Foto: kaz.orda.kz
Salaǵa jaýapty mınıstrlik pen Jetisý oblysynyń ákimdigi taqyryp tóńireginde jýrnalısterdiń biliktiligin arttyrý úshin BAQ ókilderiniń basyn qosty. Taldyqorǵandyq áriptesterimiz B.Quranbek atyndaǵy Jýrnalıster úıine jıylsa, respýblıkanyń ózge óńirindegi tilshiler Zoom platformasy arqyly kásibılerden keńes aldy.
Aldymen sóz alǵan BAQ salasyndaǵy memlekettik saıasat departamentiniń dırektory Qaınar Ahetov «Mass-medıa týraly» Zańǵa engiziletin túzetýler sońǵy saty Senatta talqylanyp jatqanyn jetkizip, keıingi ózgeristerden qulaǵdar etti.
Ahetovtiń aıtýynsha, aımaqtaǵy jýrnalısterdiń áleýmettik áleýetin kóterýdi kózdeıtin «press-karta» jeńildigin engizýdi mamandardyń ózi maquldamaǵan. Oǵan medıa tulǵalardy bóle-jaryp qaraý qadamynyń aldyn alý sebep bolypty.
Alaıda jýrnalıst, aqyn Aıtaqyn Bulǵaqov bul máseleniń salmaǵyn saralaý úshin «Táýelsiz sarapshylardy» iske tartýdy usyndy.
«Alataý» gazeti Respýblıkalyq qoǵamdyq-saıası basylymnyń bas redaktory tilshilikke qatysty birqatar zańnamalyq bastamalaryn ortaǵa saldy. Olardyń qatarynda Memlekettik jáne jekemenshik basylymdardyń mártebesin teńestirý, «Aqparat salasynyń úzdigi» ataǵyna usynýdyń jolyn qysqartý, jergilikti jýrnalısterdiń jalaqysyn da kóterý men gazetter úshin ótkiziletin tenderge jylda telmirtpeı 3 jylda bir-aq ótkizý, jalpy jýrnalısterdiń quqyqtyq qoldaý máseleleri bar.
BAQ salasyndaǵy memlekettik saıasat departamentiniń dırektory Qaınar Ahetov «Mass-medıa týraly» Zańǵa engizilgen sońǵy túzetýlerde BAQ úshin memlekettik tapsyrysty 3 jylǵa deıin jasaý múmkindigi qarastyrylyp otyrǵanyn tilge tıek etti.
«Jýrnalısterdiń kásibı quqyqtaryn qorǵaýǵa memleket te múddeli. Endi memlekettik tapsyrys 2 negizde qarastyrylady. Birinshisi: memlekettik BAQ úshin – memlekettik tapsyrys jáne jeke menshiktegi BAQ úshin – memlekettik grant. Tapsyrysty alýǵa barlyq medıa quqyly. Sondaı-aq tapsyrys berý merzimin uzartý arqyly kontent sapasyn arttyrý maqsaty qoıylyp otyr. Memleket osy tapsyrys negizinde ǵana BAQ-ty qarjylandyryp, kontentin satyp ala alady», dedi Q.Ahetov.
Qazaqstanda resmı 5 000 BAQ tirkelse, onyń 80-90 paıyzy jekeniń jaýapkershiliginde. Osy tusta kópshilikke kásibı, saýatty, tekserilgen materıal usynýda jýrnalısterdiń qoǵamdaǵy statýsyn shegeleý sheshimin tabý kerek.
Quzyrly organdarmen jedel aqparat almasý jumysynda da birshama kedergiler bary jasyryn emes. Jınalǵan jýrnalıster bul máseleni de umyt qaldyrmady.
«Jýrnalısterdiń kásibı qyzmetiniń quqyqtyq jáne ádeptilik aspektileri» kýrsynyń ekinshi bólimi «KazMediaNetwork» qoǵamdyq birlestiginiń atqarýshy dırektory Baqtygúl Býrbaevanyń sheberlik dárisine ulasty.
Tájirıbeli jýrnalıst zańnamadaǵy ózgerister men medıa álemindegi mańyzdy mindetterdi áńgimelesý, tanymdyq aqparat berý, oıyn ádisi arqyly utymdy jetkize bildi. Halyqaralyq BAQ-taǵy quqyq buzýshylyq jaǵdaılarynyń nátıjesin bólisý arqyly aqparatty árdaıym yjdahattylyqpen tekserýge, beıtarap ustanymdy ustyn etýge shaqyrdy.
Sondaı-aq Baqtygúl Býrbaeva áleýmettik jeliden alynǵan aqparattan soń álek bolyp qalmaý úshin, oqıǵanyń baıybyna barý, astaryna úńilý, jazba avtorynan kelisim alý – jýrnalıstıkalyq qyzmettiń negizgi aspektisine aınalǵanyn aıtty.
Búgingi BAQ-tyń eleı bermeıtin kelesi túıini – avtorlyq quqyq. Kez kelgen aqparattyń alynǵan tórkinin kórsetý, birinshiden, oqyrmanǵa qurmet, senimdi derekkóz usyný bolsa, ekinshi rette jýrnalısterdiń keleńsizdikke tap bolmaýynyń kepili. Sondyqtan derekkózdi aktıv siltememen aıshyqtaý – qajet qadam.
Jýrnalıster kásibı quzireti men quqyǵy týraly jekelegen usynystaryn «Mass-medıa týraly» Zań qabyldanǵannan keıin eki aı ishinde aıta alady.
