2026 jylǵy 15 naýryzda ótken jalpyulttyq referendýmda daýys bergen qazaqstandyqtardyń basym bóligi usynylǵan konstıtýsııalyq ózgeristerdi qoldaǵan. Naqtyraq aıtqanda, daýys berýge qatysqan azamattardyń 87,1 paıyzy jańa Konstıtýsııa jobasyna «ıá» dep jaýap bergen. Jalpy alǵanda, referendýmǵa 9,1 mıllıonnan astam adam qatysqan, olardyń 7,9 mıllıony ózgeristerdi qoldasa, 898 myńnan astam azamat qarsy daýys bergen. Sonymen qatar 127 868 bıýlleten jaramsyz dep tanylǵan.
OSK tóraǵasy atap ótkendeı, referendým nátıjeleri zańdy dep tanylyp, jańa Konstıtýsııa qabyldandy. Tıisti sheshim jaqyn arada resmı basylymdarda jarııalanady.
Daýys berý kúni el boıynsha túrli máselelerge qatysty 35 ótinish tirkelgen. Olardyń basym bóligi Astana qalasynda (11 ótinish) tirkelse, Almaty qalasynda – 6, Mańǵystaý oblysynda – 4 ótinish túsken. Sondaı-aq Shymkent qalasy, Abaı jáne Qyzylorda oblystarynda úsh-úshten ótinish qaralǵan. Al Almaty, Aqmola, Shyǵys Qazaqstan, Jambyl jáne Pavlodar oblystarynda bir-bir ótinishten tirkelgen.
О́tinishterdiń mazmuny negizinen referendýmnyń tártibi, daýys berý prosesi, saılaý ýchaskelerin aýystyrý, daýys berý oryndarynyń ornalasýy men zań buzýshylyqtarǵa qatysty bolǵan. Terrıtorııalyq komıssııalar 33 ótinishke qoldanystaǵy zańnamaǵa sáıkes túsinikteme berip, jaýap qaıtarǵan.
Sonymen qatar daýys berý kúni sot organdaryna eki talap-aryz joldanǵan. Onyń biri Aqtóbe oblysynda Braıl qarpimen jazylǵan trafarettiń oqylmaýyna qatysty bolsa, ekinshisi Astanadaǵy ýchaskede baqylaýshyny shyǵarý sheshimine baılanysty bolǵan. Alaıda sot qaraýy barysynda eki is boıynsha da talaptar negizsiz dep tanylyp, qanaǵattandyrýdan bas tartylǵan.
Jalpy alǵanda, tirkelgen ótinishter men jekelegen eskertýler referendýmnyń ótý barysyna jáne onyń qorytyndy nátıjelerine aıtarlyqtaı áser etpegen. Barlyq máseleler zań talaptaryna sáıkes qaralyp, tıisti sheshimder qabyldanǵan.
Referendýmda 17514 adam esepten shyǵarý kýálikterin alǵan. Osy adamdardyń 16 594-i (94,7%) daýys berýge kelgen.
