Svetlana Jaqypova aldymen Qostanaı oblysynyń ákimi Qumar Aqsaqalovpen kezdesti. Kezdesý barysynda sý tasqynynan zardap shekkenderge qoldaý kórsetý jáne Memleket basshysynyń áleýmettik-eńbek salasyna qatysty tapsyrmalaryn iske asyrý máseleleri talqylandy. Atap aıtqanda, halyqty jumyspen qamtý jáne áleýmettik qoldaý, kásiporyndarda eńbek qaýipsizdigi jáne eńbekti qorǵaý, múgedektigi bar adamdar úshin kedergisiz orta qurý jáne basqa da mańyzdy máseleler qaraldy.
Mınıstr odan keıin múgedektigi bar adamdarǵa arnalǵan oblystyq ońaltý ortalyǵyna baryp, arnaýly áleýmettik qyzmet alýshylarmen jáne mekemege ýaqytsha ornalastyrylǵan sý tasqynynan zardap shekken turǵyndarmen kezdesti. Sala basshysy sý tasqyny kezinde barlyq arnaýly áleýmettik qyzmet kórsetý ortalyǵynyń qyzmeti erekshe baqylaýda ekenin atap ótti.
Atalǵan ońaltý ortalyǵynda adam turmysyna qolaıly jaǵdaıdyń bári eskerilgen, sondaı-aq azamattardyń jeke qajettilikterine saı arnaýly áleýmettik qyzmetter kórsetiledi. Bul qyzmetter erekshe qajettilikteri bar adamdardyń jeke damý deńgeıin arttyrýǵa, áleýmettenýine jáne qoǵammen yqpaldasýyna baǵyttalǵan.
Qazir ortalyqta sý tasqynynan zardap shekken 15 adam ýaqytsha turyp jatyr. Olardyń ishinde múgedektigi bar 4 azamat bar.
«Bul jerde bizdi jaqsy kútip aldy, ortalyq taza, jyly ári kúnine úsh ret tamaqtandyrady. Bári óte jaqsy uıymdastyrylǵan, medısınalyq kómek kórsetiledi», deıdi sý tasqynyna baılanysty osynda turyp jatqan Galına Zalıalova.
Mınıstr óz kezeginde medısınalyq-áleýmettik mekemelerdiń úzdiksiz jumys atqarýy asa mańyzdy ekenin atap ótti.
«Qazirgi ýaqytta respýblıka boıynsha qarttar men múgedektigi bar adamdarǵa arnalǵan arnaýly áleýmettik qyzmetter kórsetetin 118 ortalyqtyń bári shtattyq rejimde jumys istep jatyr. Mınıstrlik birqatar óńirde TJ rejimi jarııalanǵanyn eskere otyryp, osy uıymdardaǵy jaǵdaıdy jáne olardyń qyzmetin turaqty baqylaýda ustaıdy. Azamattarymyzdyń qajetti arnaýly qyzmetter alýyn jalǵastyrý óte mańyzdy», dedi S.Jaqypova.
Mınıstr jumys sapary barysynda Sh.Qabylbaev atyndaǵy IIM Qostanaı Akademııasynyń ǵımaratynda uıymdastyrylǵan evakýasııalyq pýnktke bardy. Munda 31 adam ýaqytsha ornalastyrylǵan. Sý tasqynynan zardap shekkenderge barlyq qajetti medısınalyq jáne psıhologııalyq kómek kórsetilip jatyr, kúnine úsh ret tamaqtandyrylady, sondaı-aq adamdar birinshi kezekte qajet quraldarmen qamtamasyz etilgen.
Budan keıin mınıstr Altynsarın aýdanyndaǵy «Sosnovyı bor» shıpajaıyna bardy. Munda múgedektigi bar adamdar, zeınetkerler jáne tolyq emes otbasylardy qosa alǵanda, sý tasqynynan zardap shekken 23 adam ýaqytsha turyp jatyr.
«Biz qazir kúrdeli jaǵdaıdy bastan ótkerip jatyrmyz. Osyǵan oraı memleket tabıǵı sý apatyna qarsy kúres boıynsha barlyq qajetti is-sharany qabyldady. Sondaı-aq zardap shekkenderge túrli qoldaý sharasy kórsetilip jatyr. Eńbek jáne halyqty áleýmettik qorǵaý mınıstrligi TJ rejimi jarııalanǵan qalalar men aýdandarda 5 myńnan astam otbasyna memlekettik organdarǵa júginýsiz-aq, avtomatty túrde ataýly áleýmettik kómek taǵaıyndady. Sondaı-aq TJ rejimi kezeńinde balalardy qosa alǵanda, 4 myńǵa jýyq adamnyń múgedektikti qaıta kýálandyrý merzimderi avtomatty túrde uzartyldy. Múgedektigi boıynsha járdemaqy tóleý buryn belgilengen top boıynsha júzege asyrylady. Kásipodaqtar federasııasymen birlesip, respýblıkanyń 7 shıpajaıynda sý tasqynynan zardap shekken áleýmettik osal sanattarǵa jatatyn azamattarǵa ýaqytsha turý jáne saýyqtyrý múmkindigi berildi», dedi S.Jaqypova.
Oblys ákimdiginiń málimetinshe, óńirde sý tasqyny kezinde 9 114 adam evakýasııalanyp, 181 adam ýaqytsha ornalastyrý pýnktterinde qonystanǵan.
Qostanaı oblysy
