«Prezıdentke sý tasqyny kezinde Qostanaı oblysynyń volonterleri qandaı jumys atqarǵany týraly baıandadym. Qasym-Jomart Kemeluly: «Eńbekterińdi estip, kórip jatyrmyn, bárińe rızamyn dep oń baǵasyn berdi. Bárine sálem aıt», dedi. Memleket basshysynyń qıyn-qystaý kezeńde istiń basynan, kóptiń qasynan tabylǵan erikti jastarǵa erekshe rıza ekeni baıqaldy», deıdi Aıbek.
Aıbek Tańatbaev Qostanaıdaǵy «Qoǵamdyq kelisim» úıinde bas sarapshy bolyp qyzmet etedi. Únemi oblystyq Assambleıanyń uıymdastyrýymen ótip jatatyn ıgi is-sharalardyń basy-qasynan tabylady. Belsendi azamat 26 naýryzda óziniń kindik qany tamǵan Amangeldini tasqyn sý basyp jatyr degendi estı sala, basshylarynan suranyp, aýylǵa attanǵan. Sodan beri, mine, 20 kúnnen asty, Amangeldi aýdanynda júr. Áý basta aýdannyń belsendi jastaryn uıymdastyryp, antalaǵan sýdyń aldyn bógeýge shapqylap júrdi. Endi sý ketip, qaýiptiń beti qaıtqan soń, janyndaǵy jastarmen birge tabıǵı apattyń zardaptaryn joıýǵa kómektesip jatyr.
Aıbek sııaqty alys qaladaǵy jumysyn tastap, sý basyp jatqan týǵan aýylyna janushyra kómekke umtylǵan jastar qanshama? Oǵan aýyldyń turǵylyqty jastaryn qosyńyz. Máselen, eldi mekenderge tasqyn sý ekpindep kirip jatqanda bir ǵana Amangeldi aýdanynyń ózinde resmı túrde 400-ge jýyq volonter tirkelipti. Tirkelmegeni qanshama?
«Týǵan jerimdi tasqyn sý basyp jatyr degendi estip, Qostanaıda otyra almadym. Aýylǵa bara salysymen aýdannyń belsendi jastarynyń basyn qosyp, birden volonterlik shtab ashtym. Aýdan ákimdigi kitaphana ǵımaraty men stadıondy berdi. Odan keıin shtab jumysynyń 4 baǵytyn aıqyndap aldyq. Birinshi baǵyt boıynsha aýyl azamattarynan qurylǵan qol kúshi sýdyń aldyn bógeý jumystaryna kiristi. Ekinshi, eńbek adamdary mehanızatorlar men traktorshylar, aýyr júk kóliginiń júrgizýshileri birigip, tehnıka kúshimen qum, kúl tókti. Al qyzdar, ápkelerimiz, apalarymyz ystyq tamaq, kóje, shaı uıymdastyryp, evakýasııalanǵan turǵyndardy, alystan gýmanıtarlyq kómek ákelgen júrgizýshilerdi, qutqarýshylardy tamaqtandyryp otyrdy. Tórtinshi baǵyt boıynsha gýmanıtarlyq kómek retinde kelgen azyq-túlik, ystyq tamaq, kıim-keshek, aıaq-kıim, qaptar men qural-saımandardy suryptap, elge shuǵyl taratyp otyrdyq. Bizdiń qatarymyz birden kóbeıip ketti. Volonterlerdi jas, kári dep bólýge bolmaıdy, qatarymyzda jas ta, kári de júrdi. Mysaly, 74 jastaǵy bir ájemiz kún saıyn ystyq kójesin qaınatyp, baýyrsaǵyn pisirip dalada jumys istep jatqandarǵa taratty. Mektepti sý basyp jatqanda ony bógeýge qanshama jigitter atsalysty. Solardyń eńbeginiń arqasynda altyn uıa mektebimizdi aman alyp qaldyq. Sol azamattarǵa degen alǵysym sheksiz. Áli kúnge deıin jumys júrgizip jatyrmyz. Keshe Qostanaıǵa kele salyp bir júk kóligimen kelgen gýmanıtarlyq kómekti qabyldap, aýylǵa jiberdim. Amangeldi aýdanynda resmı túrde tirkelgen 394 volonter jumys istedi. Qazir jaǵdaı durystalǵan soń, gýmanıtarlyq shtabta 30 volonter qaldy. Júk kelgen kezde túsirip, suryptap, elge taratý úshin taǵy 20 volonter shaqyramyz», deıdi Amangeldi aýdanyndaǵy volonterler shtabynyń basshysy A.Tańatbaev.
