Oblystyq mádenıet, arhıvter jáne qujattama basqarmasyna qarasty Shoqan Ýálıhanov atyndaǵy oblystyq ǵylymı-ámbebap kitaphanasy uıymdastyrǵan is-shara barysynda jańadan jaryq kórgen birqatar kitaptyń avtory men baspagerler kitapqumar oqyrmanmen kezdesýler ótkizip, pikir almasty.
«Festıval aıasynda ótkizilgen jármeńkeniń oqyrman úshin paıdasy mol. Biz birinshe kezekte kórkem ádebıet pen ǵylymı tanymdyq ádebıetti dáripteýge den qoıdyq. Qalamgerlerdiń jazǵan dúnıesin jurt ishinde nasıhattaýǵa basymdyq berdik.
Negizgi aýdıtorııanyń jastar bolǵany belgili. Sondyqtan olardyń boıynda kitap oqýǵa qyzyǵýshylyqty arttyrsaq degen nıet boldy. Ásirese jastardyń ǵylym men ǵylymı kitaptarǵa degen ustanymymen tanyssaq degen nıettiń údesinen shyqqan sekildimiz», deıdi Sh.Ýálıhanov atyndaǵy kitaphana dırektory Elmıra Abdınova.
Janazyq jármeńkesi aıasynda birneshe is-shara uıymdastyryldy. Jyl ishinde eń kóp kitap oqyǵan azamattar arnaıy syılyqtarmen marapattalsa, «Kitaphanalar jáne rıteıl»: tájirıbe almasý» alańyna qatysqan mamandar baspa men kitap dúkenderiniń jumysy, marketıngtik kontenttiń sapasyn kóterý týraly oılarymen bólisti.
Festıval-jármeńkeniń ekinshi kezeńinde ózge elden kelgen mártebeli meımandar men belgili aqyn-jazýshylarmen kezdesýler ótkizildi. Is-sharaǵa belgili jazýshy Júsipbek Qorǵasbek, Jazýshylar odaǵy basqarma tóraǵasynyń orynbasary Beıbit Sarybaı, aqyn Marjan Ershý bastaǵan ózge de qalamgerler qatysty.
Jármeńke aıasynda Qanat Tileýhannyń az ýaqyt buryn jaryq kórgen, qazirgi kezde oqyrman tarapynan qyzý talqylanyp jatqan «Shatyrdaǵy áıel» kitabynyń tanystyrylym rásimi ótti. Sondaı-aq ózge de birqatar qalamgerdiń, jergilikti avtorlardyń kitaptarynyń tusaýkeser rásimi uıymdastyryldy.
«Jármeńkede jurtshylyqtyń zor yntamen kitap alyp jatqany qýantty. Kelýshilerdiń arasynda kitapqumarlar da, kitapqa asa qyzyqpaıtyndar da bar shyǵar. Bastysy, kez kelgen úıge kitap barsa, oqyrman tabylady. Mundaı is-sharalar rýhanı qundylyqtarymyzǵa sony serpin beretini anyq. Dúken bir jerden saýda jasasa, jármeńke degen kóshpeli ǵoı. Osy kóshtiń basy aýyldarǵa da burylsa jón bolar edi», deıdi jazýshy Júsipbek Qorǵasbek.
Taraz
