Foto: ntime.kz
10 kún ishinde izdeýde júrgen 71 adam ustalyp, belgilengen turǵylyqty jerine kelmegen 24 sottalǵan azamat anyqtaldy. Arnaıy qabyldaý-taratý ornyna 661 adam ornalastyryldy. Olardyń arasynda belgili bir turǵylyqty jeri joq adamdar, qujattary joq sheteldikter bar.
Reıdtik is-sharalar barysynda tyıym salynǵan zattardy zańsyz saqtaý men alyp júrýdiń 362 faktisi anyqtalyp, 92 kg esirtki, 35 atys qarýy jáne 161 sýyq qarý tárkilendi.
– Jol qozǵalysyn qadaǵalaý kezinde jyldamdyq rejımin saqtamaýdyń 22 myń faktisi, qarsy jolaqqa shyǵýdyń 337 faktisi tirkeldi. Avtokólikti mas kúıde basqarǵan 437 júrgizýshi ustaldy. Júrgizýshi kýáliginen aıyrylsa da, kólik tizgindegen 267 adam anyqtaldy, – dedi departament bastyǵy – IIM resmı ókili Shyńǵys Alekeshev.
Beınebaqylaý kameralarynyń kómegimen 125 qylmys ashyldy.
– Kóshi-qon zańnamasynyń saqtalýyna baqylaý kúsheıtildi. 29 myń jaldamaly páter, polısııa esebinde turǵan, shartty túrde sottalǵan 74 myń adam tekserildi. Ákimshilik qadaǵalaýdy buzýdyń 90 faktisi anyqtaldy. Quqyq buzýshylyqqa qaıta jol bergender qamaýǵa alyndy. Qorǵaý nusqamasyna qaramastan otbasynda zorlyq-zombylyq jasaǵan 337 agressor qamaýǵa alyndy, – dedi spıker.
«Quqyqtyq tártip» is-sharasy kezinde 61 myńnan astam quqyq buzýshylyq anyqtaldy. Qoǵamdyq tártipti buzǵan 18 myń adam jaýapqa tartyldy. Ýaqytsha beıimdeý ortalyqtary men medısınalyq aıyqtyrǵyshtarǵa 5 myń adam jetkizildi. Kóshede jáne oıyn-saýyq oryndarynda zańdy ókilderinsiz túngi ýaqytta bolǵan 7 myńǵa jýyq kámeletke tolmaǵan bala anyqtaldy.
Temeki ónimderin zańsyz taratý faktilerin anyqtaý boıynsha reıdter júrgizildi. Jekelegen qoǵamdyq oryndarda temeki ónimderin tutynýdyń 1,5 myń faktisi toqtatyldy. Kámeletke tolmaǵandarǵa temeki ónimderin satýdyń 174 faktisi anyqtaldy. 21 jasqa tolmaǵan adamdarǵa temeki ónimderin satqan 186 kásipker jaýapqa tartyldy. Shegilmeıtin temeki ónimderin satý men taratýdyń 1,5 myńnan astam faktisi tirkeldi. Shegilmeıtin temeki ónimderin óndirgen jasyryn eki seh anyqtaldy.
