Zerthananyń ashylý rásimine QHR-dyń Qazaqstandaǵy tótenshe jáne ókiletti elshisi Chjan Sıao, Ál-Farabı atyndaǵy QazUÝ-dyń basqarma tóraǵasy-rektor Janseıit Túımebaev, QHR memlekettik keńesiniń keńse basshysynyń orynbasary Go Veı, QHR úkimetiniń Eýrazııa isteri jónindegi arnaıy ókili Lı Hýeı, QHR aýyl sharýashylyǵy mınıstriniń orynbasary Chjan Sınvan, QHR kommersııa mınıstriniń orynbasary Lı Feı, oqý ordasynyń ǵalymdary men oqytýshy-professorlar quramy, stýdentter qatysty.
Jańa ǵylymı zerthana telekommýnıkasııalyq baılanys júıeleriniń mamandaryn daıarlaýǵa, jańa tehnologııalardy meńgerip, ınternet jyldamdyǵyn jetildirýge, 6G jelisin engizýge múmkindik beredi. Bolashaqta ortalyq zertteý jumystaryn baqylap qana qoımaı, joǵary tehnologııalyq baılanys qurylǵylarynyń óndirisine, olardy qurastyrýǵa jáne iske qosýǵa da qatysa alatyn alańǵa aınalady.
«Zerthananyń QazUÝ bazasynda ashylýy Qazaqstan men Qytaı tarapy úshin aıtýly oqıǵa dep sanaımyn. Qazirgi tańda kommýnıkasııa salasy álem boıynsha qarqyndy damý ústinde. Bul jańasha ózgeristerden qalys qalýǵa bolmaıdy. Sondyqtan atalǵan salada mamandardy daıarlaýǵa, ınternet jelisin damytýda osyndaı ortalyqtardyń kóp bolýy mańyzdy», dedi QHR memlekettik keńesiniń vıse-premeri Lıý Gochjýn.
«5G/5.5G kommýnıkasııalyq tehnologııalar» zerthanasy Qytaıdyń Qazaqstanda ashylǵan fılıalynda júzege asyp otyr. Qytaı – elimiz úshin bizdiń senimdi seriktesterimizdiń biri. Osy turǵyda QazUÝ Qytaı JOO-larymen ǵylym jáne joǵary bilim boıynsha tyǵyz qarym-qatynasta. Búgingi ashylǵan ǵylymı zerthana eki memlekettiń joǵary oqý oryndary úshin aldaǵy ýaqytta birlesip jumys isteýge jáne yntymaqtastyqty odan ári arttyrýǵa mol septigin tıgizedi dep sanaımyn», dedi rektor.
Ál-Farabı atyndaǵy QazUÝ men QHR Soltústik-batys polıtehnıkalyq ýnıversıteti birlesip ashqan zerthanaǵa Huawei kompanııasy demeýshilik kórsetti. Zerthana QazUÝ bazasyndaǵy Soltústik-batys polıtehnıkalyq ýnıversıtetiniń fılıalynda ornalasqan.
ALMATY
