Tumsa tabıǵaty talaılardy tamsantqan Túrgen shatqalynda ornalasqan «Taý-Jańashar» jekemenshik balalardy saýyqtyrý ortalyǵyna baryp, ondaǵy oqýshylardyń jaı-kúıimen tanysyp qaıttyq.
«Bul lagerge Oral qalasynan jáne Batys Qazaqstan oblysynyń Syrym, Bórli aýdandarynan 6 men 9-synyp aralyǵyndaǵy oqýshylardy alyp keldik. Aýyldardy sý basqanda olar evakýasııalyq beketter men týys-týǵandardyń úılerin panalaǵan edi. Balalarǵa bul jerdiń keremet tabıǵaty unap jatyr. Alǵashqy kúnnen bastap jaılylyq pen júrek jylýyn sezindik», deıdi jetekshileri Arýjan Bolatova.
«Taý-Jańashar» jekemenshik balalardy saýyqtyrý ortalyǵyna ornalasqan balalar, eń aldymen, jyly da jaıly jatyn oryndarmen qamtamasyz etilgen. Atalǵan ortalyqtyń óziniń jekemenshik fermerlik sharýashylyǵy bolǵandyqtan, taza ári tabıǵı et-sút, nan ónimderi ázirlenip, balalarǵa bes mezgil tamaq beriledi. Ortalyq dırektory oqýshylardyń bos ýaqytyn tıimdi ótkizý úshin kásibı deńgeıde úıirmeler men oıyndar uıymdastyrý josparlanǵanyn aıtty.
«Eńbekshiqazaq aýdanynyń ózi tunyp turǵan tarıhqa baı ólke, sondyqtan balalarǵa ólketaný ekskýrsııasyn uıymdastyryp, «Altyn adam» mýzeıi men «Aıýly» sarqyramasyn kórsetý oıymyzda bar. Buǵan qosa demeýshilerdiń kómegimen Almaty qalasynyń kórikti jerlerin kórsetýge kúsh salamyz. Sóıtip, aýyldaryn sý basyp, qıyndyq kórgen balalardyń az ýaqyt ishinde kóp nárseni kórip, kóńilin kóterip, oqýyn jalǵastyrýyna, eń bastysy, qıyn sátte qamqor bolar el-jurt baryn sezinip qaıtýyna barynsha tyrysyp jatyrmyz. Ortalyqqa kelgen sátten bastap, kıim-keshek, oqý quraldary, kerek-jaraqtarymen tolyq qamtamasyz etildi. Munda demalýshy balalar qashyqtan oqytý júıesine kóshken. Sol sebepti oqýlyqpen tolyqtaı qamtyldy. Internet baılanysyndaǵy qıyndyqtar da kúrmeýin sheshýge taıaý. Bul oraıda aýdandyq bilim bólimi men ákimdikter, qaıyrymdy azamattar aıanbaı atsalysyp jatyr», dedi «Taý-Jańashar» jekemenshik balalardy saýyqtyrý ortalyǵynyń dırektory Mıra Qudabaeva.
Ortalyqta demalýshy balalalarǵa 8 pedagogıkalyq tálimger men psıholog jáne aýdandyq aýrýhanadan bilikti meıirbıkeler bólinip, balalardyń densaýlyǵy men qaýipsizdigin jiti qadaǵalap otyr. Al as mázirin daıarlaýda besaspap aspazdar qyzmet kórsetedi. Ortalyqtyń aspazdary tamaq mázirin jasaýda qaı óńirdiń balalary neni qalaıtynyn zerttep-zerdelep, qalaýyna qaraı as ázirleýge ábden tóselip alǵanyn maqtan etti. Sondyqtan alystan at arytyp jetken balalardyń qalaýyn eskerip, tipten, týǵan kúnderin de atap, úıdegideı kóńil-kúı syılaýǵa tyrysyp jatyr.
«13 jyldyq tájirıbesi bar «Taý-Jańashar» lageri «Artek» baǵdarlamasy men dástúrli baǵdarlamany elimiz balalarynyń mentalıtetine sáıkestendirilip, beıimdelgen baǵdarlamamen jumys isteıdi. Jekemenshik bolǵanmen úlken pedagogıkalyq júıesi, ádistemelik korpýsy bar lager. Mundaǵy tálimgerlerdiń deni kolledjder men ınstıtýttardan alynady. Olardyń bilimin jetildirýge kóńil bólinedi. Bizdiń ujym shetelderde ótip jatqan lager júıesindegi is-sharalardan shet qalmaıdy», dedi Mıra Erlanqyzy.
Tabıǵaty kórkem jerge ornalasqan «Taý-Jańashar» jekemenshik balalar lageri qaıyrymdylyq jasaýda aldyńǵy orynda desek, asyra aıtqandyq emes. Buǵan deıin de Arys qalasyndaǵy jarylystan japa shekken 150 balany 20 kúnge qabyldasa, byltyrǵy qysta Ekibastuz qalasynan kelgen 35 balanyń alańsyz tynyǵyp qaıtýyna bar jaǵdaıdy jumyldyrǵan. Buǵan qosa jyl saıyn jazǵy maýsymda bir aýysymǵa keletin 280 balanyń 10-15 paıyzyna jeńildik jasaý dástúrge aınalǵan.
«Lager júıesi – adamǵa rýhanı tárbıe beretin oryn. Munda bala tynyǵyp, saýyǵýmen qatar, tildik qarym-qatynasta bolady. Bes-on kún bolsa da jańa ortada ómir súrýi – balanyń ıntellektýaldyq, fızıologııalyq, psıhoemosıonaldyq jaǵdaıyn jaqsartýǵa jáne til tabysý qabiletteriniń tabıǵı jolmen damýyna úlken úles qosatyn aımaq sanalady. Dese de, aýyldaryn sý basyp, ata-analary men aǵaıyn-týystary qıyndyqqa tap bolǵanyn kórgen balalardyń kóńili bútin deý qıyn. Balalardyń qansha jerden kóńilin aýlaǵanmen, lúpildegen júrek túkpirinde kóńilsizdik qylań berip, alańdaýshylyq bary bilinip turady», deıdi bala baǵbanyna aınalǵan M.Qudabaeva.
Almaty oblysy
