Tutynýshy suranysyn tolyqtaı qamtamasyz etemiz

Údemeli ındýstrııalyq-ınno­vasııalyq damý baǵdarlamasy aıasynda otandyq óndiristik býyndar qatarynyń tolyǵýy elimizdiń áleýmettik-ekonomıkalyq ja­ńarýlar tynysyna tyńnan lep qosyp, halyqtyń ál-aýqatyn jaqsartýǵa úlken yqpal etip otyr­ǵanyn aıtý lázim. О́tpeli kezeń tusynda elimizdegi jeńil óner­kásip salalary aqsap qalǵa­ny, Qazaqstannyń árbir iri qala­­larynda jumys istep tur­ǵan tigin fabrıkalary jabylyp, olardyń ǵımarattary, teh­nı­kalyq qural-jabdyqtary men múlki talan-tarajǵa túsip, qanshama qyz-kelinshekterimiz, tájirıbeli tiginshi apa-ápkelerimiz jumyssyz qalǵan edi. Qudaıǵa shúkir, halqymyzdyń «ornynda bar ońalar» degen ataly sózi es jıyp, eńse kóterýimizge sep bolǵandaı, mine, otandyq jeńil ónerkásip salasyna taǵy bir jańa fabrıka kelip qosyldy. «Qazaqstannyń jańa ındýs­trııasy: 2014 jáne alǵashqy besjyldyq jetistikteri» dep atalatyn telekópir barysynda bizdiń jas kásiporynnyń iske qosylýy, onyń alǵashqy qadamyn Elbasy Nursultan Nazarbaevtyń ózi jasatýy – bizdiń kásiporyn úshin jáne qyzmetkerlerimiz úshin úlken maqtanysh, rýhanı demeý. Sondyqtan da, biz memleketimiz senip tapsyryp otyrǵan jaýap­kershilik údesinen shyǵamyz dep, el damýyna azamattyq úlesimizdi qosamyz dep shynaıy kóńilimdi jetkizgim keledi. Otandyq jeńil ónerkásiptiń damýy tek ekonomıkalyq emes, áleýmettik salanyń da ilgeri bas­ýyna zor yqpal etedi. Biz ónimniń mol túrin shyǵaratyn bolamyz. Bul ishki naryqty sapasy joǵary otandyq óndiristegi matalarmen qamtamasyz etýge múmkindik beredi. Tigin fabrıkasynda negizinen ózimizdiń qyz-kelinshekter jumys isteıtin bolǵandyqtan, jańa kásiporyndaǵy 200 jumyskerdiń 80 paıyzy áıelder ekenin aıtyp ótkim keledi. Keleshekte biz óz ónimderimizben el aýmaǵyn qamtı otyryp, sapaly ári zamanǵa saı kıim-keshekterdi alys-jaqyn shet­elderge de shyǵaratyn bolamyz. Memleket basshysy Nursul­tan Nazarbaevtyń tapsyrmasymen jáne arnaıy baqylaýymen elimizde júrgizilip otyrǵan údemeli ındýstrııalyq-ınnova­sııalyq baǵdarlamanyń tıim­di nátıjesiniń arqasynda Qazaq­stannyń ár aımaǵynda jańa kásiporyndar men zaman talabyna saı zaýyttar, fabrıkalar boı kóterip, myńdaǵan azamattarymyzdy jumys oryndarymen qamtyp otyrǵany belgili. «Basym bóligi áıelder jumys isteıtin tigin fab­rıkasy tek qana óndiristik emes, sonymen birge áleýmettik mańyz­dy joba», dep Memleket basshy­sy jeńil ónerkásiptiń osy bir sala­synyń mańyzyna erekshe kóńil bólgeni áli kúnge esimizde. Osy oraı­da, bizdiń kásiporyn da el damýy­na, ekonomıkamyzdyń turaq­ty­lyǵyna qyzmet etip, óz úlesin qosady dep senimmen aıta alamyz. Elimizdegi san-salaly zaýyttar, óndiristik kásiporyndar men túrli tehnıkalyq qyzmet kórsetý oryndarynan túsetin tapsyrystarǵa sáıkes tigiletin arnaýly jumys kıimderin de tigýmen qatar, bizdiń fabrıka turǵyndardyń talap-talǵamyna saı zamanaýı úlgidegi sándi kıim túrlerin de shyǵarady. Qazaqstandyq mazmundaǵy úles-salmaǵy 80 paıyzdan asqan ónimderimizdiń ótimdiligin ósirý úshin sapa, fab­rıka qabyrǵasynda dızaın zerthanasy quryldy. Innovasııalyq konstrýktorlyq bıýro jumys isteıdi. Istiń bári osy zamanǵy ozyq tehnologııalyq qondyrǵylar arqyly atqarylady. О́ndiristik múmkindikterdi keńeıtý arqasynda 200 jańa jumys orny quryldy. Tutynýshy talabyn tolyqtaı qamtamasyz etetin ismer mamandar sanyn arttyrý úshin seriktestik janynan ashylǵan qysqa merzimdi qaıta daıarlaý toptaryn ashyp, ózimizdiń jas qyzdarymyzdy, qolynan is keletin kelinshekterdi tájirıbelik turǵyda oqytyp, biliktiligin arttyryp jatyrmyz. «Sáýle» tigin-mata fabrıkasy – elimizdegi mata óńdeý jáne kıim tigý isindegi birden-bir aldyńǵy qatarly ozyq tehnologııamen qamtylǵan fabrıka. Sondaı-aq, aldaǵy kúnderde bizdiń ónimimiz eń sapaly buıymdarymen, sándi de qonymdy kıim-keshekterimen ishki naryq pen otandastarymyzdyń talabyn tolyq qamtamasyz ete alatyn bolady. Oǵan bizdiń kúsh-jigerimiz de, básekelestikke degen qabiletimiz de tolyq jetetindigine senimimiz zor. Dáýren ÁLIMBEKOV, «Sáýle» mata-tigin fabrıkasynyń dırektory.                           ALMATY.