Jyl sońyna deıin 3 myń sharshy metr alańda ornalasqan jańa bilim berý nysanyn paıdalanýǵa berý josparlanyp otyr. Búginde nysannyń irgetasy men monolıtti qańqasyn ornatý jumystary aıaqtalǵan. Mektep qajetti ınjenerlik-kommýnıkasııalyq ınfraqurylymmen qamtamasyz etilip, qurylys jáne bilim berý salasyndaǵy sony tehnologııalarmen jabdyqtalady. Úkimet basshysy qurylys jumystaryn belgilengen merzimde sapaly júrgizýdiń mańyzdylyǵyn basa aıtty.
Elimizde 2024-2025 jyldar aralyǵynda Ulttyq joba boıynsha barlyǵy 369 mektep ashý josparlanyp otyr. Atap aıtqanda, Almaty oblysynda 2024-2025 jyldary 53 jaıly mektep salynady. Bıyl 600-den 1 500 orynǵa deıingi syıymdylyǵy ártúrli 26 jaıly mektepti paıdalanýǵa berý josparlanǵan.
Ulttyq jobanyń sharttaryna sáıkes, barlyq jaıly mektepter oqýshylar men pedagogter úshin joǵary qaýipsizdik sharalaryn, tıisti ınfraqurylymdy jáne qolaıly jaǵdaıdy qamtamasyz ete otyryp, biryńǵaı standartqa saı salyndy.
Premer-mınıstr jańa jobalar ázirleýdi jáne memlekettik saraptamadan ótkizýdi jedeldetýdi jáne salynyp jatqan ǵımarattardy paıdalanýǵa berý merzimderiniń saqtalýyn qatań baqylaýda ustaýdy tapsyrdy.
«Bul – Prezıdenttiń megajobasy. Onyń sapaly ári ýaqytynda iske asyrylýyn qatań baqylaýǵa alý qajet. Jaıly mektepterdiń qurylysy balalarymyzdyń sapaly bilim alýyna barlyq jaǵdaı jasaýǵa baǵyttalǵan. Úkimet aldynda 2025 jyldyń sońyna qaraı 740 myń jańa oqýshy ornymen qamtamasyz etý mindeti tur. Qurylys jumystaryn joǵary qarqynmen júrgizý qajet», dep atap ótti O.Bektenov.
Sonymen qatar Premer-mınıstr Qonaev qalasyn damytý jónindegi uzaqmerzimdi josparmen tanysty. Úkimet basshysy sondaı-aq Arnaıy ekonomıkalyq aımaq aýmaǵynda iri jobalardy iske asyrý máselesi boıynsha Alataý qalasy ákiminiń baıandamasyn tyńdady.
Prezıdent Qasym-Jomart Toqaevtyń tapsyrmasyna sáıkes, Qonaevtyń damýy joǵary ekologııalyq, «aqyldy» qala tujyrymdamasyna sáıkes kelýge tıis. Úkimet bekitken Keshendi damý josparynda 2023-2027 jyldar aralyǵynda 187 is-sharany júzege asyrý kózdelgen. Qalany abattandyrý, kólik jáne ınjenerlik ınfraqurylymmen qamtamasyz etý, áleýmettik nysandardy salý jónindegi jobalardy iske asyrýǵa memlekettik bıýdjetten de, jeke sektor tarapynan da aıtarlyqtaı qoldaý kórsetiledi.
Almaty oblysynyń ákimi Marat Sultanǵazıev baıandaǵandaı, Qonaev qalasynda abattandyrý jumystary belsendi júrgizilip keledi. 2023 jyldyń qorytyndysy boıynsha 106 km ınjenerlik ınfraqurylym, onyń ishinde 19 km avtojol, 61 km elektr berý jelileri, 26 km sýmen jabdyqtaý jáne sý burý jelileri jóndeldi. Turǵyn úı oramdary qarqyndy damyp keledi – 610 páterlik 10 úı salyndy, 2023 jyly 15 úıdiń qurylysy bastaldy, 2024 jyly 32 úı bastalady dep josparlanyp jatyr. Barlyǵy – 1 400 páterlik 47 úı. Qazirgi ýaqytta 13 ınvestısııalyq joba júzege asyrylmaq. Jalpy pýl jobasynda 5 myń jumys ornyn ashýmen, kapıtal salymdarynyń barlyq kólemi 470 mlrd teńge bolatyn 23 perspektıvalyq usynys bar.
Bıyl halyqtyń ósip kele jatqan qajettilikterin eskere otyryp, abattandyrý boıynsha aýqymdy jumystar josparlanǵan. Olardyń ishinde «Almaty-О́skemen» tasjoly qurylysynyń tehnıkalyq-ekonomıkalyq negizdemesin ázirleý, «Jańa Ile» shaǵyn aýdanynda kóshe joldary jelisin tartý, jańa turǵyn alaptarǵa kommýnıkasııalar júrgizý jumystary bar. Aldaǵy 5 jylda qalada oqýshy oryndarynyń, zamanaýı medısınalyq mekemelerdiń, mádenı jáne sport nysandarynyń tapshylyǵy problemalaryn sheshý kózdelgen. Máselen, Qonaevta kitaphanasy bar 600 orynǵa arnalǵan Oqýshylar saraıy, Sport saraıy, drama teatry salynady. Onkologııalyq jáne perınataldyq blokteri bar kópsalaly aýrýhana, aýysymda 500 adam qabyldaıtyn emhana, 200 tósek-oryndy ınfeksııalyq aýrýhana paıdalanýǵa beriledi. Freedom finance týrıstik salany damytý úshin ınvestor retinde áreket etti: bank jańa ornalastyrý obektilerin, qonaqúı keshenderin salý boıynsha 6 ınvestısııalyq jobany júrgizedi. Jalpy, Keshendi jospar joǵary sapa standarttaryna sáıkes jańa oblys ortalyǵyn damytýdy jedeldetýge múmkindik beredi.
Úkimet basshysy Alataý qalasynyń jobasymen tanysyp, ákim Árken О́tenovtiń Arnaıy ekonomıkalyq aımaqty damytý keleshegi týraly baıandamasyn tyńdady. AEA aýmaǵynda 96,6 myń gektarda jalpy somasy 383 mlrd teńgege 11 iri ınvestısııalyq jobany iske asyrý josparlanýda, bul 7 myń jumys ornyn ashýǵa múmkindik beredi.
Oljas Bektenov qala ákimshiligine áleýmettik, ınjenerlik jáne turǵyn úı jobalaryn sapaly iske asyrýda jaýapkershiliktiń salmaǵy aýyr bolatynyn atap ótti. Úkimettiń qaýlysymen Alataý qalasynyń Bas jospary bekitildi, oǵan sáıkes jobalaý sheńberinde qurylystyń bıiktigi – qalanyń ortalyq bóliginen onyń shekarasyna qaraı tómendetý jolymen qalyptastyrý qaǵıdaty kózdelgen.
«Nátıjesinde, biz Almatynyń mańynda týrıstik áleýetti belsendi arttyra otyryp, ónerkásiptik, bilim berý jáne logıstıkalyq ortalyqqa aınalatyn iri megapolıs qurýdy qamtamasyz etýimiz kerek. Bas jospardyń árbir tarmaǵynyń iske asyrylýyn baqylaýda ustaý, sondaı-aq birinshi kezektegi iri jobalardy ruqsat qujattamasymen qamtamasyz etýge qala aýmaqtarynyń egjeı-tegjeıli josparlaý jobalaryn ázirleýdi jedeldetý qajet», atap kórsetti O.Bektenov.
