Foto: Mereı Qaınaruly
Jýrnalıster mingen shaǵyn avtobýs О́mesh asýyn asyp, Samar aýdanyn basyp, «Qyzyl tý» ótkeline kelip tirelgen. Tizilgen kólikter paromǵa kezek kútip tur. Kók aıdynnyń arǵy jaǵy – Kúrshim.
Kúrshim óńiriniń turǵyndary 1960 jyldardan beri parommen qatynaıdy. Qystyń kúni muzdyń betimen júredi. Bıyl jyl sońynda Prezıdent tapsyrmasymen salynyp jatqan kópir qurylysy aıaqtalýy tıis. Aıtqandaı, kópir máselesi «Egemen Qazaqstan» gazetinde kóterilip, Memleket basshysy Qasym-Jomart Toqaevtyń nazaryna ilingen.
Jaǵalaýda qaınaǵan tirshilik. Kúrshimge á dep, tabanyńyz tıse, qaqtalǵan balyqtan dám tatar edińiz...
Bul Qazaqstandaǵy eń uzyn kópir bolmaq. Qurylysshylar Quıǵan aýylynyń tusyndaǵy eń jińishke tusyna toqtalǵan. Onyń ózi – 1300 metr.
Kópir qurylysynyń 85 paıyzy oryndaldy. Úsh tireýdi burǵylaý jumystary júrip jatyr. «OblShyǵysJol» JShS mamany Nıǵmatýlla Abdýlhakov nysandy bıyl tapsyramyz deıdi.
Jumysshylardyń endi bir toby negizgi kópirdiń betine órmek toqyǵandaı etip, tutastyra armatýra temir toqyp júr.
Jýrnalıster toby at basyn Kúrshim aýylyndaǵy basseınge burǵan. Bul nysannyń qurylysy qańtarylyp birneshe jyl turǵan. Qazirgi ýaqytta másele sheshildi. Halyqqa qyzmet kórsetip tur.
Kúrshim aýdanynda tasqynǵa tosqyn jumystary qarqyndy júrgizilip jatyr. Sý basý qaýpi bar Topterek, Birlik, Býrabaı aýyldarynyń tusynda bógetter salynǵan. Sondaı-aq Maraldy, Úshbulaq aýyldarynda jáne Qalǵuty ózeniniń boıyna bógetter turǵyzylyp jatyr. Daıyndyq jumystary sáýirdiń 25-ne deıin aıaqtalady.
Sonymen qatar aýdan turǵyndary úshin kerek-jaraqpen tolyq qamtylǵan ýaqytsha evakýasııalyq pýnkteri daıarlanǵan.
Kúrshim aýylyndaǵy «Kovorkıng» ortalyǵyna da bas suqtyq. Munda aýyl jastary úshin túrli is-sharalar uıymdastyrylyp turady eken.
Jabylyp qalǵan Besjyldyq aýylynyń tamyryna qaıta qan júgirip jatyr. Aýylǵa deıin asfalt tóseldi. Balalar oıyn alańy salyndy. Sondaı-aq kópbalaly otbasylarǵa arnalǵan úıler salynyp jatyr.
Osydan eki-úsh jyl buryn «Egemen Qazaqstan» gazetinde Jaýǵashty kanalynyń qurǵap ketkendigi týraly máseleni qaýzaǵan edik. Halyq únine qulaq asqan aýdan ákimi Almat Aqyshev bul máseleni de dereý sheshken.
Kásiptiń kózin tapqandar memleketten nesıe alyp, sharýalaryn dóńgeletip otyr. Túshpara túıip, nápaqa taýyp júrgen Raıhan Nurǵazına «Aýyl amanaty» baǵdarlamasy boıynsha 2,5 paıyzben 5 mln teńge nesıe alyp, kásibin keńeıtken.
Aýyldyqtardyń endigi tilegi – kópir. Kópir qurylysy ýaqtyly aıaqtalsa, Kúrshim men Marqakól aýdandaryna qatynaý anaǵurlym jeńildeıdi.
