Qazaqstannyń ziltemirshileri arasynan jarys jolyna alǵashqy bolyp 67 kg salmaqtaǵy Aqjol Qurmanbek shyqty. Ataqty Úshtóbe aýyr atletıka mektebiniń túlegi julqyp kóterýde aldyna jan salmady. Asa shıelenisti tartys jattyǵýdyń ekinshi túrinde jalǵasty. Chempıondyq ataqtan úmitkerler úsheý edi. Olar – mysyrlyq Hýsseın Hamýda Abdelrahman, moldovalyq Aleksandr Baljı jáne Aqjol Qurmanbek. Úsheýi ábden tiresti. Tartys sharyqtaý shegine jeter tusta Baljı básekelestikke shydamaı, qola medaldy qanaǵat tutty. Endi qalǵany – ekeý. О́kinishke qaraı, qandasymyz sońǵy múmkindigin paıdalana almaı, basty qarsylasyn alǵa jiberip aldy. Nátıjesinde, Aqjol kúmispen kúpteldi. Onyń nátıjesi – 285 kg (129+156). Bas júlde Mysyr sportshysyna buıyrdy. Chempıonnyń kórsetkishi – 286 (128+158) kg.
Kelesi kúni 89 kg salmaqta saıysqa túsken Nurdos Sabyr alystaǵy Ońtústik Amerıka qurlyǵynda qazaqtyń ánuranyn shyrqatty. Byltyrǵy álemdik dodada kúmispen kúptelgen qandasymyz bul joly aldyna jan salmady. Qossaıystyń qorytyndysy boıynsha ol 333 (148+185) kılogramdyq ziltemirdi erkin eńserdi. Ekinshi oryndy enshilegen armenııalyq Valerık Movsesıan Nurdostan 4 kg kem kóterse, ózbek Bekzod Gofýrjonov úshinshi satyǵa jaıǵasty.
Kóp keshikpeı óziniń komandalyq áriptesiniń jeńisti jolyn Aıanat Jumaǵalı jalǵastyrdy. Ol 76 kg salmaq dárejesinde álem chempıony atandy. Aıanattyń nátıjesi – 222 (97+125) kg. Bir aıta keterligi Aıanat barlyq alty múmkindigin utymdy paıdalandy. Kúmis pen qola medaldy fınlıandııalyq Mını Hormavırta (211 kg) men úndistandyq Sanjana Sanjana (210 kg) ózara bólisti. 81 kg salmaqta synǵa túsken Sánııa Ormanbaeva 201 kg salmaqty tik kóterip, qola medaldy moınyna ildi. Qazaq qyzy ıtalııalyq Sara Dal Bo (207 kg) men venesýelalyq Lıýdısmar Aparıko Alfonsony (206 kg) alǵa jiberip aldy. Al Darıa Balabaıýk (59 kg) – tórtinshi, Álı Medetbaev (73 kg) – besinshi, Dıdar Abdolla (102 kg) men Edil Asqarov (+102 kg) altynshy oryndardy qanaǵat tutty.
Nátıjesinde 2 altyn, 1 kúmis jáne 1 qola medaldy oljalaǵan Qazaqstan quramasy jalpy komandalyq esepte Kolýmbııamen birge úshinshi jáne tórtinshi oryndardy ózara bólisti. Aldymyzda – Venesýella (3+1+1) men Úndistan (2+2+2). Sondaı-aq TOP-10 komandanyń qataryna О́zbekstan (1+1+2), Mysyr (1+1+1), Sırııa, Grýzııa, Túrikmenstan (1+1+0) jáne Túrkııa (1+0+2) quramalary endi. Lımada barlyǵy 15 memlekettiń ánurany shyrqalyp, 29 eldiń týy bıikte jelbiredi.
Esterińizge sala keteıik, byltyr Albanııanyń Dýrres qalasynda ótken álem birinshiliginde Qazaqstannyń jasóspirimder quramasy 2 altyn, 2 kúmis oljalaǵan edi. Biraq arada biraz ýaqyt ótkennen keıin Taısıa Alekseevanyń qanynan ruqsat etilmegen dári-dármektiń izderi baıqalyp, ol kúmis medaldan aıyryldy.
Jasóspirimder arasyndaǵy álem birinshiliginiń jeńimpazdary
Erler: 49 kg – Fredı Andres Býstıllo (Kolýmbııa), 55 kg – Ramazan Efe Iýlmaz (Túrkııa), 61 kg – Davıd Vargas Kampos (Venesýela), 67 kg – Hýsseın Hamýda Abdelrahman (Mysyr), 73 kg – Bedebrat Bharalı (Úndistan), 81 kg – Rýslan Rahmatjonov (О́zbekstan), 89 kg – Nurdos Sabyr (Qazaqstan), 96 kg – Mohamad Alkateb (Sırııa), 102 kg – Súleıman Jafarov (Túrikmenstan) jáne +102 kg – Iraklıı Vekýa (Grýzııa).
Qyzdar: 40 kg – Preetısmıta Bhol (Úndistan), 45 kg – Sofııa Estrada Velez (Kolýmbııa), 49 kg – Lýsııa Gonzales Borrego (Ispanııa), 55 kg – Nıkoleta Kojakarý (Moldova), 59 kg – Marııa Paz Kasadevall (Argentına), 64 kg – Alehandra Rengıfo Shırınoz (Venesýela), 71 kg – Iesmar Oshao Rodrıges (Venesýela), 76 kg – Aıanat Jumaǵalı (Qazaqstan), 81 kg – Sara Dal Bo (Italııa) jáne +81 kg – Etta Maııa Love (Kanada).
