Prezıdent Qasym-Jomart Toqaev pen QHR tóraǵasy Sı Szınpın úkimetter aldyna taýar aınalymyn 100 mlrd dollarǵa deıin jetkizý mindetin qoıǵan bolatyn. Aýyl sharýashylyǵy salasyndaǵy ózara is-qımyldy arttyrý keleshegi qaraldy. Bir jyl ishinde agroónerkásip (AО́K) kesheni óniminiń taýar aınalymy 1,7 ese ósip, osy jyldyń birinshi toqsanynda bul kórsetkish taǵy 6%-ǵa artty. Bul rette otandyq aýyl sharýashylyǵy taýarlarynyń Qytaıǵa eksporty bir jyl ishinde 84%-ǵa ósti.
Oljas Bektenov Qazaqstannyń Qytaı naryǵyna organıkalyq jáne ekologııalyq taza aýyl sharýashylyǵy ónimderin jetkizý kólemin arttyrýǵa daıyn ekenin atap ótti. Buǵan Qytaı tarapynan elimizden et jáne qus ónimderin ákelýge qoıylǵan shekteýlerdiń birtindep alynyp tastalýy oń serpin beredi. AО́K salasynda tereń óńdeý boıynsha birlesken jobalardy qurý basym baǵyt retinde belgilendi.
Lıý Gochjýn QHR-dyń jasandy ıntellekt, elektrondy kommersııa, spýtnıktik baılanys jáne «jasyl» energetıkany damytý salasyndaǵy yntymaqtastyqty arttyrýǵa degen nıetin jetkizdi.
Talqylaý barysynda tranzıttik-kólik salasyndaǵy yntymaqtastyqqa, jańa serpindi ınvestısııalyq jobalar arqyly ındýstrııalyq-ınvestısııalyq ózara is-qımyldy keńeıtýge (búgingi tańda jalpy somasy 14,5 mlrd dollar bolatyn 45 birlesken joba iske asyrylyp jatyr), sondaı-aq óńiraralyq ári mádenı-gýmanıtarlyq qatynastarǵa nazar aýdaryldy.
«Qazaqstannyń Qytaıdaǵy týrızm jyly» aıasyndaǵy is-sharalar eki eldiń týrıstik áleýetiniń arta túsýine yqpal etpek. Qazaqstan-Qytaı úkimetaralyq kelissózderi eki memleket basshylary arasynda qol jetkizilgen barlyq ýaǵdalastyqtardy júzege asyrý úshin salalyq deńgeıde jalǵasyp jatyr.
