Uıymdastyrýshylar áýesqoı fotograftarǵa da, óz isiniń kásibı mamandaryna da birdeı shart qoıǵan. Ár qatysýshynyń 3 fotodan usyný múmkindigi boldy. Al saıys qorytyndysyna deıin onlaın formatta, eldiń barlyq óńirinen 500-ge jýyq jumys kelipti. Quramyna partııa basshylyǵy men tájirıbeli fotograftar engen qazylar alqasy týyndylardy taqyrypqa sáıkestigi, jumysty bere bilýdegi jańashyldyǵy, kóńil kúı jáne basqa da talaptar negizinde iriktegen. Sonymen qatar qazylar «Áleýmettik jelidegi júldeger» sııaqty arnaıy syılyq taǵaıyndaý jóninde sheshim qabyldap, irikteý partııanyń Telegram kanalynda ashyq daýys berý arqyly júrgizilipti. Munan ózge eńbek adamynyń qoǵamdaǵy mártebesin kóterý maqsatynda taǵaıyndalǵan «Aýyl eńbekkeriniń beınesi» arnaıy syılyǵynyń ıesi de kelgen fotolar arasynan tańdap alyndy.
Is-sharaǵa Májilis depýtattary, Aýyl sharýashylyǵy mınıstrliginiń, Astana qalasy Mádenıet basqarmasynyń basshylyǵy, dıplomatııalyq mıssııa ókilderi, joǵary oqý oryndarynyń professorlyq-oqytýshylyq quramy, shyǵarmashyl zııaly qaýym men jastar qatysty.
«Fotosýret arqyly biz ádettegi dúnıelerdi jańa prızma arqyly kórý múmkindigin aldyq. Qyzyǵy men qıyndyǵy qatar júretin aýyl turǵyndarynyń tirshiligin sol qalpynda kórsete bilgen ár qatysýshyǵa alǵys bildiremiz. Jyl sanap baıqaýǵa qatysýshylar sany artyp keledi. Bıyl 122 adam qatysyp, baıqaýǵa 500-ge tarta týyndy usynyldy. Bul óz kezeginde fotografııa óneriniń áýesqoılary men kásipqoılary arasynda atalǵan konkýrstyń mańyzdylyǵyn kórsetedi», dedi saltanatty sharany ashqan «Aýyl» partııasy tóraǵasynyń birinshi orynbasary Tóleýtaı Rahymbekov.
Baıqaý qorytyndysynda sóz alǵan halyqaralyq «National Geografic» jýrnalynyń jaýapty redaktory Aıbyn Shaǵalaq peızaj, reportajdyq túsirilim, derekti fotografııa, portretıstıkamen aınalysatyn fotograftar úshin aýyl taqyrybynyń qyzyqty ekenin aıtyp, osy ónerge shyn berilgen adamdardy qoldaǵany úshin «Aýyl» partııasyna alǵys bildirdi.
Baıqaý nátıjesinde I oryndy Serik Maıemerov (Mańǵystaý oblysy) jeńip alsa, II oryndy Nurbolat Nurjaýbaı (Qyzylorda oblysy), III oryndy Bereke Seıtjappar (Shymkent qalasy) ıelendi. «Aýyl eńbekkeriniń beınesi» syılyǵy «Egemen Qazaqstan» gazetiniń fototilshisi Erlan Omarovqa (Astana qalasy), «Áleýmettik jelidegi júldeger» syılyǵy Jazıra Qarymsaqovaǵa (Abaı oblysy) tabystaldy.
«Barlyq berekeniń bastaýy – aýyl. Sondyqtan aýyl naqyshtaryn dəripteıtin mundaı bastamalardy erekshe qoldaımyn. Birge atsalysýǵa tyrysamyz. Aýlymyz kɵrkeıe bersin», deıdi júldeger Nurbolat Nurjaýbaı.
Marapattaý rásiminen soń, saýda oıyn-saýyq ortalyǵy foıesinde «Aýyl naqyshtary» fotokórmesi ashyldy. Munda aýyl beınesin bederlegen 50 fotony Astana turǵyndary men qonaqtary tamashalady.
