Foto: Polisia.kz
Jambyl oblysynda ornalasqan sharýa qojalyǵynyń aýmaǵynda 40 000 dozadan asatyn marıhýana esirtki zaty tárkilendi.
Esirtki zattaryn asa iri mólsherde saqtady degen kúdikpen Pavlodar oblysynyń 47 jastaǵy turǵyny ustaldy. Er adam Merki aýdanynda malshy bolyp jumys isteıdi. Kúdiktiniń aıtýynsha, ol jabaıy qarasorany taýyp, ony jınap, keptirip, ózi tutyný úshin saqtaǵan.
Izdeý barysynda kúdiktiniń kúrteshesine jasyrylǵan marıhýana oramasy tabyldy. Tárkilengen zattyń qomaqty bóligi jaqyn mańdaǵy mal fermasynda saqtalǵan. Odan bólek sharýa qojalyǵynyń aýmaǵyndaǵy qoradan 3 polıetılen paket jasyrylǵan oryn tabyldy. Onda jabaıy qarasoranyń sabaqtary bolǵan.
«Sonymen qatar esirtki shegýge arnalǵan plastıkalyq bótelke tabyldy. Kúdikti marıhýanany qysta ózi tutyný úshin daıyndaǵanyn moıyndady. Polıseıler barlyǵy 40 keli 240 gr keptirilgen marıhýana esirtki zatyn tárkiledi. Ustalǵan adam urlyq jasaǵany úshin buryn sotty bolǵan. Ol óz kinásin moıyndady», deıdi PD esirtki qylmysyna qarsy is-qımyl basqarmasynyń bastyǵy Álim Bajyqbaev.
