Kollajdy jasaǵan – Qonysbaı ShEJIMBAI, «EQ»
Atyraý oblystyq qurylys basqarmasynyń basshysy Nurbergen Qusaıynovtyń aıtýynsha, turǵyn úılerdiń qurylysyn kúzde aıaqtaý kózdelgen. Qurylys kompanııalary alǵashqy kezekte 80 jeke úıdiń qurylysyn qolǵa alady. Bul úıler «Qazaqstan halqyna» qoǵamdyq qorynyń qarajaty esebinen salynady. Shaǵyn aýdanda osy kezge deıin joldan ózge ınjenerlik kommýnıkasııalar júrgizilgen.
«Atyraý oblysynyń ákimdigimen qol qoıylǵan arnaıy memorandým bar. Soǵan sáıkes jergilikti atqarýshy organ jańa úıler salý úshin jer ýchaskelerin sý baspaıtyn qaýipsiz aýmaqtan bólýdi qamtamasyz etedi. Jergilikti atqarýshy organ qurylys júrgizý merzimi men tehnıkalyq talaptardyń saqtalýyn, qurylys jumystarynyń sapasyn baqylaıdy», deıdi N.Qusaıynov.
Tasqyn sýdan zardap shekken qulsarylyqtardy tolǵandyratyn jaıt – ótemaqy máselesi. Osyǵan alańdaǵan 1 myńnan asa turǵyn ótemaqy máseleleri boıynsha 109 biryńǵaı baılanys ortalyǵyna júginipti. Ortalyq basshysy Aqmaral Batyrhanovanyń aıtýynsha, Jylyoı aýdanynda tótenshe jaǵdaı jarııalanǵan 4 sáýirden beri 6 myńnan asa qońyraý túsken.
«Qulsary qalasynyń turǵyndary baǵalaý qorytyndysyn daıyndaý, ótemaqy alý merzimine baılanysty saýaldy jıi qoıady. Kúndelikti tutynatyn aýyzsýdyń sapasy, jalǵan aqparatty anyqtaý máselesine alańdaıdy», deıdi A.Batyrhanova.
О́temaqy demekshi, keıingi kúnderi bul qarjyny alyp jatqan qulsarylyqtar qatary kóbeıip keledi. Máselen, 23 mamyrǵa deıin tasqyn sýdan zardap shekken 357 turǵyn ótemaqy alý úshin kelisimshartqa qol qoıdy.
«Arnaıy qurylǵan jumys komıssııasy 1 500-den asa nysandy baǵalaý qorytyndysyn daıyndady. Úıi sýǵa ketkendikten, ótemaqy alý týraly kelisimge qol qoıǵan 109 turǵynnyń jeke esepshotyna ótemaqy qarajaty aýdaryldy», dep málimdedi oblystyq jedel shtabtan.
Kóp jyldan beri Qulsary qalasynda turatyn Nurshat Áýelbaıdyń aıtýynsha, baǵalaý kompanııasy eseptep, usynǵan qarjy óziniń esebimen sáıkes kelgen. О́ıtkeni onyń úıi apatty dep tanylyp otyr. Endi sol úıdi buzady.
«Sý kirgen úıimniń quny ádil baǵalandy. Esepshotyma túsetin ótemaqy shyǵynymdy tolyǵymen jabady. Aqshalaı ótemaqyǵa jańa úı satyp alatyn shyǵarmyn. Reti bolsa, jańa úı salýym múmkin. Qazir bul máseleni otbasymyzben aqyldasyp otyrmyz», deıdi N.Áýelbaı.
Al Kúnzıra Tájiǵulovanyń úıine kirgen tasqyn sý metr deńgeıinde saqtalyp turǵan. Árıne, birneshe kún tasqyn sýdyń ortasynda turǵan úıde budan bylaı turý múmkin emes. Sol sebepten onyń úıi apatty jaǵdaı ekeni baǵalaý júrgizgen komıssııanyń sheshimimen rastalǵan. Al úı ıesi endi búlingen baspanasyn buzyp, jańasyn salýdy kózdep otyr.
Uzaq jyl berekeli tirliktiń uıasy bolǵan baspanasy apatty dep tanylǵandardyń qatarynda Gúlbarshyn Qońyrbaeva da bar. Qazir ol ótemaqy tóleý týraly kelisimge qol qoıǵan.
«Úıimiz apatty dep tanylǵan soń aqshalaı ótemaqy alý úshin 19 mamyrda barlyq qujatty tapsyrǵan edik. Sodan soń bankten esepshot ashtyq. Sol esepshtotqa 21 mamyrda ótemaqy qarjysy aýdaryldy. Endi jańa úı satyp alamyz», deıdi G.Qońyrbaeva.
Monoqalanyń baıyrǵy turǵynynyń biri Galına Qarajanova 20 mamyrda aqshalaı ótemaqy alý maqsatynda qujat tapsyrypty. Onyń da esepshotyna 21 mamyrda múliktik zalal úshin qarjy túsken.
Taǵy bir qulsarylyq Meıram Tilekbaev baǵalaý paraǵynda kórsetilgen qarjyǵa kelisimin beripti. Qazir aqshalaı ótemaqy alý úshin qujat jınap júr.
«Meniń úıim turýǵa qaýipti dep tanyldy. Qazir buzylyp jatyr. Jaqynda mamandar maǵan baǵalaý qorytyndysynyń paraǵyn ákeldi. Keltirilgen shyǵynǵa baılanysty eseptelgen qarjy kólemine kóńilim tolady», dedi M.Tilekbaev.
Oblystyq jedel shtabtyń málimetine súıensek, Qulsary qalasynda turǵyndarǵa baǵalaý qorytyndysyn tanystyrýǵa 20 mobıldi top jumyldy. Bul toptardyń músheleri kúsheıtilgen rejimde jumys istep júr. Olardyń jumysy turǵyndardyń búlingen múlkin baǵalaý aıaqtalǵanǵa deıin sozylady. Al baǵalaý jumysyn osy aptanyń sońyna deıin aıaqtaý kózdelgen.
Atyraý oblysy
