Foto: Aqorda baspasóz qyzmeti
«Jahandyq polıýster men memleketter arasynda kúsheıe túsken básekelestik – jańa dáýirge qadam basqanymyzdyń aıqyn dáleli. Buryn eldiń ál-aýqaty aýmaǵynyń kólemine jáne halqynyń sanyna baılanysty bolsa, qazir tehnologııa men adam kapıtalynyń sapasy aldyńǵy qatarǵa shyqty. Mysaly, HIH ǵasyrdyń basynda Jer shary halqynyń úshten birine jýyǵy Qytaıǵa tıesili bolǵan. Bul eldiń álemdik ekonomıkadaǵy úlesi de osy shamada edi. Alaıda HHI ǵasyrdyń basyna qaraı jaǵdaı túbegeıli ózgerdi. Dúnıejúzi halqynyń 5 paıyzy ǵana turatyn AQSh álemdik JIО́-niń 20 paıyzyn ıelendi», dedi Memleket basshysy.
Prezıdenttiń aıtýynsha, búginde ekonomıkalyq báseke geosaıası kúrestiń kezekti kezeńine ulasty. Osy oraıda ınnovasııanyń mańyzy arta túsedi. Álemdik damýdan shet qalmaý úshin elimizdi jan-jaqty jańǵyrtý qarqynyn údetý kerek.
«Biz órkenıettiń kóshin qýyp jetetin emes, basyp ozatyn modeldi negizge alýymyz qajet. Áıtpese, saǵym qýyp júre beremiz.
Qolda bar resýrstyń bárin jáne básekelestik jolyndaǵy artyqshylyǵymyzdy tolyqtaı paıdalaný mańyzdy. Jahandyq ǵylymı-tehnıkalyq revolıýsııa jaǵdaıynda ǵalymdar men bilimpazdardyń róli birden artady. Alaıda eń baı elderdiń ózi barlyq sala boıynsha joǵary deńgeıde zertteý júrgize almaıdy», dedi Q.Toqaev.
El Prezıdentiniń aıtýynsha, tabysqa jetý úshin basym baǵyttardy aıqyndap alyp, ǵylymı qaýymdastyqtyń, memleket pen bıznestiń kúsh-jigerin jumyldyrý kerek.
«Bul rette ǵalymdarymyz kabınetterinde typ-tynysh otyryp, tek teorııalyq izdenistermen shektelmeı, naqty ispen jáne qoldanbaly zertteýlermen aınalysýǵa tıis», dedi ol.
