Nıkıta, Ksenııa jáne Bogdan qazaq balabaqshasyna keldi

Aýdan ortalyǵy – Tereńkól­de jańa balabaqsha ashyldy. Kópten kútken qýanyshty balalar men ata-analar úshin «NVS Stroıtel» seriktestigi syıǵa tartty. Qurylysshylar burynǵy ınternat úıin kúrdeli jóndeýden ótkizip, qaıta jańartty. Bala­baqshanyń ereksheligi sol, munda kishkentaılar 1,5 jastan 3 jasqa deıin qabyldanady. Tár­bıeshiler bóbekjaı dep ataıdy. Qazir aýdan ortalyǵynyń 33 turǵyny úshin jańa jumys oryndary ashyldy. Iаǵnı balabaqshada bilimdi, bilikti tárbıeshiler qyzmet ete bastady. Taǵy bir qýantarlyǵy sol, qazaq tilinde tárbıe beretin balabaqshaǵa balalaryn jetektep ózge ult ókilderiniń ata-analary da keldi. Osy jerde týyp-ósken olar memlekettik til – qazaq tili dep sanaly túrde túsinedi. Sóıtip, 90 balanyń 27-sin ózge ult ókilderiniń balalary qurap otyr. Mysaly, Slava Rybalkonyń sheshesi Elena kásipker, Nıkıta Dıdenkonyń anasy Valentına bolsa bizdiń áriptesimiz, aýdandyq «Zarıa» gazetiniń redaktory, Ksenııa Býroshkına men Bogdan Efımenkonyń analary Natalıa men Tatıana aýdandyq aýrýhanada medbıkeler, Elızaveta Kýlıstiń anasy Natalıa aýdandyq poshta bóliminde, Kırııl Dýdarevtiń anasy Oksana kásipkerlik salasynda jumys isteıdi eken. – Bul – ata-analardyń otba­sylyq sheshimderi. Muny kish­kentaı balalarymyzdyń áke-shesheleriniń ózderi turyp jatqan týǵan Otandaryna, aýyldaryna degen qurmeti dep túsinemiz. Elimizdiń bolashaǵy – qazaq tilinde, balalarymyzdy balabaqshadan bas­tap qazaqstandyq patrıotızm rýhynda tárbıeleıtin bolamyz. Elbasynyń saıasatyn qoldaıtyn tatý tirlikte ómir súrip jatqan bizdiń aýdanymyzdaǵy ózge ult ókilderiniń bir el, bir taǵdyr deıtin nıet-peıilderi uzaǵynan bolsyn, – deıdi «Talbesiktiń» meńgerýshisi Gúlbarshyn Baqytqyzy. Kishkentaılar endi «Keleshek» baǵdarlamasy arqyly tárbıe­lenedi. Aýdan ortalyǵynda «Talbesikten» basqa, «Aqbota», «Baldáýren» balabaqshalary da bar. Elimiz táýelsizdigin alǵan jyldardan beri aýdan ortalyǵynyń ataýy ózgerip, Tereńkól ataldy, jańa zamanǵa saı salynǵan qazaq mektebi boı kóterdi. Farıda BYQAI,  «Egemen Qazaqstan». Pavlodar oblysy, Qashyr aýdany.