Sýrette: merekelik is-shara kórinisteri
Saltanatty ant qabyldaý rásiminen keıin basqarma bastyǵy, podpolkovnık Rýstam Saıdımarov mereıli mereke qarsańynda boryshyn adal oryndaýǵa ant qabyldaǵan áskerı qyzmetshilerdi quttyqtady. Ol óz sózinde bul rásimniń alar orny aıryqsha ekenin ataı kele, áskerı mindet qanshalyqty qıyn bolǵanymen, jarǵyda kórsetilgen talapty oryndaý basty mindet ekenine erekshe toqtaldy. Jas sarbazdardy aldaǵy ýaqytta antyna adal bolyp, qyzmetterin minsiz atqarýǵa shaqyrǵan basqarma bastyǵy Qazaqstan Respýblıkasy Ulttyq qaýipsizdik komıtetiniń tóraǵasy Ermek Saǵymbaevtyń quttyqtaý hatyn oqyp berdi.
Merekelik shara barysynda qyzmettik ıtterdiń tájirıbesi men daıarlyǵy saralanǵan jarys uıymdastyryldy. Jarys qorytyndysynda memlekettik shekaranyń senimdi kúzetilýin qamtamasyz etý isine qosqan úlesi men qyzmettik mindetin adal atqarǵany úshin birqatar kınologııa mamandary marapattaldy.
Saltanatty sharadan keıin kınologııa basqarmasy bastyǵynyń orynbasary, polkovnık Nurǵalı Nurmanov qyzmettik ıtterdiń emhanasyn, ashanasyn, jasyna qaraı baǵylatyn jáne túrli baǵyttar boıynsha úıretiletin oryndarymen tanystyrdy. Olardy baǵyp, baýlýmen qatar, basqarmanyń tarıhyna da keńinen toqtaldy.
Qyzmettik ıtteriniń pıtomnıgi 1976 jyly F.Dzerjınskıı atyndaǵy joǵary komandalyq shekara ýchılıshesiniń bólimshesi bolyp qurylǵan. 1982 jyly Qyzyl Týly Shyǵys shekara okrýgine berilip, okrýg áskerlerine qyzmettik ıtterdi ósirý, nusqaýshylar daıyndaý boıynsha bólim uıymdastyrylǵan. 1985 jyly qurylysy aıaqtalǵan pıtomnık nysany paıdalanýǵa berilip, 2125 áskerı bólimi degen shartty ataýmen atalǵan. 1997 jyldan QR Ulttyq qaýipsizdik komıteti tóraǵasynyń buıryǵymen qyzmettik ıtter ortalyq pıtomnıgi bólek áskerı bólim bolyp qyzmet isteı bastaǵan. 
«Bizdiń qyzmettik kınologııa basqarmasy elimizdegi shekara áskerlerine jylyna 300-ge jýyq qyzmettik ıt daıyndaıdy. Aldymen ıtterdiń ata-tegi zerdelenedi. Tuqym qýalaıtyn aýrýynyń bar-joǵy anyqtalady. Bes týý bólimshesinde taza tuqymnan dúnıege kelgen kúshikter arnaıy orynda eki aı baǵylady. Ol jerge bógde adam kirmeıdi. Tórt aıdan keıin esirtki, jarylǵysh zattar, valıýta, qustardy, ań terisi men múıizin jáne adam izdeý, taǵy basqa kerekti baǵyttar boıynsha úıretiledi. Tórtaılyq kezinen qarý nemese jarylǵysh zattardyń dybysynan qoryqpaıdy. Alty aı bolǵandaryn elimizdiń ár óńirindegi shekara qyzmetinen kelgen áskerılermen birge úıretip, jattyqtyryp, olardy bir-birine beıimdeımiz. Itterimiz TMD men Ortalyq Azııada ótken saıystarda júldeli oryndardy ıelenip júr. Bıyl naýryz aıynda bizdiń bir ıt Eýropa chempıony atandy», deıdi podpolkovnık Rýstam Rýslanuly.
Qyzmettik kınologııa basqarmasynda negizinen belgııalyq, nemis, gollandııalyq ıt tuqymdary ósiriletin bolsa, Prezıdent tapsyrmasy aıasynda ótken jyldan bastap tazy men tóbetti ósirip, baýlý eksperımenti bastalǵan.
Memlekettik shekaranyń tynyshtyǵyn qorǵaýda tabandylyq tanytyp júrgen shekarashylardyń senimdi serigine aınalǵan qyzmettik ıtterdiń kómegi orasan zor. Statıstıkaǵa súıensek, shekaradaǵy quqyqbuzýshylyqtyń 80 paıyzy ıtterdiń kómegimen toqtatylatyn kórinedi. Bul oraıda QR UQK shekara qyzmetiniń qyzmettik kınologııa basqarmasy elimiz boıynsha qyzmettik ıtterdi úıretý men olardyń nusqaýshylaryn daıyndaýǵa súbeli úles qosyp keledi.
Almaty oblysy
