Joǵaryda atap ótken Prezıdent bastamasy aıasynda Qazaqstannyń Eńbek jáne halyqty áleýmettik qorǵaý mınıstrligi byltyr «Ata joly» kartasy 5 myń adamǵa beriletinin málimdegen edi. Bul týraly quzyrly mınıstrliktiń 2023–2027 jyldarǵa arnalǵan damý josparynda jazylyp, jarııalanǵan. Memleket basshysynyń shetelden kásibı mamandar men tabysty bıznesmenderdi elge tartý jónindegi tapsyrmasyn oryndaý maqsatynda «Ata joly» kóshi-qon kartasy engizilgen edi. Byltyr karta 55 adamǵa berilip, onyń 13-i elge kelgen.
О́tken aptada osy joba aıasynda tarıhı Otanyna oralǵandarmen Úkimet basshysynyń orynbasary Tamara Dúısenova kezdesý ótkizdi. Júzdesý barysynda qandastar joba týraly pikirlerin aıtyp, elde atqarar jumysynyń josparyn tanystyrdy. Olardyń arasynda densaýlyq saqtaý, munaı jáne gaz, qurylys, bilim berý, IT salasynyń mamandary bar.
Máselen, Izraılden kelgen Bekjan Qońyrbaev Anestezıologııa qyzmetindegi kemshilikterdi jetkizdi. Ol saladaǵy jaǵdaıdy jaqsartý úshin sheteldik tájirıbeni qoldanýǵa ázir ekenin aıtty. Al Saıan Habıdenov qazir Atyraýda zaýyt salý jónindegi halyqaralyq jobany iske asyrýǵa qatysyp jatyr. Onyń Reseıdiń Sýrgýt qalasynda munaı jáne gaz salasynda 13 jyldyq tájirıbesi bar. Eńbek jolyn qatardaǵy maman retinde bastap, mansap satysynda orta býyn basshysyna deıin ósken. Qazirgi ýaqytta ol úzdik tájirıbelerdiń elimizde qoldanylýyna atsalysyp júr. Mońǵolııadan kelgen Hamza Tilek – IT-maman. Qazir Astana haby aıasynda jobany júzege asyrýdy josparlap otyr. Hamza Tilek – birneshe jobanyń avtory. Elge oralýdy kópten beri oılastyryp júrgen ol atajurtqa «Ata joly» kartasymen kelý kópten kútken múmkindik deıdi.
«Mońǵolııada 5 jyl boıy óz mamandyǵym boıynsha kásip istedim. Qazaqstanǵa kóship kelý úshin otbasymyzben jospar qurǵan edik. Alaıda birden kóship kelý tıimsiz bolǵandyqtan, maqsatym osy «Ata joly» kartasy arqyly ol jaqtaǵy kásibimnen qol úzbeı, 2-3 jyl shamasynda kásibimdi osy jaqta jalǵastyryp, keıin birjola atajurtqa kelý edi», deıdi ol.
Hamzanyń eki balasy men zaıybyna da bul karta tolyq jaramdy bolady. Medısınalyq tekseristen erkin ótip, ul-qyzdary mektepke bara alady. Joǵary oqý ornyna túsý múmkindigi men jumysqa ornalasý jaǵdaıy da qaralǵan. Alaıda kartaǵa ótinish jibermes buryn birneshe talaptyń oryndalýy shart.
Basty sharttardyń biri elimizde jeńildetilgen túrde mamandyqtardyń tizbesi bar, soǵan ený kerek. Ekinshiden, sol elde turatyn óziniń bir bıznes kózi bolýy kerek. Elimizde tapshy mamandyqtar tizimine ený kerek.
Al qandasymyz Bolat Ábildın – qurylys salasynyń tájirıbeli mamany. Injener-qurylysshy retinde Máskeýde (RF) birqatar nysannyń qurylysyna qatysqan. Ol tarıhı Otanynda salanyń damýyna úles qossam degen nıetpen kelgenin atap ótti. Qurylys mamandarynyń biliktiligin udaıy jetildirip otyrý qajettigine de mán berdi. Bul iske ózi de aralasýǵa ázir.
