Sýretti túsirgen – Erlan OMAR, «EQ»
Arnaıy lısenzııasy bar kompanııa oq-dárilerdi, qarý-jaraq pen áskerı tehnıkany, olarǵa arnalǵan qosalqy bólshekterdi daıyndap, satý, ornatý, jóndeý, qyzmet kórsetý jumystarymen aınalysady. Jobaǵa búginge deıin 2 mlrd teńgeden astam qarjy jumsalǵan.
«Kompanııa bes jyldan beri áskerı jáne azamattyq tehnıkaǵa arnalǵan dızeldik qozǵaltqysh pen onyń qosalqy bólshekterin óndirýmen aınalysady. Negizgi tapsyrys berýshi – Qorǵanys mınıstrligi. Memlekettik tapsyrys negizinde jumys isteımiz. Sondaı-aq ónimimizdi jaqynda Vetnam eline de eksporttaýdy qolǵa almaqpyz. Ázirge birneshe dana dvıgatel ol jaqqa daıyndalyp jatyr. Zaýyttyń óndiristik sehy tapsyryspen bir jylda shamamen 120 qozǵaltqysh shyǵarady. Bizde memleket otandyq ónimdi qoldaý maqsatynda aýyl sharýashylyǵy mashınalary nemese ózge de salalyq óndiriske arnalǵan tehnıkalardyń qozǵaltqyshyna qatysty tapsyrys aıasyn keńeıtse degen tilek bar. Al tapsyrys kólemi ulǵaısa, kásiporyndaǵy ónim sanyn odan ári ulǵaıtýǵa ábden bolady. Sondaı-aq jumysshylardyń da qatary kóbeıetini anyq», deıdi kompanııa dırektorynyń orynbasary Sanjar Ábdirahmanov.
Onyń aıtýynsha, kásiporynda bilikti mamandar eńbek etedi. Olardyń jumysyna qajetti qurylǵylar men jabdyqtar jetkilikti. Arnaıy qozǵaltqyshty synaýǵa arnalǵan zerthana da jumys istep tur. О́ndiriske kerekti ınfraqurylymnyń barlyǵy tartylǵan.
«Qazir kompanııada ákimshilik quramnan bólek, tájirıbeli 37 maman bar. Olar dızeldik qozǵaltqyshtyń bólshekterin qurastyrýmen, kúrdeli jóndeýmen aınalysady. Iаǵnı aýyr salmaqtaǵy tank pen jaıaý áskerge arnalǵan jaýyngerlik mashınasy, qysqasha «BMP» dep atalatyn kólikke arnalǵan qozǵaltqysh shyǵaramyz. Negizgi shıkizat – ıindi bilik pen porshen Reseıden keledi. Qalǵan bólshekter, ıaǵnı ónimniń 60 paıyzy ózimizde daıyndalady», deıdi óndiristik sehtyń basshysy Talǵat Jaýǵashtın.
Aıtýynsha, kásiporynnyń óndiristik-synaý keshenine dızeldik qozǵaltqyshtardyń synaǵyn júrgizýge akkredıttelgen «Synaq zerthanasy» mártebesi berilgen. Jańadan kelgen mamandarǵa tájirıbeli motor qurastyrýshylar men slesarlar kórgen-bilgenin úıretip, oqý-tájirıbeden ótkizedi.
«Bir qozǵaltqyshtyń barlyq bólshegi daıyn bolǵan jaǵdaıda, ony qurastyrýǵa 22 saǵat beriledi. Bul jumysty eki maman birlese atqarady. Biri – motor qurastyrýshy, biri – slesar. Budan keıin qurastyrylǵan qozǵaltqyshty zerthanaǵa kirgizip, arnaıy synaqqa 10 saǵat ýaqyt bólinedi. Munda ónim tolyq kompıýterlik dıagnostıkadan ótedi. Osylaısha, 32 saǵatta bir qozǵaltqysh daıyn bolady. Odan keıin qozǵaltqyshty tazalaý, syrlaý sııaqty qosymsha jumystar bastalady», deıdi.
О́ndiris ornynda jastardy tehnıkalyq mamandyqqa qyzyqtyrý maqsatymen túrli kezdesý bolyp turady. Byltyr ǵana Astana qalasynyń mektepterinen 9 jáne 11-synypty bitirýshiler zaýyt ishinde 2 aıǵa jýyq ýaqyt bolyp, arnaıy tájirıbelik sabaqqa qatysqan. Sol shákirtterdiń kóbi búginde tehnıkalyq mamandyqty tańdap, kolledj ben ýnıversıtette bilim alyp júr.
Aıta keteıik, aýmaǵy 4,2 gektar jerdi alyp jatqan kásiporyn ishindegi óndiristik sehtyń ózi birneshe bólimge bólinedi. Munda qoǵaltqyshtardy bólshekteýge jáne aqaýlardy joıýǵa, montajdaýǵa, bólshekterdi jýýǵa, tazalaýǵa arnalǵan arnaıy aýmaqtar bar. Tokarlyq jumystar men dánekerleý, kesý, joný bólmeleri de bólek-bólek ornalasqan. Arnaıy qosalqy bólshekter men daıyn ónimder qoımasy da jasaqtalypty. Jýyrda zaýyt basshylyǵy óndiristegi barlyq jabdyqty jańalamaq.
