Atalǵan eldi mekende ótken jyldan beri at sportyna arnalǵan jabyq arena jumys istep jatyr. Endi, mine, taǵy bir jańa sport kesheni el ıgiligine tapsyrylyp otyr. Keshenniń ashylý rásimine Qostanaı aýdanynyń aıtýly sportshylary, sala ardagerleri, jergilikti sport mektepteriniń shákirtteri qatysty. Saltanatty is-sharaǵa arnaıy kelgen oblys ákimi jańa sport nysanynyń tek kásibı sportshylar úshin ǵana qyzmet etip qoımaı, osy aýdandaǵy jalpy buqaralyq sporttyń damýyna da zor yqpal etetinin atap ótti.
«Prezıdent Qasym-Jomart Toqaev buqaralyq sportty damytý, salamatty ómir saltyn qalyptastyrý jóninde tapsyrma berip, arnaıy baǵdarlama bekitip, sonyń aıasynda qomaqty qarjy bólingen edi. Minekı, sonyń nátıjesinde byltyr Áýlıekól, Meńdiqara, Naýyrzym aýdandarynda zamanaýı sport ortalyqtary ashyldy. Bıyl Denısov aýdanynyń ortalyǵynda jańa keshen boı kóterdi. Qazir oblys boıynsha taǵy osyndaı 8 nysan salyp jatyrmyz. Onyń bireýi – Qostanaı qalasynda, qalǵany shalǵaı aýyldarda boı kóteredi. Bul nysandardyń bári jyl sońyna deıin el ıgiligine tapsyrylady. Búgingi oqıǵanyń da orny erekshe. Balalar men jastardy sportqa tartýǵa bul keshenniń zor paıda tıgizeri sózsiz», dedi Q.Aqsaqalov.
Zamanaýı sport kesheniniń aýdany 1 700 sharshy metr bolady. Ishinde 23 bólim jumys istep tur. Atap aıtqanda, fýtbol, voleıbol, basketbol oıyndarynyń zaly, kúres zaldary, toǵyzqumalaq bólmesi, kıim aýystyrý, jýyný bólmeleri, medısına qyzmetkerleriniń bólmesi, ózge de sport túrlerinen jattyǵý oryndary qarastyrylǵan.
Jańa nysannyń ashylýy ásirese, jergilikti jastar úshin úlken oqıǵa, erekshe qýanysh. О́ıtkeni aýyl turǵyndarynyń deni salamatty ómir saltyn ustanady. Máselen, bul eldi mekende 180 bala qazaq kúresimen aınalysady. Zarechnyıda ulttyq zııatkerlik sport oıyny toǵyzqumalaq sheberleri de kóp. Sport kesheninde osy sport túrin damytýǵa arnalǵan arnaıy bólim jumys isteıdi. Bul bólimdegi 4 topta 7 jas pen 15 jas aralyǵyndaǵy 54 oqýshy zııatkerlik oıynnyń qyr-syryn meńgerip jatyr. Olardy toǵyzqumalaqtan sport sheberi, Azııa chempıony Aıym Ermuhanova jattyqtyryp júr.
«Shákirtterim oblystyq jarystarda joǵary nátıjelerge jetip, júldeli oryndarǵa ıe bolyp júr. Bizge jańa keshennen arnaıy oryn bergenine óte qýanyshtymyz. Buǵan deıin mekteptiń jertólesinde jumys istep keldik. Balalardyń yntasy óte zor. Toǵyzqumalaqtyń ózi – ata-babamyzdan jalǵasyp kele jatqan dástúrli oıyn. Balalardyń logıkasyn damytýǵa, oı qabiletiniń keńeıýine kóp kómektesedi. Ata-analar da balasynyń sabaq úlgerimi osy úıirmege qatysa bastaǵan soń edáýir jaqsarǵanyn aıtyp, alǵys bildirip jatady», deıdi jattyqtyrýshy.
