Memlekettik keńesshi sý tasqynyna qatysty qazirgi ahýal týraly aqparat taratý úshin Ortalyq kommýnıkasııalar qyzmetinde Respýblıkalyq aqparattyq shtab qurylǵanyn, shtabtyń BAQ ókilderin quzyrly organdardan túsken málimetpen táýlik boıy qamtamasyz etetinin habarlady.
«6 sáýirden bastap Tótenshe jaǵdaılar, Qorǵanys, Ishki ister mınıstrlikteri, Kazgıdromet jáne basqa da mekeme ókilderiniń qatysýymen qosymsha onlaın brıfıngter uıymdastyrylady. Tótenshe jaǵdaı jarııalanǵan 10 aımaqtan jergilikti shtabtarmen onlaın brıfıngter josparlanyp otyr. «24kz» telearnasynyń efırlik ýaqyty Respýblıkalyq aqparattyq shtabtyń jumysymen úılestirilip, brıfıngterden tikeleı habar taratylady. Budan bólek, telearnadaǵy jańalyqtardyń efırge shyǵý jıiligi artyp, sý tasqynymen kúresý jáne onyń saldaryn joıý, qutqarý qyzmetteriniń, volonterlik uıymdardyń jáne basqa da azamattardyń birlesken jumysy, zardap shekken aımaqtarǵa gýmanıtarlyq kómek jınap jetkizý barysy týraly turaqty aqparat beriletin bolady», deıdi Memlekettik keńesshi.
«Sondaı-aq qoǵam belsendileri, volonterler jáne qarapaıym azamattar zardap shekken jandardy qaýipsiz aımaqqa kóshirýge, gýmanıtarlyq kómekti jınaýǵa jáne jetkizýge, turǵyndarǵa aqparat taratýǵa qatysty birlesken jumysta mańyzdy ról atqaryp otyr. Búginde sý tasqynyna qarsy kúreske barlyǵy 20 myńnan astam volonter jumyldyrylǵan. Olardyń basym kópshiligi Aqtóbe, Qostanaı, Batys Qazaqstan, Abaı, Aqmola jáne ózge de oblystardaǵy tótenshe jaǵdaılar departamentiniń qyzmetkerlerine barynsha járdemdesip jatyr.
Qazaqstan halqynyń Assambleıasy tarapynan da aıtarlyqtaı kómek kórsetilip otyr. Jalpy respýblıka boıynsha qıyn-qystaý jaǵdaıǵa tap bolǵan jandarǵa qoldaý kórsetýge jáne qarǵyn sý saldaryn joıýǵa Assambleıanyń 9 myńnan astam volonteri atsalysyp júr. Barlyq aımaqtaǵy Dostyq úıinde eriktiler ortalyǵy jáne gýmanıtarlyq kómekti qabyldaý oryndary uıymdastyryldy. Etnomádenı birlestikterdiń ókilderi zardap shekken adamdardy azyq-túlikpen, ystyq tamaqpen, kıim-keshekpen, qajetti zattarmen jáne tehnıkamen qamtamasyz etip otyr. Qazirgi tańda Assambleıa tarapynan berilgen qaıyrymdylyq jáne gýmanıtarlyq kómektiń kólemi 110 mıllıon teńgeden asty. Elimizdegi volonterlik uıymdardyń jumysyn úılestirý – mańyzdy mindettiń biri. Muny «Amanat» partııasynyń «Jastar rýhy» jastar qanaty óz moınyna aldy. Aýqymdy fılıaldar jelisi jáne memlekettik organdarmen jumys isteý tájirıbesi bar «Jastar rýhy» erikti qutqarýshylardy jınaý, gýmanıtarlyq kómekti suryptaý jáne jetkizý jumysyn tıimdi atqaryp otyr. Búgin birqatar iri volonterlik birlestiktiń ókilderimen kezdestik. Kúndelikti uıymdastyrý máselelerin talqylap, buryn-sońdy bolmaǵan sý tasqynynyń saldaryn joıý úshin birlese jumys júrgize berýge ýaǵdalastyq», dep jazdy Erlan Qarın.
