Bul saıysqa Indonezııa, Kýveıt, Qyrǵyzstan, Qytaı, Mońǵolııa, Oman, О́zbekstan, Pákstan, Reseı, Saýd Arabııasy, Sırııa, Taıland, Qazaqstan qatarly 30 eldiń 60-tan asa mergeni «Majar», «Azııa», «Túrki» stılmen saıysqa túsedi.
Atalǵan memleket ókilderiniń qatysýymen tarıhta tuńǵysh ret qazaqtyń tól óneri «Jamby atý» stılinen Azııa qurlyq federasııasy qurylyp, basshylyǵyna otandyq bıznesmen Erkebulan Ilııasov saılandy. Bolashaqta federasııanyń keńsesi Qazaqstanda ornalasatyndyqtan jıynǵa qatysýshy ókilder osy mekemeniń atqarýshy dırektory retinde usynylǵan Elnur Isaquldyń kandıdatýrasyn bekitti.
Sondaı-aq jańadan qurylǵan federasııanyń vıse-prezıdenti bolyp qytaı eliniń ókili Djang Lı myrza saılansa, tóreshilerge tóraǵalyq etý mindeti Ońtústik Afrıka eliniń azamaty Amalı Rachkege júkteldi.
Basqosý barysynda Qazaqstan jamby atý federasııasynyń vıse-prezıdenti Baqdáýlet Sábıtov jınalǵan kópshilikke Azııa jamby atý federasııasynyń aldaǵy besjyldyq jumys josparymen tanystyryp, uıym quramyna engen elderge jamby atý sporty boıynsha bolashaqta qoldaýlar bolatynyn jetkizdi.
«Búgin biz tarıh betinde iz qaldyratyn erekshe oqıǵaǵa kýá bolyp otyrmyz. At ústinde sadaq atýdan Azııa federasııasynyń basty maqsaty – qazaqtyń mergendik óneri «Jamby atý» stılin 2030 jyly Dohada ótetin jazǵy Azııa oıyndaryna engizý. Osy maqsatta Qazaqstan tarapy federasııaǵa múshe memleketterdiń mergenderin qoldaýǵa daıyn. Sonyń bir dáleli – aldaǵy tórt jylda federasııaǵa múshe memleketterge eshqandaı jarna tóletpeıdi jáne qarjylyq kómek kórsetedi», dedi Baqdáýlet Maratuly.
Jıynda federasııaǵa jańadan múshe bolǵan memleket ókilderi saýaldaryn qoıyp, tushymdy jaýap aldy. Buıyrsa, aldaǵy ýaqytta jamby atýdan jyl saıyn dástúrli túrde Azııa chempıonaty, Azııa kýbogi jáne halyqaralyq týrnırler ótkizip turýǵa toqaılasty.
Shymkent
