Jańadan qurylǵan Marqakól aýdanyna Tarbaǵataı aýdanynyń ákimi Darhan Jórgekpaev, máslıhat tóraǵasy О́mirhan Qanaǵatov tarbaǵataılyqtardyń ystyq sálemin jetkizip, eldiń atynan oqýshylarǵa tátti syılyqtar, balalarǵa arnalǵan kitaptar men oıynshyqtar tabys etti. Sondaı-aq kóktemi kesh keletin óńirge qajet-aý dep motopompa tartý etti.
– ShQO ákimi Ermek Bedelbaıulynyń tapsyrmasy boıynsha Marqakóldi kórip, jańa aýdanǵa qandaı kómek bere alamyz degen oımen keldik. Jergilikti turǵyndarmen tanysyp, áleýmettik nysandardy aralap kórdik. Biz árqashan qolushyn berýge daıynbyz. Tósqaıyń aýylyndaǵy mekteptiń materıaldyq-tehnıkalyq bazasyn jaqsartýǵa ázirmiz. Sondaı-aq bilim oshaǵynyń aldyna vorkaýt alańyn ornatyp bermekpiz, – dedi Tarbaǵataı aýdanynyń ákimi Darhan Jórgekpaev.
О́zderi de jańa qurylyp jatqan Tarbaǵataı aýdanynyń halqyna marqakóldikter rızashylyǵyn bildirdi.
– Tarbaǵataı aýdanynyń halqyna kóp rahmet. Qar qalyń, jol alys bolsa da, bizge kelip, kómekterin kórsetip jatyr. Aldaǵy ýaqytta bizge vorkaýt alańyn ornatyp beremiz dep qýantty, – dedi Tósqaıyń orta mektebiniń oqýshysy Aılın Aqylbekova.
Prezıdent Jarlyǵymen qurylǵan Marqakól aýdanynyń áleýmettik-ekonomıkalyq damýyna kórshiles aýdandardyń kómek qolyn sozyp jatqandary qýantady. Sondaı-aq Zaısan aýdanynyń ákimi Aelıta Ahmetsálimqyzy Tósqaıyń aýyldyq okrýgindegi mekteptiń oqýshylaryna táttiler, kıim-keshekter, rezeńke etikter, aýyl turǵyndaryna qajetti dári-dármekterdi aparyp berdi.
– Zaısan aýdany Marqakól óńirin qoldaýǵa árqashan daıyn. Búgin, mine, jańa qurylyp jatqan aýdanǵa kelip, jaǵdaıymen tanysyp qaıttyq. Kishigirim kómegimizdi ala keldik. Bolashaqta balalar oınaıtyn zamanaýı alań salyp bersek degen oıdamyz. Marqakóldik kishkentaı dostarymdy Zaısan aýdanyna kelip, óńirdiń tarıhymen, áleýmettik nysandarmen tanysýǵa shaqyryp otyrmyn. Tabıǵaty ásem Marqa óńiriniń bolashaǵy zor, – deıdi Zaısan aýdanynyń ákimi.
О́z kezeginde aýyl turǵyndary da árqashan dostyq qushaǵyn jaıatyn Zaısan halqyna alǵys bildirdi. Aıta keteıik, Zaısan aýdany Marqakól óńirine qystaı kómek kórsetip keledi.
– Bıyl biraz el jemshópten qınalyp qaldy. Sol kezde Zaısan halqy bizge qolushyn berip, 500 túk shóp jibergen edi. Osy joly da jańa aýdanǵa kómegin berip jatyr. Alǵystan basqa aıtar joq. Birligimiz arta bersin! – dedi Tósqaıyń aýylynyń turǵyny Baqytbek Turataýov.
Marqakól aımaǵyna arnaıy kelgen Zaısan aýdandyq máslıhatynyń tóraǵasy Erkebulan Zaǵyparov ta izgi tilegin bildirdi.
– Oblys basshylyǵynyń Marqakól óńiriniń jaǵdaıymen tanysyp qaıtý usynysyn Zaısan jáne Tarbaǵataı aýdandary qup alyp, búgin kıeli jerge kelip, turǵyndarmen kezdestik. Zaısan aýdany máslıhatynyń depýtattarynyń ystyq yqylasyn jetkizip, Tósqaıyńǵa mańaıdaǵy aýyldardan kelip, ınternatta jatyp oqıtyn oqýshylarǵa sporttyq kıimderdi tabys ettik. Eńsesin endi tiktep jatqan Marqakóldi demeýge árqashan ázirmiz, – dedi E.Zaǵyparov.
Iá, qashanda bir-birimizge demeý bolǵan elmiz. Bul joly da Zaısan men Tarbaǵataıdyń azamattary myqtylyǵyn, tektiligin kórsetti.
Shyǵys Qazaqstan oblysy
