M.Ázilhanov sondaı-aq jalpyulttyq birlik pen qoǵamdyq kelisimdi saqtaý jolyndaǵy tabysty eńbekteri úshin shymkenttik assambleıa múshelerine alǵys aıtyp, etnosaıasat aıasynda birlese atqarar joba-josparlar jaıynda baıandady. Eldegi tatýlyqty kózdiń qarashyǵyndaı qorǵaý ári nyǵaıtý – memlekettik saıasattyń mańyzdy bóligi ekenin atap ótti.
«Prezıdent Qasym-Jomart Toqaev aýqymdy jumystyń negizgi baǵyt-baǵdaryn aıqyndap berdi. Ulttyq quryltaıdyń úshinshi otyrysynda aıtylǵan qundylyqtardy iske asyrýda Assambleıanyń zor áleýetin tıimdi paıdalanýdy júktedi. Álemdik ahýal kúrdelenip turǵanda «jurt bolyp jumylyp, ult bolyp uıysý» kerektigin nyqtap shegeledi», dedi ol.
Sessııada shahar basshysy, qalalyq QHA tóraǵasy Ǵabıt Syzdyqbekov ıdeologııa haqynda Memleket basshysynyń bergen tapsyrmalaryn megapolıste iske asyrý jaıyn pysyqtap, talqylap, aldaǵy jumystardy júıeleıtinin jetkizdi. Prezıdent júktegen mindetterdiń ishinde qala ákimi Assambleıa jumysyn elimizdiń jańa gýmanıtarlyq ıdeologııalyq doktrınasymen úılestirý, ınstıtýsıonaldyq áleýetin nyǵaıtý sekildi máselelerge erekshe toqtaldy. Megapolıs basshysy atalǵan mindetter aıasynda týyndaıtyn keshendi jumystardy atqarýǵa tek Assambleıa emes, qalalyq deńgeıdegi basqarmalar, aýdan ákimderi, oqý oryndary, jastar uıymdary men azamattyq qoǵam ınstıtýttarynyń áleýeti tolyq qoldanylatynyn aıtty. Qoǵamda Assambleıaǵa qatysty túrli pikir aıtylyp júrgenin joqqa shyǵarmaǵan qala basshysy: «Halqymyzdyń birligin nyǵaıtýǵa qyzmet etetin biregeı ınstıtýt retinde elimizde meken etetin barsha etnosty bir arnaǵa uıystyryp otyrǵan osy Assambleıa. Sondyqtan uıym aıasynda júrgizilgen memlekettik etnosaıasattyń nátıjesinde qoǵamda turaqtylyq pen etnosaralyq tatýlyq berik ornady», dedi. Ákim óz baıandamasynda bıyl kóktemgi tasqyn selden zardap shekken soltústik, batys aımaqtardaǵy turǵyndarǵa qolushyn sozý úshin Assambleıa 1500 tonnadan astam azyq-túlik pen eń qajetti zattar jóneltkenin, onyń ishinde shymkenttik etnomádenı birlestikterdiń úlesi 120 tonna gýmanıtarlyq kómekti quraǵanyn atap ótti. «Sý tasqyny kezinde el birligi is júzinde kórindi. Qınalǵan jurtshylyqqa halqymyz jumyla kómek berdi. Bul jaǵdaı birligimizdi bekemdep, ishki tatýlyqtyń óz tuǵyrynda ekenin dáleldedi», dedi ol.
Jıynda sondaı-aq qalalyq Assambleıa tóraǵasynyń jańa orynbasarlary taǵaıyndaldy. Uıymnyń janyndaǵy keńestiń usynysymen Tahırbek Nıshanbaev pen Tımýr Kazmın osy qyzmetke tańdap alyndy. Jıynda sonymen birge J.Táshenev atyndaǵy ýnıversıtettiń prorektory Ǵalymjan Bıtursyn, Qazaqstan ózbekteri etnomádenı birlestikteri «Dýstlık» qaýymdastyǵynyń tóraǵasy Ikramjan Hashımjanov, Shymkent qalasynyń ACCESS bitirýshileri «ASAA» jastar qoǵamdyq birlestiginiń jetekshisi, belsendi volonter Danara Saranova, Shymkent qalalyq máslıhatynyń depýtaty Ashat Nurlybaev, «Assambleıa jastary» uıymy qalalyq ókildiginiń belsendisi Tımýr Inkıjıno sóz sóılep, usynys-pikirlerin ortaǵa saldy.
Máselen Ǵ.Bıtursyn etnos jastary arasynda parasatty, adal azamattardy tárbıeleýge basa mán berý kerektigine toqtaldy. Sondaı-aq ol Prezıdent Ulttyq quryltaıda atap ótken jastardy buzatyn bes keselmen kúresý úshin bes negizgi mindetti oryndaý kerektigin alǵa tartty. Olar atap aıtqanda jastardyń quqyqtyq, qarjylyq, dinı saýatyn arttyrý, jastardy ǵylym men ónerge, sportqa baýlyp ósirý. Etnostar arasynda konstıtýsııalyq teńdik qaǵıdatyn dáripteý. О́sip kele jatqan jasty qosymsha til bilýge, salt-dástúrdi jetik meńgerýge tárbıeleý. Sońǵysy jastardy quraıtyn etnos ókilderi arasynda shynaıy tatýlyq pen dostyqty qalyptastyrý. Spıkerdiń aıtýynsha, bular ǵalamdyq jahandaný úderisine óskeleń urpaqtyń jutylyp ketpeýi úshin kerek.
I.Hashımjanov ózbek etnomádenı birlestiginiń atqarǵan jumysyna toqtaldy. «Ejelden týystas qazaq pen ózbek jurty Turandy meken etip, qıynshylyqty da, qýanyshty da birge kórdi. Baýyrlas halyqtar irgeles jatqan kórshi ǵana emes, etjaqyn aǵaıyn halyq. Bizdiń tarıhı taǵdyrymyz da, arman-muratymyz da ortaq. Týystyǵymyz til jaqyndyǵynan tamyr tartyp, dástúrimizben jalǵasyp, salt-sanamyzben qabysyp keledi», degen ol eki el arasyndaǵy strategııalyq áriptestik osydan 31 jyl buryn Ordabasydaǵy eldik jıynda qabyldanǵan «Máńgilik dostyq týraly» kelisimmen nyqtalǵanyn aıtty.
I.Hashımjanovtyń aıtýynsha, dastarqan kıeli uǵym, berekeniń bastaýy. Osy mádenıettiń ózegi bolǵan qundylyqty dáripteý baǵytynda «Dýstlık» qaýymdastyǵy 13 jyldan beri «Dostyq dastarqany» jobasyn iske asyryp keledi. 2022 jyldan bastap «Shymkent palaýy» degen atqa aýysqan jobanyń maqsaty – as iship, ydys bosatý emes, eldegi birlik pen dostyqtyń kórinisin gastrofestıval arqyly nasıhattaý.
Sessııa sońynda QHA tóraǵasynyń orynbasary birqatar belsendi azamatty Assambleıa nagradalarymen marapattady. Aıta keteıik, búginde qalalyq QHA janynda 17 etnomádenı birlestik pen 7 qurylym qoǵamdyq qazaqstandyq patrıotızmdi dáripteý baǵytyndaǵy jobalarǵa jumyldyrylǵan.
ShYMKENT