Qazir aýdandaǵy jaǵdaı birshama turaqtalyp qaldy. Biraq ólgen mal kóp. Evakýasııadan keıin aýylǵa oralǵan jurt veterınar mamandar jetispegendikten ólgen malyn ózderi aýlaqqa aparyp, órtep, kómip jatyr. Mundaı iske arba, respıratorlyq maska, qolǵap, rezeńke etik, ózge de zattar kerek. Qostanaıǵa osy dúnıeler úshin kelgen Aıbek keshe ǵana keregin taýyp, júk kóligine tıep, Amangeldige jibergen. Erteń elge taratady. Munyń syrtynda, qazir Amangeldi aýdany boıynsha 11 aýyl jaryqsyz otyr. Sondyqtan aýdandyq volonterler shtaby qosymsha demeýshiler taýyp, jaryqsyz otyrǵan aýyldarǵa elektr generatorlaryn jiberip jatyr.
Volonterlik shtab sý tasqyny kezinde oblys ákimimen tikeleı baılanys jasap otyrdy. El ishi bolǵan soń, keıbir shendi-shekpendiler eriktiler shtabyna qysym kórsetip, gýmanıtarlyq kómek retinde kelip jatqan motorly qaıyq, kıiz úı sııaqty eń kerek dúnıelerdi óz jaqyndaryna alyp bergisi kelgen jaǵdaı bolǵan. Alaıda Aıbek mundaılarǵa jol bermeı, halyqqa ádil bólip beremiz degen qatań talabynan taımady. «Eger mundaı qysym jalǵasatyn bolsa, áleýmettik jeli arqyly birden oblys ákimine úndeý joldaımyn» dep álgindeı pysyqaılardy tyıyp tastady. Qabyldaý-jiberý aktisin jasap, kelip jatqan tebenge deıin qujatqa tirkep otyrdy. Osynyń nátıjesinde, kıiz úı, elektr generatory tárizdi qundy dúnıelerdiń bári Aıbektiń qatań tártibine sáıkes tegis halyqqa tegin taratyldy.
«Tek Amangeldiniń ǵana emes, irgeles jatqan Jangeldın aýdanynyń 7 aýylyna kómektestik. О́zimizge jetetin bolǵan soń, bizge kelgen gýmanıtarlyq kólikti azyq-túlik jetpeı jatqan Jangeldın aýdanyna jiberdik. Jaǵdaı turaqtalǵan soń, tórt kúnnen keıin jıyrmaǵa jýyq volonterdiń basyn biriktirip, janarmaıyn, tamaǵyn, qapshyq-kúrekterin berip Torǵaıǵa kómekke jiberdik. Bul jerde jalpy jigitterdiń eńbegin kórsetý kerek. Men bul jerde jaı ǵana jospar jasap, baǵdar berip otyratyn úılestirýshi, uıymdastyrýshy ǵanamyn. TJD-men de tyǵyz baılanysta jumys júrgizdik. Der kezinde qaıyq, tikushaq uıymdastyrdyq. Osylaısha, bárimiz birigip qıyndyqty eńserdik. Mundaı jaǵdaıda eń aldymen birlik kerek», deıdi Aıbek.
Qostanaı oblysy
