jyly senimgerlik basqarýǵa berilgen.
Búgingi tańda oblys aýmaǵyndaǵy sý tasqyny jaǵdaıy turaqty. 2022-2023 jyldar kezeńinde oblys aýmaǵyndaǵy anyqtalǵan 27 sý tasqynyna qaýipti ýchaskelerdiń jeteýi tolyǵymen joıylyp, búginde qalǵan 20 ýchaskeniń altaýynda sý tasqynyna qarsy jumys aılyǵy men jospary sheńberinde sý basý qaýpi barynsha tómendetildi. Onyń ishinde 6 aýdanda sý deńgeıiniń kóterilýi múmkin 5 ýchaske, erigen jáne jerasty sýlary qaýpi bar 6 ýchaske jáne gaztýrbınaly qondyrǵy apaty jaǵdaıynda 9 ýchaskeniń sý basýǵa beıim ekeni anyqtalǵan. Onyń 8-i – Qarasaı aýdanyna, altaýy Eńbekshiqazaq aýdanyna qarasty.
Jyl basynan bastap eldi mekenderden 3,7 myń tekshe metr qar shyǵarylyp, 264,5 shaqyrymdyq (442 birlik) aryq jelisi, 123,8 shaqyrym (99 birlik) kanal, avtojoldar astyndaǵy 139 birlik sý ótkizý qubyry, temirjol joldaryndaǵy 7 birlik sý ótkizý qubyry jáne 69,6 shaqyrym sý burý kanaldary tazartylǵan.
Almaty oblysy
