«Family» saıabaǵyna jınalǵan 200-den asa jetkinshek Almaty turǵyndaryn tánti etti. Ekologııalyq jobaǵa ún qosqan órender – qalanyń Áýezov aýdanyndaǵy DamuBala shyǵarmashylyq úıirmeleriniń shákirtteri. Kóktem shyǵa shahardyń ár mektebinde «Qustarǵa uıa syılaıyq» chellendji uıymdastyrylyp, oǵan ún qosýshylar sany arta túsken. Mektep aýlalary men basqa da saıabaqtarda paıda bolǵan qus uıalary kórgen jannyń kóńiline jylylyq uıalatady.
«Bul aksııanyń maqsaty – ekologııalyq belsendilikti nasıhattaý jáne óskeleń urpaqty qorshaǵan ortany aıalaý men qorǵaýǵa baýlý. Qustarǵa uıa salyp, tabıǵatpen etene syrlasqan baldyrǵandarǵa belgili ánshi Toqtar Serikov kelip, alǵys aıtyp, ánmen shashý shashty. Oqýshylarymyz dán rıza», deıdi deneshynyqtyrý pániniń muǵalimi Aıbaný Qojabekova.
Oqýshylar myńdaǵan qus uıasyn «Tehnologııa» sabaǵynda jasaǵan. Aıryqsha bastama aldaǵy demalys kúnderi de jalǵasyn tappaq.
Eske salsaq, sáýirden bastap megapolıste «Almaty – bizdiń ortaq úıimiz» naýqany tusaýyn kesken edi. Jobaǵa sáıkes árbir turǵyn qalany damytý men kórkeıtýge úles qosa alady. Máselen, qalanyń belsendi jastarynyń basqosýy ótip, birneshe ekologııalyq joba tanystyryldy. Atap aıtqanda, qaladaǵy 11 joǵary oqý oryndarynyń atynan 11 ekojoba usynylǵan. Olardyń arasynda qatty qaldyqtardy qaıta óńdeýge, tamaq qaldyqtaryn bıotyńaıtqyshqa aınaldyrýǵa, qaıta óńdelgen plastık qaldyqtarynan turmystyq zattardy óndirýge, kóshet otyrǵyzý men janýarlardy qorǵaýǵa qatysty jobalar qoldaý tapqan.
«Biz avtorlyq shamdardy jasaýdy qamtıtyn «ReCyGlass» jobasyn tanystyrdyq. Shyny bótelkelerdi qaıta óńdep, olardy biregeı dızaıny bar shamdarǵa aınaldyramyz. Joba qorshaǵan ortaǵa teris áserdi azaıtýmen qatar, lastaný máselesine jáne turaqty tutyný tájirıbesine kóshý qajettiligine nazar aýdarady», deıdi Narhoz ýnıversıteti ekologııa fakýltetiniń 4-kýrs stýdenti Saıa Kúnshasheva.
ALMATY
