«Qazaqstan temirjoldarynyń tarıhy» atty elektrli kartada tóńkeriske deıingi kezeńnen bastap qazirgi ýaqytqa deıingi temirjoldyń qalaı salynǵany kórinis tapqan. Zaldyń qaq ortasynda «Dostyq», «Alashankoý» halyqaralyq jelisine, Turar Rysqulov pen Muhametjan Tynyshbaevqa arnalǵan tórt týrnıket ornalasqan. Budan bólek, ekspozısııadan el aýmaǵyndaǵy temirjol beketteriniń ashylý barysynan habar beretin shoı-shege, kilt, balǵa, relstik qosylys sııaqty buıymdardyń sandaǵan túrin kezdestirýge bolady.
«Jibek joly» zalynyń qabyrǵasynda elimizdiń qalyptasýynyń ólketaný kórinisi, temirjol kóliginiń paıda bolýy, ejelgi Jibek joly tarıhy kezeń-kezeńimen kórinis tapqan. Kúmisten kúptelgen zergerlik buıymdar, turmystyq qural-jabdyqtardyń jabyndyqtary, sırek kezdesetin fotosýretter sala tarıhyn tereńnen tanýǵa shaqyrady.
– Mýzeı alǵash esik ashqan kúnnen bastap 50 myńnan astam azamat munda bas suǵyp, mańyzdy jádigerlermen tanysty. Mýzeıge tek qala turǵyndary, stýdentter men oqýshylar ǵana emes, sheteldik týrıster de kóp keledi. Sebebi temirjol tarıhy ótken kúnderdiń talaı kezeńderimen ózara sabaqtasyp jatyr. Elimizdiń temirjol kóliginiń rólin nasıhattaýdyń biregeı ortalyǵy sanalatyn bizdiń mýzeı tarıhqa qyzyǵýshylyq tanytatyn kelýshilerin qýana qarsy alady, – deıdi mýzeı mamandary.
Elimizde shoıynjol barlyq júk tasymaly aınalymynyń 70 paıyzyn, al jolaýshy tasymalynyń 34 paıyzyn qamtyp otyr. Kórshiles memlekettermen barlyǵy 16 temirjol toraby baılanystyratyn Qazaqstan temirjolynyń jalpy uzyndyǵy 15 myń shaqyrymnan asady.
ALMATY
