Foto: azh.kz
Oblys ákiminiń orynbasary Jasulan Bısembıevtiń aıtýynsha, Inder, Mahambet aýdandary men Atyraý qalasynyń mańyndaǵy Bereke, Almaly, Besikti aýyldaryn tasqyn sý basý qaýpi tónýi múmkin. Sol sebepten bastapqyda Jaıyq ózeniniń munaıly shahardaǵy 105 shaqyrym jaǵalaýyna bógeti salý kózdelgen. Keıin bógettiń uzyndyǵy 215,1 shaqyrymǵa ulǵaıǵan. Máselen, 13 sáýirge deıin 101,2 shaqyrym bógeti salyndy. Atyraý qalasyndaǵy bul jumysqa mekemelerdiń 3,2 myń qyzmetkeri, 3,5 myńnan asa erikti, 1 myńǵa jýyq arnaıy tehnıka tartyldy.
«Basty maqsatymyz – tasqyn sýdyń eldi mekenderge kirýine jol bermeý. Degenmen Atyraý qalasynyń soltústigindegi eldi mekenderge sý basý qaýpi bar. Sondyqtan osyndaı aýyldardyń mańynda ekiqatarly qorǵaý bógeti salynyp jatyr», dep málim etti J.Bısembıev.
Bóget tek Jaıyq ózeniniń jaǵalaýynda salynyp jatqan joq. Máselen, Qaraózek kanalynyń jaǵalaýyn bekitýdi jergilikti tórt kompanııa qolǵa aldy. Atyraý – Oral tasjolynan bastalyp, Erkinqala aýyldyq okrýgine deıin sozylatyn bógettiń uzyndyǵy 35 shaqyrymnan asady. Bógettiń bıiktigi 2 metrge kóteriledi. Árıne, ońaı jumys emes. Sol sebepten oǵan tórt kompanııadan 350 adam, 80-ge jýyq jergilikti turǵyn men erikti, 70-ten asa arnaıy tehnıka tartyldy.
Bóget salýshylar arasynda ár býynnyń ókilderi men áskerıler bar. Tipti kishkentaı balalarǵa deıin kómektesip júr. Sondaı balalar týraly vıdeo áleýmettik jelide tarady. Vıdeoda 5 jasar Aldııar kúrekpen qapqa topyraq salyp tur. Al 9 jastaǵy Ámına qapty ashyp otyr. Olardyń janynda taǵy birneshe bala júr. Bári de Atyraý qalasyndaǵy «Avangard» shaǵyn aýdanynda turady. «Tasqyn sý kelmese eken», deıdi balalar.
Atyraýǵa kómekke kelgenderdiń sanynda shek joq. Bul úrdis áleýmettik jelide tarıh bolyp qattalyp jatqan da shyǵar. Máselen, «Nomad» komandasynyń kaskaderleri shahar mańyndaǵy aýyldyń jaǵalaýyn bekitip júr.
«Taý bop úıilgen topyraqty endi ǵana qaptap bola bergen edik, taǵy bir «KamAZ» topyraq tógip ketti. Biz qaptardy jaǵaǵa tósep júrmiz. Kaskaderler baryn salyp jatyr», deıdi akter Sanjar Mádı.
Atyraý oblysy