Zarechnyıdaǵy zamanaýı sport kesheni sııaqty jańa nysandar kóbeıgen saıyn oblysta buqaralyq sportpen aınalysýshylardyń da sany arta túsken. Oblystyq dene shynyqtyrý jáne sport basqarmasy basshysynyń orynbasary Elena Kıreevanyń aıtýynsha, óńirde sportty janyna serik etkenderdiń qatary jyl saıyn kóbeıip keledi. Máselen, búginde oblys turǵyndarynyń 43,3%-y sportpen belsendi túrde aınalysady. 2029 jylǵa deıin bul kórsetkishti biz 50%-ǵa jetkizýdi kózdep otyrmyz. Bıyl oblysta salynatyn 8 dene shynyqtyrý-saýyqtyrý kesheniniń jeteýi aýyldy jerde boı kóteredi.
Sport kesheniniń kúres zalyna eki kilem tóselgen. Munda bir ýaqytta 40 bala jattyǵý jasaı alady. Bapker mamandar jańa nysannyń, ásirese, ulttyq sport túrleriniń damýyna úlken yqpal etetinin aıtyp otyr.
«Búginde dál osyndaı sport kesheni sonaý shalǵaıda jatqan Jangeldın aýdanynyń 3 aýdanyna salynaıyn dep jatyr. Munyń paıdasy óte kóp. Mysaly, búgin ashylyp jatqan sport keshenin alaıyq, buǵan deıin osy eldi mekenniń balalary mekteptiń jertólesinde, Mádenıet úıiniń holynda jattyǵyp keldi. Eshqandaı jaǵdaı bolǵan joq. Sonyń ózinde Qostanaı aýdany qazaq kúresinen 3-4 Qazaqstan chempıonyn tárbıelep shyǵardy. Munyń syrtynda, kúrestiń basqa túrleri boıynsha ótip jatatyn respýblıkalyq, oblystyq jarystardyń jeńimpazdary men júldegerleri shyǵyp jatyr. Qazir ulttyq kúres boıynsha oblys kóleminde Qostanaı aýdany birinshi orynda tur. Qazaq kúresiniń mektebi damyǵan Qostanaı, Arqalyq qalalary men Amangeldi, Jangeldın aýdandarynan da ozyp ketti. Osynda qazirgi ulttyq mekteptiń Serik Dármenbaev bastaǵan bes myqty jattyqtyrýshy jumys istep jatyr. Qostanaı oblysyn alǵa súırep jatqan – osy azamattardyń shákirtteri. Zarechnyı qazaq kúresinen basqa, asyq oıyny, toǵyzqumalaq, kókpardan da oblys boıynsha birinshi orynda tur. Sondyqtan Qostanaı aýdanynyń keleshegi óte zor. Eń bastysy, jańa sport kesheni mektepke jaqyn tur. Sol jaǵynda 500 metrdeı jerde taǵy bir úlken mektep salynyp jatyr. Jalpy, munda turyp jatqandar negizinen kezinde Amangeldi, Jangeldın, Naýyrzym aýdandarynan kóship kelgen aýyldyń balalary ǵoı. Sondyqtan bul aýdannyń bolashaǵynan kóp úmit kútip otyrmyz. Respýblıka, Azııany aıtpaǵanda, álem, olımpıada chempıondary shyǵatynyna senemiz», deıdi Qostanaı qalasynyń aǵa bapkeri Jumaqan Qasymhanov.
Sport kesheniniń ashylý saltanatynan keıin jańa nysanda voleıboldan oblys birinshiliginiń jalaýy kóterildi. Is-shara aıasynda túrli halyqaralyq jarystarda el namysyn qorǵap, jeńis tuǵyrynan kórinip júrgen sportshylar marapattalyp, ár salada eseli eńbek etip júrgen kánigi mamandarǵa «Qostanaı aýdanynyń qurmetti azamaty» ataǵy berildi.
Qostanaı oblysy
