Foto: polisia.kz
Onyń ishinde, kámeletke tolmaǵandardy zańsyz áreketke tartqan 9 derek bar.
Adamdar «trafıgimen» aınalysqan kúdiktilerge qatysty uıymdasqan qylmystyq top qurý jáne oǵan basshylyq etý derekteri boıynsha úsh sotqa deıingi tergep-tekserý bastaldy.
«Mysaly, Astana qalasynda toǵyz «elıtalyq» monsha kesheniniń aýmaǵynda jas qyzdardy seksýaldyq qanaýǵa tartý jáne májbúrleý boıynsha qylmystyq júıeni jolǵa qoıǵan 17 adamnan turatyn toptyń qylmystyq áreketiniń joly kesildi. 30-dan astam tintý is-sharasy ótkizilip, aqsha jáne alty avtokólik tárkilendi. Negizgi fıgýranttar qamaýǵa alyndy.
Shymkent qalasynda osyǵan uqsas uıymdasqan qylmystyq top áshkerelendi. Munda jalpy somasy 1 mln teńge jáne 16 myń AQSh dollarynan astam qarajat, 10 avtokólik tárkilendi. Top jetekshileri men músheleri qamaýǵa alyndy.
Petropavl qalasynda 2023 jyldan bastap zorlyq-zombylyq pen bopsalaý arqyly jas qyzdardy jynystyq qanaýǵa májbúrlep kelgen qylmystyq top áreket etken. Uıymdasqan qylmystyq top qurý, basqarý jáne oǵan qatysý deregi boıynsha qylmystyq is tergelýde», dedi IIM uıymdasqan qylmysqa qarsy kúres departamentiniń ókili Qýandyq Alpys.
Sonymen qatar birneshe óńirde múmkindigi shekteýli jandardy qaıyr suraýǵa májbúrlegen qylmystyq toptar ustaldy. Olar osy zańsyz isi arqyly jylyna 10 mln teńge paıdaǵa kenelgen.
«Qaraǵandy qalasynda múmkindigi shekteýli adamdarǵa qoqan-loqqy jáne kúsh kórsetip, olardy qaıyr suraýǵa májbúrlep, «bıznes» uıymdastyrǵan adamdar toby ustaldy.
Osyǵan uqsas qylmystyq toptardyń áreketteri Aqtóbe, Almaty jáne Mańǵystaý oblystarynyń aýmaǵynda áshkerelendi. Onda múgedekter men jas balalardy bazarlar men vokzaldar aýmaǵynda paıdalanǵan. Barlyq qylmyskerler ustaldy», dedi Qýandyq Alpys.
Quzyrly organ osy baǵytta jumystar áli de jalǵasatynyn jetkizdi.
