Sýretti túsirgen – Erlan OMAR, «EQ»
О́tken jyly óńirde shomylý maýsymy kezinde bes turǵyn baqılyq boldy. О́kinishke qaraı, mert bolǵandardyń ishinde úsh jasóspirim bar. Úsh úıdiń úmiti erte sóndi.
Byltyr Jasórken aýylynda bolǵan qaıǵyly jaǵdaı talaı janǵa aýyr tıdi. Jeti jasar nemeresin qutqarmaq bolǵan alpystan asqan qarııa da taý sýynyń ekpinine shydas bermeı ómirmen qosh aıtysqan edi...
Bıylǵy shomylý maýsymyna daıyndyq jumystary oıdaǵydaı júrgizildi me? Tótenshe jaǵdaılar departamenti jumysty júıelep úlgerdi me? Sý aıdyndary mańyndaǵy jaǵdaı qalaı? Mamandar kez kelgen jaǵdaıǵa saqadaı saı daıyn ba?
Resmı derekke júginsek, óńirde gıdrografııalyq sanatqa engen júzden astam ózen men 112 toǵan ornalasqan. Shomylý maýsymy kezinde osy ózender men toǵandarǵa baratyndar az emes. Shilińgir shildede keıbir turǵyndar eskertý jazbalarǵa da qaraı bermeıdi... Kisi shyǵyny bolmaýy úshin jan-jaqty ázirlik kerek ekeni aıtpasa da túsinikti.
«Sý aıdyndaryndaǵy profılaktıkalyq is-sharalarǵa turaqty túrde tartylatyn oblys aýmaǵyndaǵy volonterlik uıymdardyń basshylary men úılestirýshileri sanatyndaǵy azamattar oblystyq tótenshe jaǵdaılar departamentinde daıarlyq kýrsynan ótti. Kýrsqa jalpy sany 59 adam tartylǵanyn aıta ketken jón. Olarǵa mamandar ózderi biletin dúnıeni tolyqtaı úıretti.
О́ńirdegi sý aıdyndarynyń qaýipti ýchaskelerinde kisi shyǵyny oryn alý derekteri, olardyń sebepteri jáne oqıǵaǵa yqpal etken mán-jaılar kórsetilgen 360 eskertý belgilerine jáne 8 kórneki stendke túgendeý jumystary júrgizildi. BAQ jáne áleýmettik jeliler arqyly negizgi qaýipsizdik sharalarynyń talaptary turaqty túrde turǵyndar nazaryna usynylyp jatyr.
Shomylý maýsymy bastalǵanǵa deıin jaǵajaılardyń tómengi qabatyn tekserý, arnaıy qaltqylar men eskertý belgileri, úgit-nasıhat stendterin qoıý jumystary júrgiziletin bolady», deıdi oblystyq tótenshe jaǵdaılar departamentiniń basshysy Arman Toqanov.
A.Toqanovtyń aıtýynsha, qazirgi kezge deıin úsh jaǵajaıdyń túbin tekserý jumysy talapqa saı júrgizilgen eken. Al óńirdegi sý aıdyndarynyń 16-synda shomylýǵa ruqsat berilipti. Sondaı-aq oblystyq máslıhattyń 2019 jylǵy sheshimine sáıkes shomylýǵa tyıym salynatyn oryndar tizimi anyqtalǵan.
Shyny kerek, shomylý maýsymy kezeńin adam shyǵynynsyz ótkizý sońǵy jyldary muńǵa aınalyp tur. Árıne, ótkir máselege kelgende jergilikti turǵyndardyń ózderi de qatelikke boı aldyryp jatatyny anyq. Balalardyń qaraýsyz qalýy saldarynan oryn alǵan qaıǵyly oqıǵalar da az emes. Áıtkenmen, quzyrly organdar shomylý maýsymy kezinde turǵyndarǵa qaýipsizdik sharalaryn tolyqqandy túsindergennen eshkimniń utylmaıtyny sózsiz.
«Eldi mekenderde turǵyn úılerge jaqyn mańda aǵatyn sýarmaly arnalardyń qaýipti ýchaskeleriniń jıegin qorshaǵan jón. Turǵyndarǵa qoljetimdi shomylatyn oryndardy jaǵajaı retinde qalyptastyrý máselesin pysyqtap, olardyń sanyn arttyrýǵa nazar aýdarýymyz kerek.
Budan bólek, shomylýǵa qaýipti oryndarǵa polısııa qyzmetkerleri men volonterlerdi tarta otyryp, kúndelikti negizde profılaktıkalyq-reıdtik is-sharalardy júrgizý jumystaryn myqtap qolǵa alǵan lázim. Sonda ǵana biz kisi shyǵynyn boldyrmaýǵa qoldan kelgenshe yqpal etemiz», deıdi departament basshysy.
Qalaı desek te sýǵa shomylý maýsymynda tek Jambyl oblysynda ǵana emes, basqa óńirlerde de qaıǵyly oqıǵalar jıi tirkelip jatady. О́tken jyly bes adamnyń ómirmen qosh aıtysqany kimdi de bolsa oılandyrsa kerek. Osy jyly jambyldyq shendiler shomylý maýsymyn tragedııasyz ótkize ala ma? Kim bilsin... Belgilisi, ázirge jaýapty mekemeler daıyndyq jumystaryna myqtap kirisip ketti.
Jambyl oblysy
