Bul seriktestik on jyldan astam ýaqyt jemis-jıdekti qaıta óńdeý ónerkásibinde tabysty jumys istep jatyr. Tabıǵı ári dámi til úıirer shyryn men túrli jemis ezbesin daıyndaýǵa qajet jemisterdi alý úshin kompanııa óziniń alma baǵyn jaıqaltyp ósirgen.
«2019 jyldan bastap alma ósirýmen aınalysamyz. 70 gektar jerdi tamshylatyp sýarý tehnologııasymen baptaımyz. Sodan beri baq ósirýdiń tıimdiligi artty. Baǵymyzda almanyń gala, golden, red delıshes, red djonaprıns, fýdjı sorttary ósiriledi. Erekshe kútimniń nátıjesinde jyldan-jylǵa ónim kólemi artyp keledi», deıdi «Unifruit» JShS dırektory Oljas Sharafıev.
Alma baqty qajetti qurylǵylarmen qamtamasyz etý úshin kompanııa úlken táýekelderge baryp, elimizde eń alǵashqy bolyp shpalerli baǵanalar shyǵarýǵa bel býǵan.
Osy kúni ıntensıvti baq ósiretin sharýashylyqtardyń alqaptary arnaıy tormen qaptalǵanyn kóremiz. Bul tor aǵashtardyń jemisterin qustardan, burshaqtan, jelden saqtaıdy. Al tor men ony ornalastyratyn baǵanalardy kompanııa ózi óndirip, otandyq ónerkásipke tyń jańalyq engizdi. Kásiporyn Eńbekshiqazaq aýdany Esik qalasynda ornalasqan.
«Unifruit Production» – elimizde qarqyndy baqtar men júzimdikterge arnalǵan torly júıelerdi salý boıynsha keshendi sheshimderdi usynatyn óndiristik kompanııa. Italııalyq tehnologııa boıynsha Ortalyq Azııa naryǵyndaǵy temirbeton baqsha torynyń jalǵyz óndirýshisimiz. Tordyń joǵary sapasyna qol jetkizý úshin Italııanyń eń ozyq tehnologııasyn tańdadyq. Ol 1968 jyldan bastap aldyn ala kernelgen temirbeton konstrýksııalaryn jasaýǵa arnalǵan jabdyqty óndirýdiń sheberi sanalady. Klıentter tiziminde «Valente Spinazze» kompanııasy jáne taǵy basqalar bar. Bizdiń kompanııa Ortalyq Azııadaǵy osy óndiris tehnologııasynyń eksklıýzıvti quqyq ıesi bolyp esepteledi. Sondaı-aq «Unifruit» kompanııasy Almaty oblysynda 100 gektardan astam aýmaqta qarqyndy baqtar salý boıynsha óz jobalaryn iske asyrdy», deıdi seriktestiktiń ınjener-tehnologi jáne seh basshysy Dáýrenbek Qorazov.
Joǵary sapaly materıaldardy paıdalana otyryp, qarqyndy baqtar men júzimdikterge arnalǵan qorǵanys qurylystary bóliginde keshendi sheshimderdi iske asyrýdy maqsat etken kompanııa aldyn ala kernelgen beton torlaryn, burshaqqa qarsy tordy jáne basqa materıaldardy óndirý jáne jetkizýmen aınalysyp keledi. Sonymen qatar kógaldandyrýdy qoljetimdi etý jáne eýropalyq tehnologııalardy ázirleý men ony engizý arqyly baǵbandardyń mol ónim alýyn qamtamasyz etý kompanııanyń basty maqsatyna kiredi.
«Ýaqyt talabyna saı ıtalııalyq óndiriske negizdelgen ıntensıvti baý-baqsha ósirý tehnologııasy boıynsha shpalerli baǵanalar kerek boldy. Bul baǵanalar Qazaqstan naryǵynda joq, shetelde, ıaǵnı Italııada ǵana bolǵandyqtan kompanııa jetekshileri osy óndiristi alyp kelip, iske qosýǵa sheshim qabyldady», deıdi kompanııa ókili.
Aldyn ala kernelgen baǵanalardyń ólshemi ártúrli, uzyndyǵy 5 metrden tómen qaraı kez kelgen ólshemde shyǵarylady. Al avtomattandyrylǵan jeli tutastaı alǵanda 65 metr uzyndyqta ónim shyǵarady. Daıyn bolǵan ónimdi qarqyndy baq tehnologııasy boıynsha belgili araqashyqtyqta jerge qadap, ornalastyrady. Ony baqtarǵa ǵana emes, egis alqaptaryn, jol jıegin qorshaýǵa da paıdalanady.
Bes jyldan beri iske qosylǵan biregeı óndiris oshaǵynda eki jeli jumys isteıdi. Onda táýligine 5 200 metr shpalerli baǵanalar daıyndalady.
Sapaly otandyq ónimniń qoldaný aıasy da keńı túsken. Mysalǵa aıtar bolsaq, Úlken Almaty aınalma aqyly jolynyń 150 shaqyrymyn qorshap shyǵýǵa osy kompanııanyń ónimi qoldanylǵan eken. Sol sebepti, uzyndyǵy 250-270 ólshemdermen baǵanalar óndirý jolǵa qoıylǵan.
«Bizdiń baǵanalardyń kóldeneń qıǵandaǵy ólshemderi 70*80 mm, 90*90, 5 mm jáne 95*120 bolyp úshke bólinedi. Materıalǵa (quımatasqa, armatýraǵa) aldyn ala kerneý úrdisi qazirgi zamanǵy qurylystyń ártúrli temir-quımatas qurylymy men buıymynda, sondaı-aq metall qurylymdarynda keńinen qoldanylady. Ádette temir-quımatasty aldyn ala kernelgen qurylymdarda quımatas syǵylady da, armatýra sozylady. Munyń nátıjesinde armatýralyq bolattar 70 paıyzǵa deıin únemdelip, qurylymnyń beriktigi artady. Temir-quımatasty aldyna ala kernelgen qurylymdardy úı men ınjenerlik qurylystarda, kóbine kópirlerde paıdalaný tıimdi. Baqqa paıdalanýdyń da maqsaty sol, jaýyn-shashynǵa qarsy materıaldy osy baǵanalardyń ústine tartyp qoıady, onyń ústine salmaq túsken kezde bárine shydas berip, kóterip turady. Maıysqanda synyp ketpes úshin aldyn ala kerneýlik quıylady», deıdi ınjener-tehnolog D.Qorazov.
Italııalyq tehnologııanyń iske qosylǵanyna bes jyl bolǵan. Osy ýaqyt aralyǵynda qalyptasqan 2 jelide 30 shaqty adam turaqty eńbek etip jatyr. Olardyń barlyǵy da jergilikti aýyl azamattary. О́ndiriske qajet shıkizat – qıyrshyq tas, qum, sement otandyq bolǵanymen, metall tapshylyǵy baryn jasyrmady. Ony kásiporyn Reseıden alady.
Kompanııa osy kúni elimizdiń ońtústik óńirleri men Almaty qalasynan turaqty túrde tapsyrystar qabyldap júr. Sonymen qatar О́zbekstan men Qyrǵyzstannan da suranys artyp, taýarlar kidirissiz jóneltilip jatyr.
Aldyn ala kerneýli baǵana shyǵarýdyń sheberi bolǵan kásiporyn keleshekte ónim kólemin ulǵaıtýmen qatar, temirbeton konstrýksııalardyń túrin kóbeıtip, keńeıtilip jatqan 3-júıeni iske qosýdy josparlap otyr.
Almaty oblysy
