Zaǵıp jáne nashar kóretin azamattarǵa arnalǵan respýblıkalyq kitaphana búkil el boıynsha 16 mamandandyrylǵan kitaphanaǵa ádistemelik ortalyq retinde qyzmet etedi.
Sońǵy málimetterge súıensek, respýblıkanyń arnaıy kitaphanalarynyń jalpy qory 1 010 076 kitapqa jetken. Kitap qory ótken jylmen salystyrǵanda 2,5% ósip otyr.
Arnaıy kitaphanalar – zaǵıp jandar men nashar kóretin oqyrmandar, olardyń otbasy músheleri bos ýaqytyn tıimdi ótkizýge, rýhanı damýǵa, bilimin arttyrýǵa jáne ınternet arqyly túrli aqparat alýǵa kómektesetin biregeı mádenı ortalyq.
Bul kitaphanalar ıntellektýaldyq jáne shyǵarmashylyq damýdyń bastaýy retinde kitap oqýdy nasıhattaýda, qazaq jazýshylarynyń úzdik shyǵarmalaryn dáripteýde, balalar men jasóspirimder arasynda oqýǵa degen qyzyǵýshylyqty arttyrýda mańyzdy ról atqarady.
