Foto? Copilot GPT
Táýelsiz sarapshylardyń aıtýynsha, bizde emıtent pen ınvestor úshin qyzmetterdiń tolyq spektrin alatyn bir naqty platforma bolýy kerek. Elimiz eki bırja ustaıtyn deńgeıge jetpedi deıdi olar.
UB tóraǵasynyń aıtýynsha, Memleket basshysy bırjalardy biriktirýdi emes, bırjalardyń áleýetin biriktirýdi tapsyrdy. Bul ártúrli suraq, óıtkeni bırjalardyń birigýi bir zańdy tulǵanyń qurylýyn bildiredi.
«Naýryz aıynyń sońyna deıin sheshimdi ázirleý tapsyryldy. Bul sheshimdi biz, ıaǵnı Ulttyq bank, Qarjy naryǵyn retteý jáne damytý agenttigi jáne «Astana» halyqaralyq qarjy ortalyǵy ázirledik. Kóptegen elde baǵaly qaǵaz naryǵy – ekonomıkany qarjylandyrýdyń mańyzdy joldarynyń biri. Degenmen búginde el ekonomıkasyn tek bankter qarjylandyrady. Qor naryǵyn damytpaı, jalpy ekonomıkanyń damýy týraly oılaý qıyn. Sondyqtan bırjalyq ınfraqurylym múmkindiginshe jaqyn bolýy, al ótimdilik birkelki bolýy kerek. Sonda kez kelgen qural eki platformada da qoljetimdi bolady», dedi Tımýr Súleımenov.
Qazaqstan qarjygerleri qaýymdastyǵynyń basshysy Elena Bahmýtova qos bırjany KASE bazasynda biriktirý kerek degen oıǵa basymdyq beredi. Onyń aıtýynsha, negizgi ótimdilik KASE-de shoǵyrlanǵan.
Qarjy naryǵyn retteý jáne damytý agenttiginiń basshysy Mádına Ábilqasymova qos bırjany biriktirýde Qatar eliniń tájirıbesine súıený qajet ekenin aıtady.
Qazaqstan qor bırjasynyń qurylǵanyna bıyl – 31 jyl. 1993 jyldyń 17 qarashasynda shetel valıýtasynyń saýda-sattyǵyn uıymdastyrý úshin Qazaqstan bankaralyq valıýtalyq bırjasy qurylyp, birneshe jyldan keıin ataýy Qazaqstan qor bırjasy dep ózgertilgen. KASE-ni qazirgi ýaqytta elimizdegi qor jáne valıýtalyq naryqqa qyzmet kórsetetin, qarjy naryǵynyń ajyramas ınfraqurylymy bolyp sanalatyn jáne otandyq ekonomıkada mańyzdy oryn alatyn bırja dep aıta alamyz.
AIX 2017 jyly «Astana» halyqaralyq qarjy ortalyǵyn damytý sheńberinde qurylǵan. Bırja aǵylshyn quqyǵynyń qaǵıdalaryna negizdelgen normatıvtik-quqyqtyq baza sheńberinde jumys atqarady, osy arqyly senimdi ınvestısııalyq ortany qamtamasyz etedi.
