Foto: uralskweek.kz
Jergilikti Tótenshe jaǵdaılar departamentiniń málimetinshe, Syrym aýdanynda Araltóbe (50 abonent, 2 áleýmettik nysan), Bulan (176 abonent, 7 áleýmettik nysan), О́leńti (100 abonent, 2 áleýmettik nysan), Taldybulaq (46 abonent, 1 áleýmettik nysan), ishinara Alǵabas (43 abonent, 3 áleýmettik nysan) eldi mekenderinde, sondaı-aq Terektide Aqsoǵym aýylynda (531 abonent, 4 áleýmettik nysan) elektr jaryǵy sónip qaldy.
Mamandar abonentterdi sol kúni qalpyna keltirýge kiristi. Nátıjesinde, Syrym aýdanynda Alǵabas eldi mekeninde 19 abonent, Terektide Úlken Eńbek aýylynda 385 abonent, 3 áleýmettik nysannan basqa úı-ǵımarattar jaryqqa qaıta qosyldy.
«6 maýsym kúni de oblystyń alty aýdanynda 25 eldi mekende ekpini sekýndyna 14-ten 18 metrge deıin jetken kúshti jel 67 jeke turǵyn úı, 14 qora-qopsy, 18 áleýmettik nysannyń shatyryn julyp áketti. Oqıǵa oryndarynda jergilikti atqarýshy organdardyń komıssııalary jumys istep jatyr», dep habarlady BQO Tótenshe jaǵdaılar departamenti.
Turǵyndar da ekpindi jel saldarynan aýyldaǵy úılerdiń shatyrlary qırap, kósheler men aýlalardy qoqys basyp qalǵanyn jetkizdi.