Túrkııadan kelgen qandasymyz Shaban Dınchtıýrk Qazaqstanǵa túrli salada ınvestorlardy tartýǵa kúsh salyp júr. Kommýnaldyq sharýashylyq, medısına baǵyttarynda júzege asqan jobalary týraly aıtyp ótken ol keler jyly týrıstik kompanııa ashýdy josparlap otyr. Qazaqstanǵa jylyna kem degende 100 myń týrıst ákelýdi maqsat etedi.
Kezdesýge qatysqan qandastarymyz «Ata joly» kartasyn engizý jobasyn úlken qýanyshpen qabyldaǵanyn jetkizdi. Oǵan sheteldegi ózge de sheteldik qazaqtar qyzyǵýshylyq bildirip jatqanyn aıtty.
«Úkimet «Ata joly» kartasyn paıdalanǵysy keletinderge qoldaý kórsetýge daıyn. Sizderdiń usynystaryńyz boıynsha jobany jetildirýge qatysty tıisti memlekettik organdarǵa tapsyrmalar beriletin bolady. Qazaqstannyń damýyna qoldan kelgenshe úles qosýǵa degen nıetterińiz qýantady. Bul rette elimizde túrli salalyq baǵdarlama júzege asyp jatqandyǵyn atap ótkim keledi. Olardy júzege asyrýda sizderdiń tájirıbelerińiz kádege jaraıdy dep sanaımyn», dedi Tamara Dúısenova.
«Ata joly» kartasy shetelde turyp jatqan etnostyq qazaqtarǵa 10 jylǵa deıingi merzimge beriledi. Oǵan qol jetkizý úshin úmitker kelesideı talaptardyń birine saı bolýy shart: Qazaqstan azamattyǵyna qabyldaýdyń ońaılatylǵan tártibi belgilenetin adamdar úshin mamandyǵynyń bolýy; Qazaqstanda suranysy joǵary mamandyqqa ıe; turaqty turatyn nemese azamattyǵy bar elde tirkelgen, jumys istep turǵan kásibiniń bolýy.
Karta ıesi Qazaqstanda jumysqa ornalasý nemese kásibin júrgizý, áleýmettik tólemder jasaý, kepildendirilgen medısınalyq kómekke qol jetkizý, bilim alý, t.b. qyzmetterdi paıdalana alady. Alaıda memlekettik qyzmette jumys atqarýǵa, jergilikti ózin-ózi basqarý organdaryna saılanýǵa, respýblıkalyq referendýmǵa qatysýǵa nemese daýys berýge haqy joq.
Joba byltyrdan bastap júzege asyp keledi. Búginge deıin 250 adam 18 memlekettegi elshilikterimizge kelip, keńes alypty. Karta alýǵa «Qutty meken», «E-Qonaq» mobıldi qosymshalary arqyly ótinish berýge bolady nemese Qazaqstannyń shetelderdegi elshilikterine júginý qajet.
Onyń ishinde Úkimet aıqyndaǵan óńirlerge qonystanatyn, turaqty jumysy bar qonys aýdarýshylarǵa satyp alatyn turǵyn úı qunynyń 50%-y kóleminde qarjylaı kómek retinde ekonomıkalyq utqyr sertıfıkatyn berý qarastyrylǵan. Atalǵan qarajat qurylysqa, turǵyn úı satyp alýǵa nemese «Otbasy bank» AQ arqyly baspana alatyn bolsa, bastapqy jarnany engizýge baǵyttalýy múmkin. Bul boıynsha resmı zańnamalyq qujattar qabyldanǵan kezde habarlanbaq.
«Ata joly» biregeı kartasy jóninde shetelde turatyn áriptesterimizben baılanysqa shyǵyp, pikirin bilgen edik. Olardyń kóz tigip, qulaq túrip otyrǵany da osy eken. Atalǵan karta iske qosylysymen iske kirisýge daıyn shetel jastarynyń qarasy mol kórinedi. Baıqaýymyzsha, olar karta ashylǵan kúnnen bastap keıingi jyldarda baıyrqalap qalǵan qazaqtyń baısaldy kóshin qaıta qozǵaýǵa zor septigin tıgizedi dep senedi.
