AITAS holdıngi taldaý ortalyǵynyń zertteýine sáıkes, qańtar-aqpan aılarynda Aqmola oblysynda eń kóp qus eti óndirildi – 14,3 myń tonna, onyń 13,9 myń tonnasy – taýyq eti Makınsk qus fabrıkasynyń ónimine tıesili. Kóshbasshylar úshtigine Almaty oblysy (18,5 myń tonna) jáne Shyǵys Qazaqstan oblysy (О́skemen qus fabrıkasy óndiretin 10,3 myń tonna qus eti) kiredi.
Taýyq etiniń eń kóp tutynylýy Almaty qalasy men Túrkistan, Almaty oblystarynda, eń azy Ulytaý jáne Soltústik Qazaqstan oblystarynda baıqaldy. Eń qymbat taýyq eti Mańǵystaý oblysynda jáne Astana men Almaty qalalarynda tirkelgen. Aqtóbe, Almaty jáne Abaı oblysynda taýyq eti eń tómengi baǵada satylady. Sarapshylardyń pikirinshe, qus etiniń maksımaldy quny mınımým qunynan 41%-ǵa asyp túsedi.
«2024 jyldyń qańtar jáne aqpan aılarynda Qazaqstanda ettiń kóterme saýda baǵasy tómendeý úrdisin kórsetti. Negizgi faktorlardyń biri – eldegi taýyq eti óndirisiniń ulǵaıýy jáne jem komponentteri baǵasynyń tómendeýi. Baǵalarǵa qosymsha qysym Reseıden ımporttyń ósýi boldy, onda broıler taýyqtary etiniń baǵasy tómendeýi baıqaldy», dep atap ótti Aqparattyq-taldaý bóliminiń mamany Aıjan Tolyqbekova.
Bólshek saýda baǵasy qańtar men aqpanda shamaly ósýdi kórsetken. Sarapshylardyń pikirinshe, saýda jelileri men bólshek saýda dúkenderi etti kóterme saýda baǵasymen satyp ala otyryp, túpkilikti tutynýshylarǵa ústeme baǵamen satýdy jalǵastyryp jatyr. Al ımporttyq ónimder elimizge negizinen Reseıden (4,7 myń tonnadan astam), Ýkraınadan (9 myń tonna), Belarýs elinen (224 tonna) jetkiziledi. Al otandyq taýyq eti Reseı men Qyrǵyzstanǵa eksporttalady. 2024 jyldyń qańtarynda elimiz 3,7 myń tonna qus etin eksporttady. Sarapshylardyń pikirinshe, osy jyldyń qańtar aıyndaǵy eksporttyq jetkizilimder byltyrǵy osy kezeńdegi kórsetkishten 2,2 ese artyq.
AITAS holdınginiń taldaý ortalyǵy mamandarynyń aıtýynsha, saýdadaǵy qıyndyqtar, sonyń ishinde Reseıdiń AQSh-tan qus etiniń tranzıtine yqtımal tyıym salýy jáne Reseıdegi azyq-túlik baǵasynyń kútiletin ósýi ımport shyǵyndaryn arttyrady jáne bizdegi baǵaǵa qosymsha qysym jasaıdy. Elimizde 2024-2025 jyldarǵa ınflıasııanyń boljamdy deńgeıi ómir súrý quny men óndiristik shyǵyndardyń jalpy ósýi aıasynda baǵanyń ósýin boljaıdy. Jıyntyǵynda bul faktorlar jaqyn arada ishki naryqta taýyq etiniń qunyn arttyrý úshin alǵysharttar qalyptastyrady.