Foto: Kazinform
Senator jazbasynda búginge deıin qyz-kelinshekter arasyndaǵy kúrmeýli máseleniń sebebi men saldaryna toqtalyp, endigi rette turmystyq zorlyq-zombylyq úshin jaza kúsheıetinin tilge tıek etken.
«Otbasy, oshaq qasyndaǵy oqıǵalar kóbine-kóp «jabýly qazan jabýly kúıinde» qalatynyn qoǵam qalypty jaǵdaı retinde qabyldap keldi. Alaıda, jyl saıyn «qorǵaýshym, tiregim, serigim» degen eń jaqyn adamdardyń zorlyǵy men qorlyǵynan dál bizdiń elimizde júzge jýyq qyz-kelinshek mert bolyp, qanshamasy óz-ózine qol jumsaýǵa deıin bardy.
Astana qalasynan sońǵy 5 aıdyń ishinde 2 myńnan astam jannan qońyraý kelip túsip, zorlyqtan qutqarýdy ótingen. О́kinishtisi, bileginiń kúshin názik jandy áıeline batyryp, taıaqtap, bassyzdyqqa salynyp balasyn sabaıtyndar elimizde kún sanap kóbeıip barady.
Keshe Qazaqstan Respýblıkasynyń Prezıdenti Q.Toqaev «Áıelderdiń quqyqtaryn jáne balalardyń qaýipsizdigin qamtamasyz etý týraly» Zańǵa qol qoıdy.
Zańdy Májilis depýtattary 2023 jyldyń qyrkúıeginde Memleket basshysynyń turmystyq zorlyq-zombylyqqa jaýapkershilikti kúsheıtýdi tapsyrǵan Joldaýynan keıin birden ázirlegen bolatyn.
Ony daıyndaýǵa Bala quqyqtary jónindegi ýákil Dınara Zákıeva, Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń músheleri, sondaı-aq Ulttyq quryltaıdyń músheleri belsene atsalysty. Májilistegi talqylaýlarmen qatar, Senat qabyrǵasynda ǵana jıyrmaǵa jýyq jumys otyrystary ótip, jan-jaqty talqylandy. Sondyqtan ıini qanǵan zańdardyń biri deýge tolyq negizi bar.
Negizgi zańnamalyq jańashyldyqtarǵa toqtalsaq, turmystyq zorlyq-zombylyqty krımınalızasııalaý, balalarǵa qatysty zorlyq-zombylyqtyń barlyq túrleri úshin jazany kúsheıtý jáne onymen kúresý boıynsha aldyn alý sharalarynyń tutas kesheni bar.
Áıelder men balalardyń quqyqtaryn qorǵaý - memlekettik saıasattyń basym baǵyttarynyń biri. Memleket basshysy bul máselege basa nazar aýdaryp keledi.
Ulttyq quryltaıdyń úshinshi otyrysynda Memleket basshysy turmystyq zorlyq-zombylyqpen keshendi kúres - izgilik jolyndaǵy qoǵam kelesheginiń kepili ekenin atap ótti.
Turmystyq zorlyq-zombylyq pen býllıngten zardap shekkenderge kómek kórsetetin 111 senim telefonynyń iske qosylǵanyna jarty jyl ótti. Ortalyqqa osy kúnge deıin 10 myńnan astam adam júgingen eken. Memleket basshysy qol qoıyp, sııasy keppegen jańa zań mundaı ókinishti kórsetkishtiń kemýine kómektesedi dep oılaımyz», dep jazdy Bıbigúl Jeksenbaı.
