Ázirge el qorjynyna eń sońǵy joldamany velotrekten Qazaqstan quramasy saldy. Bul joldama qoldanylmaǵan kvotalardy qaıta bólý kezinde buıyrdy. Elimiz kvotany keırınnen alǵanymen, bul sportshynyń sprıntte de synǵa túsýine múmkindik beredi. Kvota jekelegen sportshyǵa emes, komandaǵa beriletinin aıta ketken jón.
Ústel tennısi. Bul sport túrinen 17-19 mamyr aralyǵynda Tashkentte Ortalyq Azııa aımaqtyq irikteý týrnıri ótedi. Týrnır barysynda Olımpıada kvotasy sarapqa salynady. Joldamaǵa elimiz sapynan Kırıll Gerasımenko, Alan Kurmanǵalıev, Sarvınoz Mırkadırova, Anastasııa Lavrova talasady. Búgingi tańda oqý-jattyǵý jıynyn aıaqtaǵan sportshylar Tashkentke ushyp ketti.
Sporttyq gımnastıka. О́zbekstan astanasy sporttyq gımnastıkadan lısenzııalyq Azııa chempıonatyn qabyldaıdy. Atalǵan synǵa ulttyq quramany bastap baratyn bas bapker Aleksandr Kım Mılad Karımı, Narıman Qurbanov, Ilııas Azızov, Farýh Nábıev, Dmıtrıı Patanın, Dıas Toıshybek sııaqty sportshylarymyzǵa senim artyp otyr. Komanda sapynda Karımı kópsaıystan, Qurbanov at snarıadynan Olımpıada joldamasyn alyp qoıǵan. Qalǵan sportshylar qurlyqqa bólingen bir joldamaǵa talasady.
Dzıýdo. Osy saıystan Abý-Dabıde ótetin álem chempıonaty Olımpıada aldyndaǵy iri doda bolmaq. Olımpııa oıyndaryna ár salmaqtan bir sportshynyń ǵana qatysýyna ruqsat. Sondyqtan bul álem birinshiliginiń nátıjeleri bapkerler quramy men Ulttyq federasııalardyń da jumysyn jeńildetetini anyq. Bizdiń komandada erlerden 60, áıelderden 48 kg salmaqta másele sheshile qoıǵan joq. Erler quramasynda úsh sportshy qajetti reıtıngilik upaılardy enshiledi. Olar – Maǵjan Shamshadın, Eldos Smetov, Nurqanat Serikbaev. Al áıelder arasynda Abıba Ábýjaqynova men Ǵalııa Tynbaeva kósh bastap tur. Joǵaryda atalǵan sportshylardyń ishinen Maǵjan Shamshadın ǵana álem chempıonatyna qatyspaıdy. Bapkerler sońǵy Grand Slam týrnırinde júlde alǵan Eldos Smetovke senim artty. Al Maǵjan jaqynda ǵana jaraqatyna baılanysty úzilisten oraldy. Smetov bolsa álem chempıony atanyp, jer júzilik jarysta eki ret qola alǵan balýan. Biraq qazirgi olımpıadalyq sıkl ol úshin asa sátti ótip jatqan joq. Eski jaraqattary syr berip, óziniń bar áleýetin kórsete alar emes. Sanaýly kúnde bastalatyn álem chempıonaty Eldostyń qazirgi babyn baıqatady. Sebebi atalǵan týrnır qorytyndysyna qarap, onyń Parıjge barý-barmaýy belgili bolady.
Aleksandr Kım,
sporttyq gımnastıkadan Qazaqstan quramasynyń bas bapkeri:
– Komanda Azııa chempıonatyna tolyq daıyn. Bul syndaǵy basty qarsylastarymyz – Soltústik Koreıa, О́zbekstan, Vetnam jáne Qytaılyq Taıpeıden keletin kópsaıysshylar. Bizdiń sportshylar birinshi aýysymda baq synaıdy. Qytaılyq Taıpeı men О́zbekstan – keshki aýysymda. Bul da áserin tıgizedi. Dese de, keshegi jattyǵý kezinde komanda jaqsy kórindi.
Nurbol Súleımenov,
dzıýdodan Qazaqstan quramasynyń bas bapkeri:
– Sportshylarymyz mamyr aıynda úsh mańyzdy jarysqa qatar daıyndaldy. Onyń aldynda Azııa chempıonaty, Grand Slam jarystary nátıjesinde álem chempıonatyna qatysatyn quram jasaqtaldy. Biz úsh salmaqta eki sportshydan qoıǵandyqtan, 90 kıloǵa deıingi salmaqtaǵy sportshylar tek aralas komandalyq jarysqa qatysady. Eskerte ketetini, álem chempıonatyna qatysýǵa dzıýdoshylar Olımpıadalyq reıtıngte TOP-100 tiziminde bolý kerek. О́kinishke qaraı, jas sportshylarymyz bul tizimge endi ǵana enip keledi.
Elmıra Álıeva,
ústel tennısinen Qazaqstan quramasynyń bas bapkeri:
– Bizdiń aldymyzda tórtjyldyq dodasyna joldama beretin jarysqa babymyzda baryp, erler men áıelder arasynda bir-birden, jalpy esebi eki joldama alý mindeti tur. Qazirgi tańda sportshylarymyz jaqsy daıyndyq ótkizdi. Qańtar aıynan beri josparlanǵan týrnırlerdiń bárine qatystyq. Jattyǵý jıynynda jekelegen qateliktermen jumys istep, árbir tennısshiniń oıyn mánerin jetildirýge tyrystyq.
