Qurlyq áskerleri áskerı ınstıtýtynyń orkestri oryndaǵan áýenmen týǵan kún ıesi vals bıledi.
– Tamara Aleksandrovna bul ásem bıdi qalaı jaqsy kóretinin bilemiz. Osy sátte sizdi HH ǵasyrdaǵy eń qandy soǵystan ótti dep kim aıtady, qanshama qıyndyqqa qaramaı, shıraqtyǵyńyzdy saqtaǵanyńyz úshin shyn júrekten qýanyp, tańdanamyz, – dedi Desanttyq-shabýyldaý áskerleri qolbasshysynyń tárbıe jáne ıdeologııalyq jumys jónindegi orynbasary, polkovnık Radjan Janysov.
Tamara Maksımovanyń jastyq shaǵy qıyn kezeńmen tuspa-tus keldi. Soǵys bastalǵan kezde ol Máskeý qalasyndaǵy mektepterdiń birinde 9-synypty bitirgen edi. Túlekter áskerı komıssarıatqa kelip, maıdanǵa barǵysy keletinderin aıtatyn. Osylaısha, Volokolamsk tas jolyndaǵy gospıtalǵa jiberildi. Aldymen tirkeý bóliminde jumys istep, sodan keıin oqyp, medbıke boldy.
Sóıtip, jas qyz aýyr jaralanǵan jaýyngerlerge táýlik boıy kútim jasap, medısınalyq járdem kórsetti. Tamara Aleksandrovna úılerine hat jazýǵa múmkinshilikteri joqtar úshin hat jazǵanyn esine alady. Gospıtalda ol bolashaq kúıeýi Konstantındi kezdestirip, onymen 2007 jylǵa deıin birge baqytty ómir súrdi.
Tamara Maksımova 1943 jyly aýyr jaraqat alǵannan keıin medbıke densaýlyǵyna baılanysty jumystan shyqty. Soǵystan keıin aldyna úlken maqsat qoıǵan qyz ekstern retinde 10-synypty bitirip, Máskeý ınstıtýtynyń tarıh jáne fılologııa fakýltetine oqýǵa tústi. Keıin dıssertasııa qorǵap, ǵylym kandıdaty dárejesin alyp, Ál-Farabı atyndaǵy Qazaq ulttyq ýnıversıtetinde 16 jyl jumys istedi.
Búginde Tamara Aleksandrovna óziniń jasyna qaramastan, «Uly Otan soǵysy ardagerleri, tyl eńbekkerleri jáne Soǵys balalary keńesi» QQ qorynyń qamqorshylyq keńesiniń múshesi. Al 2020 jyly Jeńistiń 75 jyldyǵy qarsańynda Almatydan kelgen ardager búkilreseılik «Shıt ı roza» qoǵamdyq syılyǵynyń laýreaty atanyp, syılyqty tapsyrý rásimi Máskeýdegi Kreml saraıynda ótti.
Tamara Aleksandrovna II dárejeli «Otan soǵysy» ordenimen, «Máskeýdi qorǵaǵany úshin» medalimen basqa da nagradalarmen marapattalǵan.
