Elordada kún saıyn eleýli mádenı is-sharalar, mańyzdy oqıǵalar ótedi. Sonyń biri – «Astana opera» shyǵarmashylyq ujymy senbi kúni astanalyqtar men qala qonaqtaryn teatrdyń sahna sheberleri óner kórsetetin jańa orynǵa jınady.
Opera jáne balet – ónerdiń shyńy desek, balet – ónerdegi kúrdeli janr deýge bolady. Mazmuny mýzykalyq-horeografııalyq obrazdar arqyly ashylatyn spektaklder – kórermenniń kózaıymyna aınalǵan shedevr dúnıeler, aıryqsha óner týyndylary. Sondaı keremet klassıkalyq kesh 14 naýryzda – «Beıbitshilik jáne Kelisim Saraıynyń» sahnasy M.Fokınniń «Shopenıana» jáne R.Rebektiń «Qazirgi sát qansha ýaqytqa sozylady?» baletterimen resmı túrde ashyldy. Dırıjeri – Rýslan Baımýrzın.
«Astana opera» sahnasynan ózge taǵy bir óner kórsetetin orynnyń iske qosylýy Mádenıet jáne aqparat mınıstrligi men Astana qalasy ákimdiginiń jáne teatrdyń «Beıbitshilik jáne Kelisim Saraıymen» seriktestik qarym-qatynasy nátıjesinde iske asty. Bul jóninde qoıylym aldynda ótkizilgen baspasóz sharasy kezinde málim boldy.
«Bul arqyly bizdiń shyǵarmashylyq ujym klassıkalyq mýzykany súıetin talǵampaz kórermenge burynǵydan da jaqyndaı túsedi, álemdik mýzyka óneriniń, onyń ishinde ulttyq klassıkalyq bıik ónerdi keńirek nasıhattaýǵa múmkindik beredi», deıdi «Astana Opera» teatrynyń dırektory Aleksandr Sovostıanov.
«Beıbitshilik jáne Kelisim Saraıy» elorda turǵyndary men qonaqtarynyń talǵamyna saı keletin qoıylymdardy usynýǵa múddeli. Tańǵajaıyp óner ordasy – «Astana Opera» teatrymen yntymaqtastyǵymyz elordadaǵy klassıkalyq ónerdi damytýǵa eleýli úles qosaryna senimdimiz», dedi «Beıbitshilik jáne Kelisim Saraıynyń» dırektory Narıma Muhambetalına.
Senbi kúni Saraı sahnasynda M.Fokınniń «Shopenıana» jáne R.Rebektiń «Qazirgi sát qansha ýaqytqa sozylady?» bir aktili baletteri shymyldyǵyn túrdi, kórermenniń júregin jaýlap, ádettegideı anshlagpen ótkizildi. Eýropany baǵyndyryp, tańdaıyn qaqqyzǵan «Shopenıana» − Frıderık Shopenniń mýzykasyna jazylǵan balet sıýıtasy. Qoıylym Astanada zor qoldaý taýyp, zal toly kórermenniń ystyq yqylasyna bólendi.
«Balet óneri – jalpy kórermenge jaqyn ónerdiń biri. Onyń ústine osyndaı ǵajaıyp Saraı sahnasynda qoıylýy – klassıkalyq shyǵarmalardy jaqsy kóretin jandardyń qalaýyn oryndap, halyqqa neǵurlym jaqyndaı túsýge múmkindik beredi dep oılaımyn. Repertýary jyl saıyn keńeıip, qoıylym sany men sapasy joǵarylaǵan saıyn «Astana opera» sahnasynda qoıylǵan spektaklder endi «Beıbitshilik jáne Kelisim Saraıynyń» sahnasynda da kórsetilip, kórermen qaýymyn qýantatyn bolady. Bul – oryn men ýaqytty tıimdi paıdalanýǵa jol ashady», deıdi «Astana Opera» dırıjeri Rýslan Baımýrzın.
Klassıkalyq horeografııanyń injý-marjandarynyń biri sanalatyn M.Fokınniń aty ańyzǵa aınalǵan horeografııasyna Balet trýppasynyń kórkemdik jetekshisi Altynaı Asylmuratova basshylyq etip, óner sheberlerimen birge kıeli sahnaǵa usynǵanyn atap ótý qajet.
Qazaq óneri sahnasynda bekzat óner, talǵampaz óner – opera men balettiń ulttyq jáne álemdik eń shedevr sanalǵan úzdik shyǵarmalaryn nasıhattap kele jatqan «Astana opera» ujymy endi órisin keńeıtip, Beıbitshilik jáne Kelisim Saraıy» sahnasynda elorda turǵyndary men qonaqtaryna klassıkalyq tamasha dúnıelerdi qoıa alady. Bul – teatrdyń talaıdyń tańdaıyn qaqqyzǵan repertýary men múmkindikterin aıtarlyqtaı keńeıtedi. Munda qyzyqty túrli is-sharalar, árqıly formattaǵy baǵdarlamalar sany artyp, kórermen aýdıtorııasy kóbeıe túsedi. Bolashaqta da munda opera jáne balet qoıylymdary, gala-konsertter ótedi, sondaı-aq talǵamy bıik ónerge jańa kórermenderdi baýlýǵa baǵyttalǵan arnaıy jobalar men klassıkalyq óner taqyrybyndaǵy bilim berý, aǵartýshylyq, tanymdyq dárister uıymdastyrylady.
Gúlshat SAPARQYZY
