Foto: tengrinews.kz
Bıylǵy túlekterdiń deni Jaratylystaný, gýmanıtarlyq jáne áleýmettik ǵylymdar mektebiniń (565 túlek), sondaı-aq Injenerlik jáne sıfrlyq ǵylymdar mektebiniń (582) stýdentteri. Al Joǵary bıznes, Bilim berý jáne Memlekettik saıasat mektepterin 164 stýdent, Medısına mektebin 139, Taý-ken isi jáne jer týraly ǵylymdar mektebin 57 stýdent támamdady.
Saltanatty is-sharada Ǵylym jáne joǵary bilim mınıstri Saıasat Nurbek úzdik magıstrler men doktorlarǵa dıplom tabystap, túlekterge aq jol tiledi:
«NU – elimizdegi ınnovasııalyq zertteýler men joǵary bilimge jetekshilik etip, sizder sııaqty talantty kóshbasshylardy tárbıelep jatyr. Men adaldyǵy men eńbekqorlyǵy úshin ýnıversıtet oqytýshylary men basshylyǵyna alǵys aıtamyn. Bul bilim ordasy – álemdegi eń úzdik 100-ge jýyq jas ýnıversıtettiń biri, sondaı-aq Azııadaǵy úzdik joǵary oqý oryndarynyń qatarynda. Árıne, ol elimizdegi zertteý ýnıversıtetteriniń kóshin bastap tur», dedi ol.
Sonymen qatar Parlament Májilisi Áleýmettik-mádenı damý komıtetiniń tóraǵasy Ashat Aımaǵambetov joǵary oqý ornyn bitirgen 10 úzdik stýdentke dıplom tabystap, Nazarbayev University jetistikterine toqtaldy.
«Ýnıversıtet mıssııasy – memlekettik saıasat pen bızneste, bilim men ǵylymda ózgeristerdiń basynda turatyn biliktiligi joǵary mamandardy daıarlaý. Bar-joǵy 14 jyldyń ishinde NU joǵary bilim salasynda halyqaralyq qaýymdastyqtyń ishinen óz ornyn taýyp, bedeldi «Times Higher Education» reıtınginde álem boıynsha úzdik zertteý ýnıversıtetteriniń 30 paıyzynyń, sondaı-aq Azııanyń úzdik ýnıversıtetteriniń 11 paıyzynyń qataryna kirdi. Stýdentter men túlekterdiń jetken jetistikteri ýnıversıtettiń jahandyq joǵary bilim salasyndaǵy bedelin nyǵaıta túsedi», dedi ol.
