Sýretti túsirgen – Erlan OMAR, «EQ»
2023 jyly elge 1 mln 084,8 myń sheteldik týrıst saıahattap kelgen. Bul kórsetkish 2022 jylǵy nátıjemen salystyrǵanda 17%-ǵa ósken. Al ishki týrıster sany 2022 jyldyń sáıkes kezeńimen salystyrǵanda 647,5 myńǵa artyp, 7 mln 54,5 myń adamǵa jetti.
Bıyl – Qytaıda Qazaqstannyń týrızm jyly. Jýyrda eki el arasyndaǵy baılanysty bekemdeý baǵytynda týrıstik hám ınvestısııalyq forým ótip, osy óristi órkendetý jaıy talqylandy. Qazaqstanǵa jyl saıyn kórshi elden aǵylatyn týrısterdiń qatary artyp keledi. Byltyr Qytaıdan Qazaqstanǵa 220 myńnan asa týrıst kelgen, bıyl bul kórsetkish 300 myńnan asýy bek múmkin.
Kórshi elden kerýen tartqan týrısterdiń kóz toqtatyp, aıaldaıtyn mekenniń biri hám biregeıi – Sharyn shatqaly. Kelgen qonaqty tarıhy mıllıon jyldyń qoınaýynda jatqan Sharynnyń shatqalyna búkken qupııasy, jaqparyna jasyrǵan syry tańdandyrary sózsiz. Toryaıǵyr taýynyń silemin súıe aqqan Sharyn ózeniniń jaǵalaýynda jaılylyq ornatyp, qonaqtyń talǵamyna tatıtyn qyzmet kórsetý jolynda atqarar sharýa áli kóp.
«Sharyn» ulttyq tabıǵı parkiniń dırektory Gúlmıra Nysanbaeva álemde AQSh pen Qazaqstanda ǵana bar shatqaldy tamashalaýshy týrısterdiń qatary artyp kele jatqanyn maqtanyshpen jetkizdi. Dese de el ekonomıkasynyń yrysyn arttyrýdaǵy basym baǵyttyń biri týrızmdi damytý úshin, erekshe qorǵalatyn tabıǵı aýmaqqa kelip-ketýshilerge kórsetetin aqyly qyzmettiń sapasyn, jabdyqtaý deńgeıin, servısin túbegeıli jańartyp jańǵyrtýǵa qomaqty qarjy kerek. Máseleni ońtaıly sheshý maqsatynda erekshe qorǵalatyn tabıǵı aýmaqta jobalaý uıymdarynyń jetekshiligimen ınfraqurylymdy damytýdyń bas jospary jasalǵan. Bul josparda memlekettik qarjylandyrýdan bólek merdigerlik qarjy salymyn talap etetin maýsymdyq jáne ornyqty týrıstik-rekreasııalyq maqsattaǵy ǵımarattar men qurylystar salý kózdelip otyr.
Park aýmaǵynda negizgi tarıhı-mádenı jáne tabıǵı muralarynyń nysandary kóz tartarlyq. Kelýshilerdi de tabıǵattyń osy kórinisi qyzyqtyrady. Sharyn shatqalynda «Qamaldar ańǵary» jáne «Sharyn eren toǵaıy» tabıǵat eskertkishi men «Beıitter men qorǵandar», «Temirlik-Kishi shatqal» týrıstik baǵyttary bar. 2022 jylǵy esep boıynsha 54 629 demalýshy kelgeni tirkelse, 2023 jyly Sharyn shatqalyn tamashalaǵan týrıster qatary 131 264 adamǵa jetip, ótken jylmen salystyrǵanda 2,5 ese artqan.
«2021 jyly Infraqurylymdy damytýdyń Bas josparyna túzetýler engizildi. Úkimettiń 2006 jylǵy 7 qarashadaǵy №1063 qaýlysyna sáıkes jer telimderin berýge tender ótkizildi. 2021 jylǵy 4 naýryzda №1 lot boıynsha jalǵyz qatysýshy jáne memlekettik satyp alýdyń jeńimpazy bolyp «Qazaq Geography» respýblıkalyq qoǵamdyq birlestigi tanyldy. Kelisimshart negizinde týrısterge qyzmet kórsetýge arnalǵan nysandar, atap aıtqanda, eki vızıt-ortalyq, qonaqúı, meıramhana, tamaqtaný pýnktteri, glempıng, kempıng, qazaq aýyly, balalar alańy, avtokerýen, jataqhana, taǵy basqa da demalýshylarǵa arnalǵan jalpy 13 nysan josparlandy. Qurylys jumystaryn bastamas buryn kommýnıkasııany júrgizý qajettiligi týyndady. Osyǵan baılanysty «Sharyn shatqaly qamaldar men ańǵary» týrıstik marshrýtyna elektr jelileri júrgizildi. Infraqurylym nysandaryn salýdyń qorshaǵan ortaǵa áserin aldyn ala baǵalaý boıynsha ótken qoǵamdyq tyńdaýdyń oń nátıjelerinen keıin atalǵan qurylys jumystary bastaldy. Qazir vızıt ortalyǵy, glempıngter, qazaq aýyly, jyljymaly tamaqtaný pýnkti, meıramhana ornatylyp, týrısterdi qabyldaýǵa tolyq múmkindigi bar. Sonymen qatar týrıstik baǵyttarda abattandyrý jumystary barysynda demalýshylardyń qolaılylyǵyn arttyrý maqsatynda sý burqaqtary, grot, jańa tehnologııadaǵy ekodárethana, týrıstik baǵyttarǵa belgiler men birneshe stella ornatyldy. Aýyzsý máselesin sheshý maqsatynda demeýshilerdiń kómegimen kelissózder júrgizilip, jerdi anyqtaý jumystary qolǵa alyndy», dedi G.Nysanbaeva.
Bıyl «Sharyn» memlekettik ulttyq tabıǵı parkine 20 jyl toldy. Ekotýrızmdi óristetý jolynda atqarar sharýa áli de shashetekten. Birer jyl buryn Sharyn shatqalynyń ańǵarynda týrıster úshin aspaly jol salynatyn biregeı joba iske qosylady dep alaqaıladyq. Áıgili joba ázirge qaǵazǵa qattaýly kúıi tur. Buǵan aldaǵy ýaqytta arnaıy toqtalamyz.
Týrızm jáne sport vıse-mınıstri Erjan Erkinbaev Qazaqstanǵa qyzyǵýshy týrısterdiń shoǵyry qalyń ekenin, tabıǵatymyzdyń tamashasyn tartý etý jolynda keshendi jumystar kezeń-kezeńimen júzege asatynyn aıtty. Árıne, AQSh-taǵy Grand-kanondaǵydaı ınfraqurylymdy óristetý júzege assa, jaqpary tunǵan jaqut Sharyn shatqalynyń da shalqıtyn shaǵyn kórgimiz keledi. Bul úshin sózden iske kóshetin kez áldeqashan jetti.
