Foto: freepik.com
Kógerip kóktem kelgen soń aýyl aımaqtyń mańyn tazalap abattandyrý qolǵa alynatyny belgili. Oblys ortalyǵyndaǵy sátimen ótken senbilikke memlekettik organdar, kásiporyn men uıymdar jáne mekemelerdiń ókilderi belsene qatysty. Bir ǵana «Tynys» aksıonerlik qoǵamy ujymy 300-den asa adam bolyp ortaq iske atsalysty. Qalanyń keskin-kelbeti, sáni men saltanaty barshaǵa ortaq. Sondyqtan aýyq-aýyq osyndaı senbilikter uıymdastyrylyp tursa quba-qup.
– Qala kórkine atsalysyp jatyrmyz. Bizdiń ujymǵa Abylaı han dańǵylynyń boıyn tazalaý júkteldi. 70-ten asa adam jumylyp, bir adamdaı eńbek ettik, – deıdi «Kókshetaý jylý» kásipornynyń dırektory Rýslan Maqyshev.
Tazalyq jumysyna kommýnaldyq qyzmet te tartylǵan. Olar myńǵa jýyq qap pen 200 kılo ák daıyndapty. 40-tan asa tehnıka jumyldyrylǵan. 21 konteıner alańy tazalanyp, turmystyq qaldyqtar polıgonyna 2,5 myń tekshe metr qoqys shyǵarylǵan. Senbilik barysynda kósheler men jaıaý júrginshiler joly, aryqtardyń ishi qoqystan aryldy. Osy kúni 4 myńǵa jýyq qala turǵyny ózderiniń súıikti qalasynyń sáýletine atsalysty.
Kókshetaý
