Sýretterdi túsirgen – Erlan OMAR, «EQ»
Birneshe bólimnen turatyn jıhaz fabrıkasynyń tutynýshylary da osal emes. «BI Group», «Bazis-A» sekildi qurylys kompanııalary osynda tapsyrys beredi. Tutynýshy kóńilinen shyǵý úshin eń jaqsy aǵash ónimderi tańdalyp, brendtik tańbadaǵy boıaý men japsyrmalardy qoldanady. О́ndiriske qajetti taqtaı aǵashtary, ıaǵnı basty shıkizat ta otandyq kásiporyndardan alynady.
Fabrıkada jalpy 130 adam jumys isteıdi. Sonyń ishinde tehnolog, dızaıner, montaj sheberleriniń jumysy kózge birinshi iligedi. Árkimniń ózine bekitilgen mindeti bar. Biri taqtaıdy ólsheıdi, ekinshisi kesedi. Daıyn ólshemderdi qurastyrý úshin bekitedi. Úshinshi qyzmetker aǵashtyń kem-ketigi bolmaýyna erekshe nazar aýdarady. Sehtyń ár bólmesinde sońǵy úlgidegi sheteldik stanoktar ornalasqan. Olardyń da atqarar óz mindeti bar.
«Dál qazir fabrıkada eki seh jumys istep tur. Tapsyrys kóbeıgen jaǵdaıda daıyn turǵan sehtardy iske qosamyz. Kóbine qurylys kompanııalarymen birge jumys isteımiz. Kompanııalar salǵan jańa úılerdiń kireberisin sándi jıhazdarmen árleı otyryp, turǵyndardyń demalýyna qajetti barlyq apartamentti ornalastyramyz. Osynyń ishinde eń aýqymdy joba – qaladaǵy «Ábý Dabı Plaza» keshenindegi 141 páterge bizdiń kompanııanyń túrli jıhazy qoıyldy», deıdi seriktestiktiń joba jetekshisi Erlan Mýslımanov.
Erlannyń sózinshe, fabrıka ónimine memlekettik organdar, mádenı shara ótkizetin ǵımarattar, qonaqúıler, basqa da úlken qyzmet kórsetý oryndary tapsyrys beredi. Eshkimge uqsamaıtyn erekshe dızaınymen tanymal bolǵan «AVALON-K» jıhazyna turǵyndardyń qyzyǵýshylyǵy joǵary. Jalpy, aıyna 1 myń danaǵa deıin túrli jıhaz jasaýǵa qaýqarly fabrıkanyń ónimderi el naryǵynda úlken suranysqa ıe.
«Árıne, tek iri kompanııalarǵa ǵana emes, qarapaıym tutynýshylarǵa da qyzmet kórsetemiz. Turǵyndar kelip, óz talǵamyna saı tapsyrys berip, qalaǵan jıhazyn jasatyp jatady. Oryndyqtar, qonaq bólmege arnalǵan ústel, jazý ústeli, ashana jıhazy, basqa da múlikterdi bizdiń sheberler bar yntasyn salyp jasap beredi. Astana qalasynda úı jıhazdaryn satatyn 4 dúkenimiz bar. Kópshilik sonda baryp, úı ishine qajettisin tańdap júr», deıdi.
Erlannyń aıtýynsha, eldegi ashylǵan óndiris pen ondaǵy taýarlardyń taralýy úshin qoldaý áli de kóp kerek. Prezıdenttiń otandyq óndirýshilermen ofteık-kelisimshart úlesin kem degende 10%-ǵa deıin arttyrý týraly tapsyrmasy da bar. Ofteık-kelisimshart bolsa ónim shyǵarýshy da ýaıymǵa salynbaıdy. О́ıtkeni belgili bir mólsherde taýaryn ótkizýge memleket tarapynan kepildendirilgen qujaty bolady. Eger eldegi kásiporyndar shyǵarǵan taýardyń osylaısha satyp alý úderisin jeńildetip, sapasy men úlesin arttyrý syndy jumystardy bir júıege túsirse, onda ekonomıkalyq kórsetkish te joǵary bolatyny anyq. Bul – otandyq taýar óndirýshilerge úlken qoldaý ári syrt memleketterden keletin ónimdi kútip jaýtańdamaıtyn bolamyz. Qarjy da syrtqa ketpeı ózimizde qalady, dep aǵynan jaryldy E.Mýslımanov.
«Memleket ustanǵan baǵyttyń biri – otandyq ónimdi qoldaý. Bizde qazir «CT-KZ» sertıfıkaty bar. Bul – jergilikti ónim ekenin dáleldeıtin qujat. Negizinen ónimderge tapsyrys iri qurylys kompanııalardan túsetinin aıttyq. Biraq áli de elimiz Qytaı, Reseı nemese Eýropa elderinen keletin jıhazdardy satyp alyp júr. Úkimet otandyq ónimge kórsetiler qoldaýdy jalǵastyra tússe, biz de sheteldik dúnıelermen básekelese alatyn, sapasy joǵary ónimderdi shyǵarýdy toqtatpaımyz», deıdi «AVALON-K» jıhaz fabrıkasynyń ókili.
