Qor tabıǵı apattan eń kóp zardap shekken óńirlerge – 15 mlrd teńge kóleminde materıaldyq kómek kórsetedi, dep atap ótti Nurlan Jaqypov. Qordyń korporatıvtik ortalyǵy, «QazMunaıGaz», «Qazatomprom», QTJ, «QazaqGaz», «KEGOC», «Qazaqtelekom», «Air Astana», «Samuryq-Energo» kómek kórsetip jatyr. Qarajat qaıyrymdylyq qyzmetiniń biryńǵaı operatory «Samruk-Kazyna Trust» arqyly baǵyttalady.
«Qazirgideı qıyn jaǵdaıda qyzmetkerlerdiń qaýipsizdigin, tıisti qural-jabdyqtarmen qamtamasyz etý – portfeldik kompanııalardyń aldynda turǵan basym mindetterdiń biri. Syn saǵatta kúshimizdi biriktirip, tótenshe jaǵdaıǵa qarsy kúresý jumystaryn jandandyrýymyz kerek. Osy baǵyttaǵy tasqyn sýdyń aldyn alý jumystaryn, sondaı-aq zardap shekken óndiristik nysandardyń jumysyn shtattyq rejimge keltirý sharalaryn jalǵastyrý qajet», dedi Nurlan Jaqypov.
«QazMunaıGaz» basqarma tóraǵasy Maǵzum Myrzaǵalıevtiń aıtýynsha, QMG kompanııalar tobynan sý tasqynyna qarsy sharalarǵa 540 qyzmetker jumyldyrylǵan, 160-tan asa tehnıka men qural-jabdyq, sondaı-aq 80 tonna dızel, 22 tonna benzın bólingen.
«Qazaqstan temir joly» AQ-da sýǵa tótep beretin 45 poıyz quryldy. Tasqyn sýdan zardap shekken barlyq óńirde sý aıdaıtyn 47 órt sóndirý poıyzy kezekshilik etip jatyr», deıdi QTJ basshysy Nurlan Saýranbaev.
Sondaı-aq temirjol transporty azamattardy evakýasııalaýǵa tartylǵan. 9 cáýirdegi jaǵdaı boıynsha QTJ qarajaty esebinen Atyraý oblysynda 5,5 myńǵa jýyq azamat tasymaldandy.
«QazaqGaz»-da apattyq-qutqarý jáne sý tasqynyna qarsy jumystarǵa 750 adam jumyldyrylǵan. Sý tasqyny zardaptaryn joıý jumystaryna 135 birlik tehnıka bólinip, sý basqan óńirlerde eriktiler toby quryldy.
«KEGOC» AQ elektr jetkizý jelilerin, ǵımarattar men qurylystardy aǵyn sýdan qorǵaý sharalaryn qabyldady, sondaı-aq sý basýy yqtımal áýe jelileri jáne elektr jelilerinde apattyq-qalpyna keltirý jumystaryn júrgizý úshin brıgadalar uıymdastyryldy», dep atap ótti Nábı Aıtjanov.
«Qazaqtelekom» AQ-da telekommýnıkasııa quraldarynyń úzdiksiz jumysyn qamtamasyz etý úshin kompanııanyń tehnıkalyq blogi jedel shtabtar qurdy. Bólimsheler arasynda baılanys ortalyqtary uıymdastyrylyp, apattyq-qalpyna keltirý komandalary quryldy. Qyzmetkerler sý tasqyny saldarynan zaqymdalǵan jabdyqtardyń aqaýlaryn tez arada joıyp jatyr.
Qor tobynyń qyzmetkerleri zardap shekken otbasylarǵa azyq-túlik, turmystyq zattar jınaıdy, basqa da kómek kórsetedi.
Nurlan Jaqypov sý tasqyny kezindegi ahýaldy táýligine birneshe ret habarlap otyrýdy jáne tótenshe jaǵdaıdy baqylaýda ustaýdy tapsyrdy. Sonymen qatar apat zardaptaryn joıýǵa qatysqan barlyq top qyzmetkerine alǵysyn bildirdi.
